ກວດພົບຜູ້ຕິດເຊື້ອພະຍາດໂຄວິດ19 ເພີ່ມອີກ 1 ກໍລະນີ

ດຣ. ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຖະແຫງຕໍ່ສື່ມວນຊົນ ຕອນເຊົ້າວັນທີ 3 ກຸມພາ 2021 ເຖິງສະພາບການລະບາດຂອງພະຍາດໂຄວິດ 19 ວ່າ: ມື້ຜ່ານມາການເກັບຕົວຢ່າງມາກວດເພື່ອຊອກຫາຜູ້ຕິດເຊື້ອພະຍາດCOVID-19 ໂດຍໄດ້ ເກັບຕົວຢ່າງມາກວດວິເຄາະທັງໝົດ 330ຄົນ, ຜົນກວດວິເຄາະທັງໝົດແມ່ນພົບຜູ້ເຊື້ອໃໝ່ 01 ຄົນ, ຄື ຜູ້ຕິດເຊື້ອກໍລະນີທີ 45

– ເປັນເພດຍິງ, ອາຍຸ20 ປີ, ສັນຊາດ: ລາວ, ແຮງງານລາວ ເດີນທາງມາຈາກແຂວງສະມຸດປະການ, ປະເທດໄທ. ປະຈຸບັນຢູ່ ເມືອງຊະນະສົມບູນ, ແຂວງຈຳປາສັກ ຜູ້ກ່ຽວບໍ່ມີອາການສະແດງຫຍັງອອກ;
– ໃນວັນທີ 30 ມັງກອນ 2021 ຜູ້ກ່ຽວພ້ອມດ້ວຍໝູ່1 ຄົນເດີນທາງດ້ວຍລົດໂດຍສານ ຈາກສະຖານີໝໍຊິດ ມາດ່ານຊ່ອງເມັກ, ແຂວງອຸບົນລາດຊະທານີ;
– ວັນທີ 31 ມັງກອນ 2021 ໄດ້ຂ້າມດ່ານສາກົນວັງເຕົ່າ, ແຂວງຈໍາປາສັກ ໄດ້ເກັບຕົວຢ່າງກວດຊອກຫາເຊື້ອພະຍາດໂຄວິດ-19 ແລະເດີນທາງດ້ວຍລົດໂດຍສານທັງໝົດ 36 ຄົນ(ລວມທັງຜູ້ກ່ຽວ) ເຂົ້າຈໍາກັດບໍລິເວນຢູ່ທີ່ສູນຄະນະສະເພາະກິດກໍານົດໄວ້;

– ວັນທີ 01 ກຸມພາ 2021 ຜົນກວດວິເຄາະຂອງໂຮງໝໍແຂວງຈໍາປາສັກແມ່ນກວດພົບເຊື້ອ COVID-19 ຈຶ່ງໄດ້ສົ່ງແຍກປ່ຽວ ແລະນອນຕິດຕາມອາການຢູ່ໂຮງໝໍແຂວງຈຳປາສັກ ແລະໄດ້ສົ່ງຕົວຢ່າງໃຫ້ ສູນວິເຄາະແລະລະບາດວິທະຍາກວດ ຢັ້ງຢືນ. ຜົນກວດຢັ້ງຢືນວ່າພົບເຊື້ອ COVID-19;
– ສຳລັບຜູ້ສຳຜັດໃກ້ຊິດມີທັງໝົດ 35 ຄົນ, ທັງໝົດແມ່ນໄດ້ເກັບຕົວຢ່າງກວດ ແລະເຂົ້າຈຳກັດບໍລິເວນຢູ່ທີ່ສູນຄະນະສະເພາະກິດກຳນົດໄວ້.
ສັງລວມການກວດວິເຄາະ ນັບແຕ່ເດືອນມັງກອນ 2020 ຮອດ ວັນທີ 02 ກຸມພາ 2021ໄດ້ເກັບຕົວຢ່າງມາກວດທັງໝົດ104,542ຕົວຢ່າງ, ແລະມີຜົນບວກ 45 ຕົວຢ່າງ.
. ການຕິດຕາມປີ່ນປົວຄົນເຈັບຢູ່ໂຮງໝໍ :ມາຮອດປະຈຸບັນຍັງມີຄົນເຈັບຕິດເຊື້ອພະຍາດ COVID-19ຈຳນວນ 4 ຄົນທີ່ຍັງສືບຕໍ່ນອນປິ່ນປົວຢູ່ໂຮງໝໍທີ່ໄດ້ກຳນົດໄວ້

o ກໍລະນີ 42 ແລະ 45 ຕິດຕາມປິ່ນປົວ ຢູ່ ໂຮງໝໍແຂວງຈໍາປາສັກ
o ກໍລະນີ 43 ຕິດຕາມປິ່ນປົວ ຢູ່ ໂຮງໝໍແຂວງຫຼວງນໍ້າທາ
o ກໍລະນີ 44 ຕິດຕາມປິ່ນປົວ ຢູ່ນະຄອນຫຼວງວຽຈັນ ທັງ ສາມຄົນ ແມ່ນມີສຸຂະພາບແຂງແຮງດີ ,ບໍ່ມີອາການສົນຫຍັງ.