ປະຊາຊົນອາເມຣິກາເສຍຊີວິດ 1,000 ຄົນຕໍ່ມື້ຍ້ອນພະຍາດ ໂຄວິດ-19

ສຳນັກຂ່າວຕ່າງປະເທດລາຍງານ ເມື່ອວັນທີ່ 2 ເມສາ 2020 ວ່າ ສູນຂໍ້ມູນກ່ຽວກັບເຊື້ອໄວຣັດໂຄໂຣນາຂອງມະຫາວິທະຍາໄລຈອນ ຮ໊ອບກິນສລາຍງານສະຖິຕິກ່ຽວກັບການແຜ່ລະບາດຂອງ ໂຄວິດ-19 ວ່າສະຖິຕິຜູ້ເສຍຊີວິດຂອງອາເມຣິກາໃນຮອບ 24 ຊົ່ວໂມງຫລ້າສຸດ ຈົນເຖິງເວລາ 20:30 ໂມງ ຕາມເວລາທ້ອງຖິ່ນຂອງວັນພະຫັດ (07:30 ໂມງ ວັນສຸກຕາມເວລາທ້ອງຖິ່ນໃນປະເທດລາວ) ຢູ່ທີ່ 1.169 ຄົນ ຄືສະຖິຕິລາຍວັນສູງທີ່ສຸດ

ຂະນະທີ່ສະຖິຕິຜູ້ເສຍຊີວິດສະສົມຈາກໂຄວິດ-19 ໃນອາເມຣິກາເພີ່ມເປັນຢ່າງຫນ້ອຍ 5.911 ຄົນ ພົບຫລາຍທີ່ສຸດໃນລັດນິວຢອກ 2.538 ຄົນ ດ້ານຈຳນວນຜູ້ຕິດເຊື້ອສະສົມໃນປະເທດເພີ່ມເປັນຢ່າງຫນ້ອຍ 244.678 ຄົນ ແລະປິ່ນປົວດີແລ້ວ 9.058 ຄົນ ດ້ານປະທານາທິບໍດີໂດນັລ ທຣັມ ຍັງຄົງປະເຊີນກັບຄຳຖາມກ່ຽວກັບປະເດັນຄວນໃຫ້ຊາວອາເມຣິກາໃສຜ້າປິດປາກອານາໄມຫລືບໍ່ເມື່ອຢູ່ນອກທີ່ພັກອາໄສ

ແຕ່ໃນຄັ້ງນີ້ຄຳຕອບຂອງຜູ້ນຳອາເມຣິກາຄື ທຸກຄົນສາມາດໃສ່ຜ້າປິກອານາໄມໄດ້ຫາກຕ້ອງການ ຊື່ງມີການວິເຄາະວ່າທຣັມອາດປ່ຽນມຸມມອງຂອງຕົວເອງຫລືບໍ່ ຫລັງກ່ອນຫນ້ານັ້ນຢືນຢັນວ່າບຸກຄະລາກອນການແພດ ແລະຜູ້ຕິດເຊື້ອເທົ່ານັ້ນຕ້ອງໃສ່ຫນ້າກາກອານາໄມ ນອກຈາກນີ້ ຜູ້ນຳອາເມຣິກາກ່າວອີກວ່າ ທ່ານໄດ້ໃຊ້ອຳນາດຕາມຄວາມໃນກົດຫມາຍການຜະລິດເພື່ອປ້ອງກັນ ໃນການໃຫ້ບໍລິສັດ 3 ເອັມ ຜູ້ປະກອບການດ້ານຄວາມປອດໄພໃນວົງການອຸດສາຫະກຳ ແລະການແພດ

ຊື່ງມີສຳນັກງານໃຫ່ຍຢູ່ທີ່ເມືອງເມເປີ້ລວູ້ດ ໃນລັດມິນນິໂຊຕາ ເພີ່ມການຜະລິດຫນ້າກາກອານາໄມໂດຍສະເພາະຫນ້າກາກປ້ອງກັນແບບເອັນ 95 ແລະອຸປະກອນການແພດທີ່ຈຳເປັນສຳລັບພາລະກິດສູ້ກັບໂຄວິດ-19 ທັງນີ້ 3 ເອັມ ຍັງບໍ່ສະແດງທ່າທີຢ່າງເປັນທາງການຕໍ່ຄຳສັ່ງດັ່ງກ່າວ ແຕ່ກ່ອນຫນ້ານັ້ນບໍ່ດົນ ທ່ານໄມຄ ໂຣມັນປະທານຄະນະເຈົ້າຫນ້າທີ່ບໍລິຫານ (ຊີອີໂອ) ຂອງ 3 ເອັມ ກ່າວວ່າບໍລິສັດໄດ້ເພີ່ມການລົງທືນໃນສາຍງານການຜະລິດຫນ້າກາກອານາໄມ

ເພື່ອຍົກລະດັບສັກກະຍາພາບຂອງການຜະລິດສິນຄ້າໃຫ້ໄດ້ບໍ່ຕ່ຳກວ່າ 2.000 ລ້ານອັນພາຍໃນອີກ 12 ເດືອນຂ້າງຫນ້າຊື່ງຫນ້າຈະພຽງພໍຕໍ່ອຸປະສົງທົ່ວໂລກໃນລະດັບຫນື່ງ ໃນສ່ວນຂອງຄວາມຕ້ອງການພາຍໃນປະເທດໂດຍສະເພາະຫນ້າກາກເອັນ 95 ນັ້ນ ທ່ານໂຣມັນກ່າວວ່າຈະເພີ່ມການຜະລິດອີກ 40% ເປັນເດືອນລະ 50 ລ້ານອັນໂດຍປະມານ ໃຫ້ໄດ້ພາຍໃນເດືອນມິຖຸນານີ້