ສືບຕໍ່ມາດຕະການຜ່ອນຜັນແລະມາດຕະການປ້ອງກັນການຕິດເຊື້ອໂຄວິດ-19

ເພື່ອສືບຕໍ່ເຂັ້ມງວດ ປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການລະບາດ ຂອງພະຍາດໂຄວິດ-19, ລັດຖະບານ ໄດ້ຕົກລົງ ແລະ ຊີ້ນໍາ ໃຫ້ສືບຕໍ່ປະຕິບັດບັນດາມາດຕະການຜ່ອນຜັນ, ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ຄືກັນກັບມາດຕະການທີ່ໄດ້ປະຕິບັດໃນເດືອນທັນວາ 2020 ແລະ ເດືອນມັງກອນ 2021 ຜ່ານມາ ຕາມທີ່ໄດ້ລະບຸໃນແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 1414/ຫສນຍ, ລົງວັນທີ 23 ທັນວາ. ຍ້ອນວ່າມີການລະບາດເພີ້ມຂຶ້ນ ໃນທຸກປະເທດອ້ອມຂ້າງ ຈຶ່ງຈະຕ້ອງໄດ້ປະຕິບັດມາດຕະການ ເພີ່ມຕື່ມຈຳນວນໜຶ່ງໃຫ້ເຂັ້ມງວດກວ່າເກົ່າ ສຳລັບໄລຍະແຕ່ວັນທີ 1 ກຸມພາ ຫາ ວັນທີ 31 ມີນາ 2021.

ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໄດ້ລາຍງານໃຫ້ຮູ້ໃນວັນທີ 2 ກຸມພາ 2021 ວ່າ: ເພື່ອປ້ອງກັນບໍ່ໃຫ້ພະຍາດໂຄວິດ-19 ແຜ່ລະບາດໃນສປປ ລາວ ອີກຄັ້ງທີ 2 ລັດຖະບານ ກໍຄື ຄະນະສະເພາະກິດ ເຫັນດີໃຫ້ສືບຕໍ່ໂຈະການອະນຸມັດຖ້ຽວບິນເໝົາລຳ ຈາກປະເທດ/ຂົງເຂດ ທີ່ມີການລະບາດຂອງພະຍາດໂຄວິດ-19 ຢູ່ພາຍໃນ, ຍົກເວັ້ນຖ້ຽວບິນເພື່ອມະນຸດສະທໍາ, ຖ້ຽວບິນນໍາສົ່ງຄົນເຈັບ ແລະ ຖ້ຽວບິນມີແຕ່ຜູ້ໂດຍສານຂາອອກເທົ່ານັ້ນ ທີ່ມີຄວາມຈໍາເປັນ ແຕ່ຕ້ອງໄດ້ມີການຄົ້ນຄວ້າລະອຽດຮັດກຸມ ແລະ ກວດກາຢ່າງເຄັ່ງຄັດ ເປັນແຕ່ລະກໍລະນີ. ພ້ອມກັນນີ້ ກໍ່ໃຫ້ກວດຖ້ຽວບິນ ເໝົາລຳ ຈາກປະເທດ ທີ່ບໍ່ມີການລະບາດຂອງເຊື້ອພະຍາດໂຄວິດ-19 ຢູ່ພາຍໃນ ທີ່ໄດ້ຮັບອະນຸຍາດ, ເດັດຂາດບໍ່ໃຫ້ມີຜູ້ໂດຍສານຜ່ານ ຈາກປະເທດທີ່ມີການລະບາດຂອງພະຍາດໂຄວິດ-19 ຢູ່ພາຍໃນ ມານໍາຖ້ຽວບິນເໝົາລຳດັ່ງກ່າວ; ສືບຕໍ່ໂຈະການອອກວີຊາທ່ອງທ່ຽວ ແລະ ຢ້ຽມຢາມໃຫ້ແກ່ຄົນຕ່າງປະເທດ.

