ໃຊ້ເວລາປະມານ 300 ປີໃນການເກັບກູ້ລະເບີດບໍ່ທັນແຕກປາງສົງຄາມໃນ ສປປ ລາວ

ສະຫຼຸບວ່າຍັງມີລະເບີດຕົກຄ້າງໃນລາວອີກເຖິງ 80 ລ້ານລູກ ຊື່ງຈະຕ້ອງໃຊ້ເງີນບໍ່ຫນ້ອຍກວ່າ 24 ຕື້ດອລລາ ຈື່ງຈະເກັບກູ້ໃຫ້ຫມົດໄປໄດ້ ຂະນະທີ່ລັດຖະບານລາວບໍ່ມີງົບປະມານໃນສ່ວນນີ້ ຕ້ອງເພິ່ງພາຄວາມຊ່ວຍເຫຼືອຈາກຕ່າງປະເທດເລື້ອຍມາ ແຕ່ກໍ່ໄດ້ຮັບການຊ່ວຍເຫຼືອບໍ່ເກີນ 30 ລ້ານດອລລາໃນແຕ່ລະປີ ປະເມີນວ່າ ຫາກການຊ່ວຍເຫຼືອໃນລະດັບນີ້ ຈະຕ້ອງໃຊ້ເວລາບໍ່ຫນ້ອຍກວ່າ 300 ປີ ຈື່ງສາມາດເກັບກູ້ UXO ໄດ້ທັງຫມົດ

ອົງການເກັບກູ້ລະເບີດໃນລາວເວົ້າວ່າ ປະມານ 30% ຂອງ ຈຳນວນລູກລະເບີດ ທີ່ຖິ້ມໃສ່ລາວ ນັ້ນຍັງບໍ່ແຕກ ເຮັດໃຫ້ເກີດ ບັນຫາການ ສູນເສຍຊີວິດ ໄດ້ຮັບບາດເຈັບ ແລະສ້າງ ຄວາມທຸກຍາກ ໃຫ້ແກ່ ປະຊາຊົນລາວ ໃນເຂດ ຊົນນະບົດ ຮອດທຸກມື້ນີ້ ລູກລະເບີດທີ່ບໍ່ທັນແຕກ ມີຫລາຍຂະຫນາດ ແລະຫລາຍຊະນິດ ຊະນິດທີ່ໂດງດັງ ແລະຂ້າຄົນລາວ ຫລາຍກວ່າຫມູ່ ກໍແມ່ນລູກ ບອມບີ ຫລືລະເບີດລູກຫວ່ານ ທີ່ກະຈາຍໄປທົ່ວ ໃນຫລາຍພື້ນທີ່ ໃນເຂດ 9 ແຂວງຂອງລາວ ໃນນັ້ນ ຮ່ວມເຖິງ ແຂວງຜົ້ງສາລີ ຊຳເຫນືອ ຊຽງຂວາງ ສະຫວັນນະເຂດ ອັດຕະປື ເຊກອງ ແລະສາລະວັນ.

ອົງການເກັບກູ້ລະເບີດແຫ່ງຊາດລາວ (UXO-LAO) ລາຍງານວ່າຊ່ວງປີ 1997 – 2018 ສາມາດເກັບກູ້ລະເບີດຕົກຄ້າງ (Unexploded Ordnance) ໃນລາວທີ່ອາເມຣິກາໄດ້ຖິ້ມເອົາໄວ້ໃນລາວ ໃນຊ່ວງສົງຄາມຫວຽດນາມ ແລະສົງຄາມລັບໃນລາວຫລືສົງຄາມກາງເມືອງລາວ ໄດ້ໃນພື້ນທີ່ 380 ກິໂລແມັດຕາແມັດ ແລະທຳລາຍລະເບີດບໍ່ທັນແຕກໄດ້ 1.5 ລ້ານລູກທີ່ຄິດເປັນ 1.85% ຂອງລະເບີດທັງຫມົດທີ່ຕົກຄ້າງໃນລາວ

ສື່ຕ່າງປະເທດລາຍງານເມື່ອບໍ່ດົນມານີ້ວ່າ: ປະເທດລາວ ແຜ່ນດິນທີ່ລະເບີດລົງຫລາຍທີ່ສຸດໃນໂລກ ລະຫວ່າງປີ 1964 – 1973 ອາເມຣິກາໄດ້ມີການຖິ້ມລະເບີດແບບປູພົມທີ່ລາວເປັນປະລິມານທີ່ຫລາຍກວ່າ 2 ລ້ານໂຕນ. ລາວເປັນປະເທດທີ່ຖືກລະເບີດຫລາຍທີ່ສຸດໃນໂລກ ໃນຊ່ວງນັ້ນ ທຸກໆ ນາທີ ຈະມີລະເບີດລົງ 8 ລູກ

ເປັນເວລາສິບປີຂອງສົງຄາມຫວຽດນາມ ແລະສົງຄາມກາງເມືອງລາວຫລືສົງຄາມລັບໃນລາວຂອງອາເມຣິກາ ເຮືອບິນອາເມຣິກາບິນໄປຖິ້ມລະເບີດທີ່ລາວເຖິງ 580.344 ຖ້ຽວ ຖິ້ມລະເບີດ 260 ລ້ານລູກ ຄິດເປັນລະເບີດເຖິງ 2 ລ້ານໂຕນທັງພາກເຫນືອ ແລະພາກໃຕ້ຂອງລາວ ເພື່ອຕໍ່ສູ້ກັບຄອມມິວນິສລາວ ແລະຫວຽດນາມ ແລະເພື່ອຊ່ວຍເຫຼືອລັດຖະບານລາຊະອານາຈັກລາວທີ່ອາເມຣິກາໃຫ້ການສະຫນັບສະຫນູນຢູ່