ສາເຫດຂອງອຸບັດຕິເຫດແມ່ນຍ້ອນດື່ມສິ່ງມຶນເມົາ

ອຸບັດຕິເຫດໃນປີ 2020 ທີ່ເກີດຂຶ້ນບົນທ້ອງຖະໜົນພາຍໃນແຂວງຫຼວງນໍ້າທາ ສ່ວນຫຼາຍແມ່ນດື່ມສິ່ງມຶນເມົາແລ້ວຂັບຂີ່ລົດໄວເກີນກຳນົດ 337 ຄັ້ງ, ບໍ່ປ່ອຍສິດ 47 ຄັ້ງ, ແຊງບໍ່ຮັບປະກັນ 13 ຄັ້ງ ແລະ ປ່ຽນທິດທາງ 11 ຄັ້ງ ເຊິ່ງທຽບໃສ່ປີ 2019 ມີອຸບັດຕິເຫດເພີ່ມຂຶ້ນ 42 ຄັ້ງ. ພັທ ລາດສະຫວ່າງ ປຣະຈິດທຳ ຫົວໜ້າພະແນກຕຳຫຼວດຈະລາຈອນ ປກສ ແຂວງຫຼວງນໍ້າທາ ໃຫ້ຮູ້ວ່າ:

ໃນ 1 ປີຜ່ານມາ, ໄດ້ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະ ເພື່ອເຮັດໃຫ້ສັງຄົມມີຄວາມເປັນລະບຽບຮຽບຮ້ອຍຕາມທ້ອງຖະໜົນຫຼວງ, ຫຼຸດຜ່ອນອຸບັດຕິເຫດຈາກການຈະລາຈອນ ໂດຍການນຳເອົາກົດລະບຽບການສັນຈອນ ລົງໂຄສະນາເຜີຍແຜ່ ພ້ອມທັງສົມທົບກັບພາກສ່ວນທີ່ກ່ຽວຂ້ອງ; ເຊິ່ງເຮັດດ້ວຍຫຼາຍຮູບແບບຫຼາຍວິທີການ ນັບແຕ່ໝູ່ບ້ານ, ປະຊາຊົນ, ໂຮງຮຽນ, ໂຮງໝໍ, ສຳນັກງານອົງການ

ແລະ ອື່ນໆ ເພື່ອເຮັດໃຫ້ຜູ້ໃຊ້ລົດ-ໃຊ້ຖະໜົນ ກຳໄດ້ກົດລະບຽບການສັນຈອນ, ເຫັນໄດ້ຜົນເສຍຫາຍທາງດ້ານສຸຂະພາບຊີວິດ ແລະ ຊັບສິນຢ່າງມະຫາສານ. ແນວໃດກໍຕາມ, ຍັງມີພະນັກງານ, ປະຊາຊົນ, ນ້ອງນັກຮຽນຈຳນວນໜຶ່ງ ຍັງຝ່າຝືນກົດລະບຽບການສັນຈອນ, ເຊິ່ງເປັນສາເຫດພາໃຫ້ເກີດອຸບັດຕິເຫດຕາມທ້ອງຖະໜົນຫຼວງ. ທົ່ວແຂວງຫຼວງນໍ້າທາ ມີອຸບັດຕິເຫດເກີດຂຶ້ນທັງໝົດ 408 ຄັ້ງ.

ໃນນີ້, ເກີດຢູ່ເມືອງຫຼວງນໍ້າທາ 87 ຄັ້ງ, ເມືອງວຽງພູຄາ 80 ຄັ້ງ, ເມືອງສິງ 62 ຄັ້ງ, ເມືອງລອງ 30 ຄັ້ງ ແລະ ເມືອງນາແລ 4 ຄັ້ງ; ມີພາຫະນະເປ່ເພເລັກນ້ອຍ 464 ຄັນ, ເປ່ເພສົມຄວນ 233 ຄັນ ແລະ ໃຊ້ການບໍ່ໄດ້ 21 ຄັນ ເຊິ່ງສ້າງຄວາມເສຍຫາຍທັງໝົດ ປະມານ 4.446.370.000 ກີບ. ມີຜູ້ໄດ້ຮັບບາດເຈັບເລັກໜ້ອຍ 414 ຄົນ ຍິງ 92 ຄົນ, ບາດເຈັບສົມຄວນ 158 ຄົນ ຍິງ 21 ຄົນ, ສາຫັດ 49 ຄົນ ຍິງ 9 ຄົນ,

ເສຍຊີວິດ 35 ຄົນ ຍິງ 12 ຄົນ; ຜູ້ເຂົ້າຮ່ວມກໍ່ໃຫ້ເກີດອຸບັດຕິເຫດລວມມີປະຊາຊົນ 149 ຄົນ, ນັກຮຽນ-ນັກສຶກສາ 130 ຄົນ ແລະ ພະນັກງານ-ລັດຖະກອນ, ນັກທຸລະກິດ, ຄ້າຂາຍ ແລະ ນັກຂັບຂີ່ອີກຈຳນວນໜຶ່ງ. ເຈົ້າໜ້າທີ່ ໃຫ້ຮູ້ຕື່ມວ່າ: ເພື່ອເຮັດໃຫ້ການສັນຈອນທາງບົກເຂົ້າສູ່ລະບຽບ ທັງເຮັດໃຫ້ສະພາບສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ.

ສະນັ້ນ, ຈຶ່ງຮຽກຮ້ອງເຖິງ ພະນັກງານ-ລັດຖະກອນ, ພໍ່-ແມ່ປະຊາຊົນບັນດາເຜົ່າ, ພໍ່ຄ້າຊາວຂາຍ ຕະຫຼອດຮອດນ້ອງນັກຮຽນ ຜູ້ໃຊ້ລົດ-ໃຊ້ຖະໜົນ ຈົ່ງປະຕິບັດກົດລະບຽບການສັນຈອນຕາມທ້ອງຖະໜົນ ໃຫ້ມີຄວາມປອດໄພ

ແລະ ໃຫ້ກຽດເຊິ່ງກັນແລະກັນ ໂດຍສະເພາະ ການຂັບຂີ່ລົດຈັກ ແມ່ນໃຫ້ໃສ່ໝວກກັນກະທົບທັງຜູ້ຂັບຂີ່ ແລະ ຜູ້ຊ້ອນທ້າຍ; ສຳລັບຜູ້ປົກຄອງ ແມ່ນໃຫ້ໃກ້ຊິດສຶກສາອົບຮົມລູກຫຼານ ໃນການໃຊ້ລົດ-ໃຊ້ຖະໜົນ. ທັງນີ້, ກໍເພື່ອຮັບປະກັນຊີວິດ ແລະ ຊັບສິນຂອງທ່ານ.