ສໍາລັບນັກການທູດ, ພະນັກງານອົງການຈັດຕັ້ງສາກົນ, ຊ່ຽວຊານ, ນັກລົງທຶນ ທີ່ມີຄວາມຈໍາເປັນ ແລະ ຮີບດ່ວນ ສາມາດເຂົ້າມາປະຕິບັດໜ້າທີ່ຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆໄດ້ ແຕ່ຕ້ອງໄດ້ຮັບອະນຸຍາດຈາກຄະນະສະເພາະກິດ ແລະ ປະຕິບັດຕາມມາດຕະການປ້ອງກັນ ຢ່າງເຂັ້ມງວດ ເປັນຕົ້ນ ຕ້ອງໄດ້ມີໃບຢັ້ງຢືນການກວດເຊື້ອໂຄວິດ-19 ດ້ວຍເຄື່ອງກວດ PCR 72 ຊົ່ວໂມງກ່ອນເດີນທາງອອກນອກປະເທດ ໂດຍມອບໃຫ້ສາຍການບິນເປັນຜູ້ກວດກາຕົວຈິງ ແລະ ເມື່ອມາຮອດ ສປປ ລາວ ແລ້ວ ຕ້ອງໄດ້ເກັບຕົວຢ່າງ ເພື່ອກວດຫາເຊື້ອ ໂຄວິດ-19 ດ້ວຍເຄື່ອງ PCR ອີກ ແລະ ກັກຕົວຢູ່ສູນ ຫລື ໂຮງແຮມທີ່ລັດຖະບານ ກໍານົດໄວ້ໃຫ້ຄົບ 14 ວັນ ຕາມລະບຽບການ. ພາຍຫລັງທີ່ໄດ້ຮັບອະນຸມັດແລ້ວ ໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ນະຄອນຫລວງວຽງຈັນ, ບັນດາແຂວງ ກ່ຽວຂ້ອງ ສົມທົບກັບບັນດາຂະແໜງ ການກ່ຽວຂ້ອງ ກວດກາສະພາບສະຖານທີ່ກັກກັນ ແລະ ຕິດຕາມແນະນຳພວກກ່ຽວ ທີ່ຈະເຂົ້າມານັ້ນ ໃຫ້ປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ທີ່ຄະນະສະເພາະກິດ ວາງອອກຢ່າງເຂັ້ມງວດ;

ສືບຕໍ່ປິດດ່ານປະເພນີ ແລະ ດ່ານທ້ອງຖິ່ນ ສໍາລັບການເຂົ້າ-ອອກ ຂອງບຸກຄົນທົ່ວໄປ ແລະ ການຂົນສົ່ງສິນຄ້າ ຍົກເວັ້ນບາງດ່ານປະເພນີ ຫລື ດ່ານທ້ອງຖິ່ນ ທີ່ໄດ້ຮັບອະນຸຍາດຈາກລັດຖະບານ ໃຫ້ລົດຂົນສົ່ງ ເຂົ້າ-ອອກ ໄດ້, ແຕ່ຕ້ອງໄດ້ຮັບການສີດຢາຂ້າເຊື້ອພະຍາດ ຕາມເຕັກນິກຂອງຂະແໜງການກ່ຽວຂ້ອງກຳນົດ; ສືບຕໍ່ປິດດ່ານສາກົນ ສຳລັບການເຂົ້າ-ອອກ ຂອງບຸກ ຄົນທົ່ວໄປ, ຍົກເວັ້ນພົນລະເມືອງລາວ ແລະ ຊາວຕ່າງປະເທດ ທີ່ມີຄວາມຈຳເປັນຮີບດ່ວນ ໃນການເດີນທາງເຂົ້າ-ອອກ ສປປ ລາວ ທີ່ໄດ້ຮັບອະນຸຍາດຈາກຄະນະສະເພາະກິດ. ສໍາລັບການຂົນສົ່ງສິນຄ້າ ຜ່ານດ່ານສາກົນ ແມ່ນສາມາດເຂົ້າ-ອອກໄດ້ຕາມປົກກະຕິ; ບໍ່ອະນຸຍາດໃຫ້ຈັດງານຄອນເສີດ, ງານລາຕີສະໂມສອນ ແລະ ງານສະເຫລີມສະຫລອງຕ່າງໆ ທີ່ຈັດເປັນງານໃຫຍ່ ໂດຍໃຫ້ສະຫລອງຢູ່ກັບເຮືອນ ພາຍໃນຄອບຄົວຂອງໃຜລາວ, ສໍາລັບງານດອງ ກໍໃຫ້ຈັດແບບກະທັດຮັດ ບໍ່ໃຫ້ຈັດເປັນງານໃຫຍ່ ແລະ ປະຢັດມັດທະຍັດ ຕາມຮີດຄອງປະເພນີ ອັນດີງາມຂອງລາວເຮົາ ແຕ່ໃຫ້ຮັບປະກັນມາດຕະການ ປ້ອງກັນການຕິດເຊື້ອ ໂຄວິດ-19 ທີ່ ຄະນະສະເພາະກິດວາງອອກ;

