ຊາວສວນຢາງພາລາເມືອງລ້ອງຊານກຳລັງມີລາຍຮັບຫຼາຍ

ປະຊາຊົນເມືອງລ້ອງຊານ ແຂວງໄຊສົມບູນໂດຍສະເພາະຊາວສວນຢາງ ໄດ້ມີລາຍຮັບທີ່ໝັ້ນຄົງຈາກການຜະລິດເປັນສິນຄ້າສົ່ງອອກ ຊຶ່ງພົ້ນເດັ່ນແມ່ນການປາດຢາງພາລາໂດຍປີຜ່ານມາ, ສາມາດສ້າງລາຍຮັບກວ່າ 7 ຕື້ກີບ ແລະ ນີ້ໄດ້ກາຍເປັນສ່ວນສຳຄັນຕໍ່ການແກ້ໄຂຄວາມທຸກຍາກຂອງປະຊາ ຊົນທີ່ນັບມື້ຫລຸດລົງ. ທ່ານ ພຸດຊົ່ງ ຕົງນາມະວົງ ຫົວໜ້າຫ້ອງການກະສິກຳ ແລະ ປ່າໄມ້ເມືອງລ້ອງຊານແຂວງໄຊສົມບູນ ກ່າວວ່າ: ເພື່ອ​ຈັດ​ຕັ້ງ​ປະຕິບັດ​ວຽກ​ງານ​ຕ່າງໆ​ທີ່​ວາງ​ໄວ້​ໃຫ້​ສຳ​ເລັດ ​ແລະ ບັນລຸ​ຕາມ​ເປົ້າ​ໝາຍ​ນັ້ນ, ພວກເຮົາ ​ໄດ້ເອົາໃຈໃສ່ປະສານ​ສົມທົບນຳພາ​ກສ່ວນ​​ກ່ຽວຂ້ອງຕາມຄວາມ​ຮັບຜິດຊອບສົ່ງຜົນເຮັດໃຫ້ປີຜ່ານມາ, ການຜະລິດເປັນສິນຄ້າທົ່ວເມືອງຂະຫຍາຍຕົວ ກາຍເປັນທ່າແຮງແກ້ໄຂຄວາມທຸກຍາກທີ່ນັບມື້ຫລຸດລົງ

ຊຶ່ງສິ່ງພົ້ນເດັ່ນໄດ້ແກ່ຂະບວນການປາດຢາງພາລາໂດຍໄດ້ຮັບຜົນຜະລິດກວ່າ 1,3 ລ້ານກິໂລໃນເນື້ອທີ່ກວ່າ 7.600 ເຮັກຕາ ສາມາດສ້າງລາຍຮັບໃຫ້ຊາວສວນໄດ້ກວ່າ 7 ຕື້ກີບ. ນອກນີ້,​ ປະຊາຊົນຍັງໄດ້ປູກມັນຕົ້ນ ແລະ ພືດຜັກຕ່າງໆເປັນສິນຄ້າສ້າງລາຍຮັບໄດ້ຫລາຍ 10 ຕື້ກີບ. ຂະ ນະທີ່ໄດ້ສົ່ງອອກງົວ 140 ໂຕ ແລະ ຄວາຍ 96 ໂຕໄປຂາຍຕ່າງເມືອງ ແລະ ຕ່າງແຂວງ. ຫົວໜ້າຫ້ອງການກະສິກຳ ແລະ ປ່າໄມ້ ເມືອງລ້ອງຊານ ກ່າວຕື່ມວ່າ: ໃນການຜະລິດເປັນສິນ ຄ້າ ແລະ ການສ້າງເສດຖະກິດຄອບຄົວນັ້ນກໍ່ໄດ້ສົ່ງເສີມຢ່າງຕັ້ງໜ້າ ແລະ ສາມາດສ້າງຄອບຄົວຕົວລ້ຽງປາ 3 ຄອບຄົວ, ລ້ຽງໄກ່ພັນໄຂ່ 2 ຄອບຄົວ, ກຸ່ມລ້ຽງໝູພັນ ແລະ ລ້ຽງງົວ 2 ຄອບຄົວ ຊຶ່ງສາ ມາດຕອບສະໜອງໃຫ້ແກ່ການບໍລິໂພກພາຍໃນເມືອງໄດ້ໂດຍພື້ນຖານ.