“ມອງ” ໃນພາສາລາວຈາກເພງ “ໃສ່ໃຈໄດ້ແຕ່ມອງ ໃສ່ມອງໄດ້ທັງປາ”

“ໃສ່ໃຈໄດ້ແຕ່ມອງ ໃສ່ມອງໄດ້ທັງປາ”
ເພງນີ້ນັບວ່າເປັນການໃຊ້ພາສາທີ່ດຶງມະໂນພາບອອກມາໃຫ້ເຫັນ​ ໂດຍຜູ້ຟັງສາມາດທຽບກັນໄດ້ໂດຍທັນທີ​ວ່າ​ “ລະຫວ່າງ ມອງຈ້ອງຄົນບໍ່ຮັກ ກັບການໃສ່ມອງ”​,​ ນັບວ່າຜູ່ແຕ່ງຮູ້ຈັກໃຊ້ສັບທີ່ກົມກືນກົມກຽວ ແລະເປັນການຫຼິ້ນສຳນວນທີ່ໜ້າຍົກຍ້ອງ.

“ມອງ” ໃນຄຳທຳອິດເຮັດໜ້າທີ່ເປັນຄຳກຳມະ ທຽບໃຫ້ເຫັນວ່າ “ການໃສ່ໃຈຄົນທີ່ຮັກ ແຕ່ເຂົາບໍ່ຮັກ ກໍໄດ້ແຕ່ມອງ ໄດ້ແຕ່ເບິ່ງລ້າໆ ບໍ່ໄດ້ອີ່ມທ້ອງ”​

“ມອງ” ໃນຄຳທີສອງ ເປັນຄຳນາມ​ ໂດຍເພງຢາກບອກວ່າ “ການໃສ່ມອງໄດ້ປາ,​ ໄດ້ກິນອີ່ມທ້ອງ,​ ດີກວ່າໃສ່ໃຈຄົນທີ່ເຂົາບໍ່ຮັກ ສຸດທ້າຍກໍໄດ້ແນມເບິ່ງເຂົາໄປຮັກຄົນອື່ນ”​

ຊື່ສິນລະປິນ GX2 ຫຼືຊື່ ທ້າວ ກູດ ເປັນນ້ອງຊາຍຂອງ T’Jame uno ເຈົ້າຂອງເພງ “ໃສ່ໃຈໄດ້ແຕ່ມອງ ໃສ່ມອງໄດ້ທັງປາ” ເປັນຄົນ ແຂວງຄຳມ່ວນ

ເຊິ່ງຫຼາຍຄົນອາດ​ມອງ​ ວ່າ​ “ມອງ​ເປັນພາສາໄທ” ແຕ່ຄວາມຈິງແລ້ວ ເປັນທັງໄທ ແລະລາວ​ເຊິ່ງໃນພາສາລາວປາກົດໃຫ້ເຫັນຫຼາຍໃນບົດກອນ​ ແລະບົດເພງ.

ໄຄແດ່ຜູ້ຕັ້ງຊື່ເພງຮູ້ໃຊ້ຄຳວ່າ “ແຕ່” ແທນ​ “ແຄ່” ເຊິ່ງ​ ຄຳວ່າ​ “ແຄ່”​ ກໍເປັນຄຳລາວ ມື້ໜ້າຈະນຳສະເໜີອີກ.

ທີ່ມາ “ປ່ອງຢ້ຽມພາສາລາວ”