ສຳລັບການຈັດງານບຸນປະເພນີຕ່າງໆ ແມ່ນເຫັນດີໃຫ້ຈັດແບບກະທັດຮັດ ບົນຈິດໃຈປະຢັດ, ທັງໃຫ້ຮັບປະກັນມາດຕະການ ປ້ອງກັນການຕິດເຊື້ອໂຄວິດ-19 ທີ່ຄະນະສະເພາະກິດວາງອອກ ຕາມແຈ້ງການຂອງຫ້ອງວ່າການສຳນັກງານນາຍົກ ລັດຖະມົນຕີ ສະບັບເລກທີ 32/ຫສນຍ, ລົງວັນທີ 12 ມັງກອນ 2021; ສືບຕໍ່ເພີ່ມທະວີການໂຄສະນາເຜີຍແຜ່ ໃຫ້ທຸກຄົນໃຫ້ສັງຄົມ ເຂົ້າໃຈວ່າ ເຖິງແມ່ນວ່າປະເທດເຮົາ ບໍ່ມີການລະບາດຂອງພະຍາດ ໂຄວິດ-19 ຢູ່ພາຍໃນກໍ່ຕາມ ແຕ່ທຸກປະເທດໃກ້ຄຽງ ມີການລະບາດເພີ່ມຂຶ້ນ ແລະ ຫລາຍປະເທດໃນໂລກ ຍັງມີການລະບາດຮຸນແຮງຢູ່, ຍ້ອນແນວນັ້ນ ໃຫ້ພົນລະມືອງລາວ ແລະ ທຸກຄົນທີ່ອາໄສຢູ່ ສປປ ລາວ ຕ້ອງຍົກສູງສະຕິຄວາມຮັບຜິດຊອບ ໃນການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຢ່າງເປັນເຈົ້າການຮ່ວມກັນ;

ສະເໜີ ໃຫ້ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ສົມທົບກັບນະຄອນຫລວງວຽງຈັນ ແລະ ບັນດາແຂວງທົ່ວປະເທດ ໂດຍສະເພາະແຂວງຊາຍແດນ ເອົາໃຈໃສ່ ແລະ ສືບຕໍ່ເພີ່ມທະວີຕື່ມໃນການຕິດຕາມກວດກາ ການເຂົ້າ-ອອກ ຢູ່ດ່ານລາດຕະເວນຕາມຊາຍແດນ ຢ່າງເຄັ່ງຄັດ ເພື່ອຮັບປະກັນບໍ່ໃຫ້ມີການເຂົ້າ-ອອກແບບຊະຊາຍ ຫລື ມີການລັກລອບເຂົ້າ-ອອກ ບໍ່ຜ່ານດ່ານຊາຍແດນ ເພື່ອຮັບປະກັນບໍ່ໃຫ້ມີຄວາມສ່ຽງ ໃນການນຳເຊື້ອພະຍາດເຂົ້າມາແຜ່ລະບາດໃນຊຸມຊົນ. ກໍລະນີພົບເຫັນຜູ້ລັກລອບເຂົ້າມາ ແມ່ນໃຫ້ນຳເຂົ້າສູນຈຳກັດບໍລິ ເວນ ເພື່ອກວດວິເຄາະຫາເຊື້ອພະຍາດ, ຄວບຄຸມບໍ່ໃຫ້ມີການຕິດເຊື້ອ ແລະ ແຜ່ເຊື້ອ ພ້ອມທັງດຳເນີນການຕາມກົດໝາຍ ແລະ ລະບຽບການກ່ຽວຂ້ອງ; ສະເໜີ ໃຫ້ອົງການປົກຄອງແຕ່ລະຂັ້ນ ສືບຕໍ່ເພີ່ມທະວີບົດບາດໃນການຄຸ້ມຄອງ, ການຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດ ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19 ໃນຂອບເຂດທີ່ຕົນຮັບຜິດຊອບ ແລະ ລາຍງານໃຫ້ຂັ້ນເທິງຂອງຕົນຊາບ ຢ່າງເປັນປົກກະຕິ ແລະ ທັນເວລາ;

ໃຫ້ກະຊວງສາທາລະນະສຸກ ສົມທົບກັບພາກສ່ວນກ່ຽວຂ້ອງ ຊີ້ນຳ, ຊຸກຍູ້ ຕິດຕາມການປັບປຸງການເກັບຄ່າກວດວິເຄາະຫາເຊື້ອພະຍາດ ໂຄວິດ-19, ອອກຄຳແນະນຳ ລະອຽດກ່ຽວກັບ ການນຳໃຊ້ເຄື່ອງຕິດຕາມທາງການແພດ ແລະ ການປະກັນໄພ COVID-19 ສໍາລັບຄົນຕ່າງປະເທດ ທີ່ເດີນທາງເຂົ້າມາ ສປປ ລາວ ໃຫ້ສຳເລັດໂດຍໄວ; ໃຫ້ຄະນະສະເພາະກິດ ປັບປຸງ ແລະ ຟື້ນຟູຄືນ ບັນດາສະຖານທີ່ຈຳກັດບໍລິເວນ ຢູ່ສູນກາງ ແລະ ຢູ່ທ້ອງຖິ່ນທີ່ມີແລ້ວ, ພ້ອມກັນນັ້ນ ກໍ່ໃຫ້ເພີ່ມສະຖານທີ່ໃໝ່ ເພື່ອເປັນບ່ອນຈຳກັດບໍລິເວນ ແລະ ປິ່ນປົວຜູ້ຕິດເຊື້ອ ໃນກໍລະນີທີ່ມີຜູ້ເດີນທາງມາຈາກຕ່າງປະເທດ ເປັນຈຳນວນຫລາຍ ໂດຍສະເພາະ ແຮງງານລາວ ກໍຄືຄົນລາວ ທີ່ຕົກຄ້າງຢູ່ຕ່າງປະເທດ; ໃຫ້ຄະນະສະເພາະກິດ ຊີ້ນຳບັນດາຂະແໜງການກ່ຽວຂ້ອງ ແລະ ອົງການປົກຄອງທ້ອງຖິ່ນ ເພີ່ມທະວີການຕິດຕາມ ກວດກາສະຖານທີ່ຈຳກັດບໍລິເວນ ທີ່ຕິດພັນກັບການປະຕິບັດມາດຕະການ ທີ່ຄະນະສະເພາະກິດວາງອອກ ຢ່າງເຂັ້ມງວດ.

