ເມືອງບໍ່ແຕນ 9 ບ້ານໄດ້ຮັບຜົນກະທົບຈາກຝົນຕົກໜັກນ້ຳຖ້ວມ

ສະຫຼຸບເມືອງບໍ່ແຕນ, ແຂວງ ໄຊຍະບູລີ ມີ 9 ບ້ານໄດ້ຮັບຜົນກະທົບຈາກຝົນຕົກໜັກນ້ຳຖ້ວມ ຈາກການເປີດເຜີຍຂອງເມືອງບໍ່ແຕນ ໃນວັນທີ 3 ສິງຫາ 2020 ນີ້ ໃຫ້ຮູ້ວ່າ: ຜົນກະທົບຈາກພາຍຸ ຊິນລາກູ ເຊິ່ງໄດ້ພັດຜ່ານຫຼາຍແຂວງໃນພາກເໜືອຂອງລາວເຮົາ ໃນລະຫວ່າງວັນທີ 2-3 ສິງຫາ 2020 ນີ້ ຢູ່ເມືອງບໍ່ແຕນ ກໍ່ໄດ້ຮັບອິດທິທົນຂອງພາຍຸດັ່ງກ່າວ ເຊິ່ງໄດ້ເຮັດໃຫ້ມີຝົນຕົກໜັກຕິດຕໍ່ກັນຫຼາຍວັນ.​

ມາໃນຕອນເຊົ້າວັນທີ 3 ສິງຫາ ໄດ້ເຮັດໃຫ້ເກີດມີນ້ຳໄຫຼຊຸ, ຖ້ວມບ້ານເຮືອນ, ຖ້ວມນາ, ຮົ້ວສວນຂອງພໍ່ແມ່ປະຊາຊົນຢູ່ໃນເມືອງບໍ່ແຕນ ຈຳນວນ 9 ບ້ານຄື: ບ້ານນາກອກ, ນາສ້ານ, ຕາລິ່ງ, ເມືອງຮຳ, ເໝືອງແຜ່, ບໍ່ສ້ານ, ນາບໍ່ນ້ອຍ, ຕົ້ນຕານ ແລະ ບ້ານໜອງຜັກບົ້ງ ເຮັດໃຫ້ເຄື່ອງໃຊ້ພາຍໃນເຮືອນ, ເຄື່ອງປູກຂອງຝັງ ລວມທັງສັດລ້ຽງຂອງປະຊາຊົນເສຍຫາຍເປັນຈຳນວນຫຼວງຫຼາຍ ໂດຍສະເພາະແມ່ນເຂົ້ານາທີ່ໄດ້ປັກດຳແລ້ວ ຖືກນ້ຳຖ້ວມເປັນບໍລິເວນກ້ວາງ.

ປັດຈຸບັນຄະນະພັກ, ອົງການປົກຄອງເມືອງ ພວມລົງໃກ້ຊິດຕິດຕາມຢູ່ແຕ່ລະເຂດ ແລະ ນຳເອົາກຳລັງທະຫານລົງເຄື່ອນຍ້າຍເຄື່ອງໃຊ້ທີ່ຈຳເປັນຂຶ້ນເກັບມ້ຽນໄວ້ບ່ອນສູງທີ່ມີຄວາມປອດໄພ ແລະ ຂະແໜງການທີ່ກ່ຽວຂ້ອງພວມລົງຕິດຕາມເກັບກຳຂໍ້ມູນຄອບຄົວທີ່ຖືກຜົນກະທົບຈາກໄພນ້ຳຖ້ວມ ແລະ ຜົນເສຍຫາຍເບື້ອງຕົ້ນຢູ່ແຕ່ລະເຂດ ແລະ ລະດັບນ້ຳກໍ່ໄດ້ເລີ່ມຫຼຸດລົງ.