ແຂວງບໍ່ແກ້ວປະຕິບັດຫລາຍມາດຕະການເພື່ອສະກັດກັ້ນພະຍາດໂຄວິດ19

ແຂວງບໍ່ແກ້ວ ສຸມໃສ່ຈັດຕັ້ງປະຕິບັດຫລາຍມາດຕະການສຳຄັນ ເພື່ອສະກັດກັ້ນການລະບາດຂອງພະຍາດໂຄວິດ19 ເປັນຕົ້ນປິດການສັນຈອນທາງເຮືອ ຈາກບ້ານມອມໄປທາງເໜືອທັງໝົດ, ຈັດກໍາລັງເຈົ້າໜ້າທີ່ຕິດຕາມກວດກາຕາມບໍລິເວນຊາຍແດນປ້ອງກັນການລັກລອບເຂົ້າ-ອອກເມືອງແບບຜິດກົດໝາຍ ພ້ອມທັງຈັດລະບຽບການເຄື່ອນຍ້າຍແຮງງານ ໂດຍສະເພາະໄລຍະສະຫລອງບຸນປີໃໝ່ຂອງຊາວຈີນ ແລະຊາວວຽດນາມທີ່ມີຈຸດປະສົງເດີນທາງກັບຄືນປະເທດຢ່າງເຂັ້ມງວດ. ໂອກາດເຂົ້າຮ່ວມ ແລະປະກອບຄໍາຄິດຄໍາເຫັນຕໍ່ກອງປະຊຸມວຽກງານສາທາລະນະສຸກທົ່ວປະເທດ ຄັ້ງທີ VIII ຈັດຂຶ້ນຢູ່ນະຄອນຫລວງວຽງຈັນ ລະຫວ່າງວັນທີ 28-29 ມັງກອນ 2021 ທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ແຈ້ງໃຫ້ຮູ້ວ່າ:

ບໍ່ແກ້ວເປັນແຂວງນ້ອຍ ແຕ່ມີຊາຍແດນຕິດຈອດກັບຫລາຍປະເທດ ທີ່ມີການລະບາດພະຍາດໂຄວິດ19 ທັງມີເຂດເສດຖະກິດພິເສດ 3 ລ່ຽມຄໍາ ເປັນເຂດພັດທະນາຄົບວົງຈອນ ທີ່ເປັນແຫລ່ງທ່ອງທ່ຽວສຳຄັນທີ່ໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ ແລະຕ່າງປະເທດເຂົ້າໄປທ່ຽວຊົມ ແລະ ມີແຮງງານເຂົ້າ-ອອກຈໍານວນຫລວງຫລາຍ ຈຶ່ງເຮັດໃຫ້ການຄຸ້ມຄອງດ້ານສາທາລະນະສຸກມີຄວາມຫຍຸ້ງຍາກ, ແຕ່ເຖິງແນວໃດກໍຕາມອົງການປົກຄອງແຂວງໄດ້ອອກນິຕິກໍາ ແລະ ວາງມາດຕະການຕ່າງໆຫລາຍຢ່າງ ເພື່ອສະກັດກັ້ນການລະບາດຂອງພະ ຍາດໂຄວິດ19 ໂດຍສະເພາະໄລຍະສະຫລອງບຸນປີໃໝ່ຂອງຊາວຈີນ ແລະ ຊາວວຽດນາມ ທີ່ມີຈຸດ ປະສົງເດີນທາງກັບຄືນປະເທດ, ເຊິ່ງສ້າງຄວາມຫຍຸ້ງຍາກໃຫ້ເຈົ້າໜ້າທີ່ຂອງແຂວງໃນການຄຸ້ມຄອງຄົນຕ່າງດ້າວ, ນອກຈາກນີ້ຍັງໄດ້ປະສານສົມທົບກັບແຂວງຫລວງນໍ້າທາ ໃນການປະກອບເອກສານກ່ຽວກັບການນໍາສົ່ງແຮງງານເຫລົ່ານັ້ນ ໃຫ້ຖືກຕ້ອງຕາມລະບຽບຫລັກການ ຈຶ່ງສາມາດອະນຸຍາດໃຫ້ເດີນທາງກັບຄືນປະເທດໄດ້ .

ຮອງເຈົ້າແຂວງບໍ່ແກ້ວ ໃຫ້ຮູ້ຕື່ມວ່າ: ນອກຈາກວຽກງານສະກັດກັ້ນ ແລະປ້ອງກັນພະຍາດໂຄວິດ19ແລ້ວ ອົງການປົກຄອງແຂວງຍັງສຸມໃສ່ພັດທະນາພື້ນຖານໂຄງລ່າງດ້ານສາທາລະນະສຸກຢ່າງຕໍ່ເນື່ອງ ປັບປຸງໂຮງໝໍແຂວງໃຫ້ໄດ້ມາດຕະຖານ ສາມາດຜ່າຕັດລົງເລິກແຕ່ລະສາຂາ ເປັນຕົ້ນຜ່າຕັດຜ່ານທໍ່ ພ້ອມກັນນັ້ນກະຊວງສາທາລະນະສຸກຍັງໄດ້ສະໜອງເຄື່ອງຟອກໄຂ່ຫລັງໃຫ້ 2 ເຄື່ອງ, ໃນໄລຍະການລະບາດຂອງພະຍາດໂຄວິດການນໍາຂອງແຂວງສະໜອງໃຫ້ຕື່ມອີກ 3 ເຄື່ອງ ລວມເປັນ 5 ເຄື່ອງ. ພ້ອມທັງສະໜອງອຸປະກອນດ້ານການແພດໃຫ້ໂຮງໝໍຊຸມຊົນ 2 ແຫ່ງ ຄື: ຢູ່ເມືອງເມີງ ແລະເມືອງຜາອຸດົມ ແນໃສ່ເຮັດໃຫ້ຕາໜ່າງການບໍລິການດ້ານສາທາລະນະສຸກພາຍໃນແຂວງຮັບໃຊ້ປະຊາຊົນຢ່າງທົ່ວເຖິງ.