ຖ້າຜູ້ໃດລະເມີດ ແມ່ນໃຫ້ຄະນະສະເພາະກິດແຕ່ລະຂັ້ນ ປະຕິບັດມາດຕະການຕາມກົດໝາຍ, ລະບຽບການ ແລະ ມາດຕະການ ທີ່ຄະນະສະເພາະກິດ ວາງອອກຢ່າງເຂັ້ມງວດ; ໃຫ້ຄະນະສະເພາະກິດ ສົມທົບກັບພາກສ່ວນກ່ຽວຂ້ອງ ແລະ ປະເທດໃກ້ຄຽງ ຄົ້ນຄວ້າ ມາດຕະການປ້ອງກັນການຕິດເຊື້ອ ຈາກການນຳເຂົ້າອາຫານທະເລ ແລະ ອາຫານແຊ່ແຂງ; ໃຫ້ຄະນະສະເພາະກິດ ສືບຕໍ່ປະສານກັບປະເທດ ເພື່ອນມິດ ແລະ ອົງການຈັດຕັ້ງສາກົນ ຕິດຕາມການຄົ້ນຄວ້າວັກຊິນປ້ອງກັນພະຍາດ ໂຄວິດ-19 ທີ່ປັດຈຸບັນ ຍັງຢູ່ໃນໄລຍະທົດລອງ ພ້ອມທັງຈັດຫາ ແລະ ໃຫ້ໄດ້ມານຳໃຊ້ໃນປະເທດເຮົາເພີ່ມຂຶ້ນ ໂດຍສະເພາະນຳໃຊ້ວັກຊິນດັ່ງກ່າວມາບໍລິການໃຫ້ປະຊາຊົນ ຢ່າງທົ່ວເຖິງ.

ມາດຕະການທີ່ກໍານົດໄວ້ຂ້າງເທິງນີ້ ມີຜົນສັກສິດ ນັບແຕ່ວັນທີ 1 ກຸມພາ ຫາ ວັນທີ 31 ມີນາ 2021 ໃນພາກປະຕິບັດຕົວຈິງ ຈະໄດ້ມີການປະເມີນ, ທົບທວນ ແລະ ດັດປັບໃຫ້ ເໝາະສົມຕື່ມ, ກໍລະນີມີການປ່ຽນແປງ ລັດຖະບານ ຈະແຈ້ງໃຫ້ຊາບເປັນແຕ່ລະໄລຍະ. ໃນນາມຕາງໜ້າຄະນະສະເພາະກິດ, ຂ້າພະເຈົ້າ ຂໍຮຽກ ຮ້ອງໃຫ້ພົນລະເມືອງລາວທຸກຄົນ ພ້ອມດ້ວຍ ຊາວຕ່າງດ້າວ, ຜູ້ບໍ່ມີສັນຊາດ, ຊາວຕ່າງປະເທດ ທີ່ດຳລົງຊີວິດ ແລະ ທຳມາຫາກິນ ຢູ່ ສປປ ລາວ ທຸກຖ້ວນໜ້າ ຈົ່ງເຊີດຊູນ້ຳໃຈ ເປັນເຈົ້າຂອງປະເທດຊາດ, ສາມັກຄີເປັນຈິດໜຶ່ງໃຈດຽວກັນ ສືບຕໍ່ຕັ້ງໜ້າເຂົ້າຮ່ວມ ປະຕິບັດບັນດາມາດຕະການ, ນິຕິກໍາທີ່ວາງອອກ ເພື່ອເຮັດໃຫ້ການປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ ໂຄວິດ-19 ໃນປະເທດເຮົາ ໃຫ້ໄດ້ຮັບຜົນດີ.