ລົດ 10​ ລໍ້ປະທະລົດປຣາໂດມີຄົນບາດເຈັບ

ອຸປະຕິເຫດຮຸນແຮງ ລົດ 10​ ລໍ້ ປະທະລົດປຣາໂດ ເຫດເກີດວັນທີ 5 ກຸມພາ 2021 ເວລາ 13:30 ນາທີ ທີ່ ສີ່ແຍກໂຊກນ້ອຍ ເສັ້ນທາງ 450 ປີ ເມືອງໄຊເສດຖາ ນະຄອນຫລວງວຽງຈັນ. ເບື້ອງຕົ້ນມີຜູ້ບາດເຈັບ 5 ຄົນ, ຍິງ 1 ຊາຍ 3 ເດັກນ້ອຍ 1 ຄົນ.​(ຜູ້ຂີ່ລົດປຣາໂດ)​ ປັດຈຸບັນ, ໜ່ວຍກູ້ໄພ 1623 ໄດ້ຊ່ວຍເອົາຄົນເຈັບສົ່ງໂຮງໝໍ 150 ຕຽງແລ້ວ.

ສ່ວນສາເຫດທີ່ແທ້ຈິງເຈົ້າໜ້າທີ່ພວມເລັ່ງສືບສວນ ລໍຕິດຕາມຕອນຕໍ່ໄປ. ຫຼ້າສຸດເພຈໜ່ວຍກູ້ໄພ 1623 ໄດ້ໂພສວ່າ ວັນທີ 5/2/2021 ເວລາ 13:13 ໂມງ. ໜ່ວຍກູ້ໄພມູນນິທິຊ່ວຍເຫຼືອຄົນທຸກຍາກແຫ່ງ ສ ປປ ລາວ ໄດ້ຮັບແຈ້ງເຫດເຂົ້າເບີໂທສຸກເສີນ 1623 ວ່າມີເຫດລົດໃຫຍ່ຕຳກັບລົດບັນທຸກດິນ. +ຈຸດເກີດເຫດແມ່ນບ້ານເສັ້ນທາງ 450 ປີ (ເຂດບ້ານໂຊກນ້ອຍ).

ໜ່ວຍກູ້ໄພອອກກວດສອບເຫດພົບຜູ້ບາດເຈັບ 3 ຄົນ: ຜູ້ທີ 1: ເພດຊາຍ ອາຍຸ 24 ປີ ອາຊີບປະຊາຊົນ ບ້ານບັງຮຸຍຊັງ ເມືອງອຸດົມໄຊ ແຂວງອຸດົມໄຊ. ອາການເບື້ອງຕົ້ນແມ່ນຄາງຈີກ,ເລືອດອອກຫູແລະຂາຫັກເບື້ອງຊ້າຍ. ຜູ້ທີ 2:ເພດຍິງ ອາຍຸ 21 ປີ ອາຊີບປະຊາຊົນ ບ້ານຫ້ວຍໄຊ ເມືອງອຸດົມໄຊ ແຂວງອຸດົມໄຊ. ອາການເບື້ອງຕົ້ນແມ່ນກະທົບຫົວ,ຄາງແຕກ(ສະລຶມສະລື).

ຜູ້ທີ 3:ເພດຊາຍ ອາຍຸ 26 ປີ ອາຊີບປະຊາຊົນ ບ້ານຫ້ວຍສັງ ເມືອງນາຫມໍ້ ແຂວງຫລວງນ້ຳທາ. ອາການເບື້ອງຕົ້ນແມ່ນກະທົບເອິກ,ມີບາດແຜຕາມຕົນໂຕເລັກນ້ອຍ. ດັ່ງນັ້ນທາງຫນ່ວຍກູ້ໄພ 1623 ຈຶ່ງໄດ້ທຳການປະຖົມພະຍາບານເບື້ອງຕົ້ນແລ້ວນຳສົ່ງໂຮງຫມໍ. (ຂ່າວກ່ອນໜ້ານີ້ລາຍງານວ່າມີຜູ່ບາດເຈັບ 5 ຄົນແຕ່ທາງໜ່ວຍກູ້ໄພ 1623 ໄດ້ລາຍງານວ່າມີຜູ່ບາດເຈັບພຽງ 3 ຄົນ)