ແຂວງເຊກອງຈະກໍ່ສ້າງໂຮງງານຜະລິດໄຟຟ້າດ້ວຍຖ່ານຫີນ

ອີງຕາມຂໍ້ມູນຈາກກະຊວງພະລັງງານ ແລະ ບໍ່ແຮ່ໃຫ້ຮູ້ວ່າ: ໂຮງງານໄຟຟ້າຖ່ານຫີນ 2 ແຫ່ງທີ່ ເມືອງກະລຶມ ແລະ ເມືອງ ລະມາມ ແຂວງເຊກອງຈະເລີ່ມລົງມືກໍ່ສ້າງໃນທ້າຍປີ 2021 ແລະ ຈະເລີ່ມສົ່ງອອກຂາຍກະແສໄຟຟ້າໃຫ້ລັດຖະບານ ກໍາປູເຈຍ ໃນປີ 2025 ທີ່ຈະມາເຖິງນີ້. ທ່ານດາວວົງ ພອນແກ້ວ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ກ່າວຕໍ່ທີມງານວຽງຈັນທາຍ ເມື່ອບໍ່ດົນມານີ້ກ່ຽວກັບໂຮງານໄຟຟ້າ 2 ແຫ່ງດັ່ງກ່າວວ່າ: ໂຮງງານໄຟຟ້າຖ່ານຫີນ ທີ່ເມືອງກະລຶມ ແລະ ເມືອງລະມາມ ຖືວ່າເປັນໂຄງການໃຫຍ່ ຊຶ່ງມີອາຍຸສໍາປະທານ 25 ປີ

ໂດຍຈະຂຸດຄົ້ນຖ່ານຫີນພາຍໃນແຂວງເຊກອງເປັນເຊື້ອເພີງໃນການຜະລິດກະແສໄຟຟ້າ. ໂຮງງານແຫ່ງທີ 1 ມີກໍາລັງຕິດຕັ້ງສູງເຖິງ 1.800 ເມກາວັດ ຊຶ່ງຕັ້ງຢູ່ເມືອງກະລຶມ ໂດຍແມ່ນກຸ່ມບໍລິສັດພອນສັກເປັນຜູ້ລົງທຶນ ໂດຍມີມູນຄ່າກໍ່ສ້າງປະມານ 3-4 ຕື້ໂດລາ ລວມທັງການກໍ່ສ້າງສາຍສົ່ງທີ່ມີຄວາມຍາວ 200 ກິໂລແມັດຈາກໂຮງງານ ຫາຊາຍແດນກໍາປູເຈຍ ແລະ ໂຮງງານຫຼັງທີ 2 ຢູ່ ເມືອງລະມາມ ແມ່ນການລົງທຶນຂອງນັກລົງທຶນຈີນ ມີກໍາລັງຕິດຕັ້ງປະມານ 700 ເມກາວັດ ຊຶ່ງມີມູນຄ່າການລົງທຶນຫຼາຍກວ່າ 1 ຕື້ໂດລາ.

ຕາມແຜນແລ້ວ ໂຮງງານທັງສອງແຫ່ງຈະສົ່ງໄຟຟ້າຂາຍໃຫ້ສະເພາະປະເທດກໍາປູເຈຍໃນປີ 2025 ທີ່ຈະມາເຖິງນີ້. ທ່ານເຫຼັກໄຫຼ ສີວິໄລ ເຈົ້າແຂວງເຊກອງ ກໍ່ໄດ້ກ່າວຕໍ່ທີມງານວຽງຈັນທາຍເມື່ອບໍ່ດົນມານີ້ກ່ຽວກັບ ໂຮງງານໄຟຟ້າຖ່ານຫີນ 2 ແຫ່ງດັ່ງກ່າວວ່າ: ແຂວງເຊກອງມີທ່າແຮງໃນການຜະລິດໄຟຟ້າເພື່ອສົ່ງອອກ ແລະ ໄດ້ກາຍເປັນການສ້າງລາຍຮັບໃຫ້ແກ່ທ້ອງຖິ່ນ ແລະ ຊຸກຍູ້ການເຕີບໂຕເສດຖະກິດຂອງແຂວງ ແລະ ຊ່ວຍປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.