ເສືອສວນສັດນິວຢອກຕິດເຊື້ອໂຄວິດ-19ໂຕທໍາອິດຂອງໂລກ

ເສືອໃນສວນສັດນິວຢອກໄດ້ຮັບການຢືນຢັນວ່າຕິດເຊື້ອໂຄວິດ-19 ເປັນໂຕທໍາອິດຂອງໂລກ ຂະນະທີ່ມີເສືອກັບສິງໃຫຍ່ອີກຫຼາຍໆໂຕທີ່ມີອາການຄ້າຍກັບອາການປ່ວຍຂອງໄວຣັສໂຕນີ້

ສຳນັກຂ່າວ ຊີເອັນເອັນ ລາຍງານໃນວັນທີ 5 ເມສາ 2020 ວ່າເສືອພັນມາລາຢັນເພດເເມ່ຊື່ “ນາເດຍ” ອາຍຸ 4 ປີ ທີ່ສວນສັດ “ບອງ” ຂອງສະມາຄົມອານຸລັກສັດປ່າໃນລັດນິວຢອກຂອງສະຫະລັດອາເມລິກາ ຖືກກວດພົບວ່າຕິດເຊື້ອໄວຣັສໂຄໂລນາສາຍພັນໃໝ່ທີ່ກໍ່ໃຫ້ເກີດພະຍາດໂຄວິດ-19 ໃນຄົນ ນັບເປັນເສືອໂຕທໍາອິດຂອງໂລກທີ່ຕິດເຊື້ອໄວຣັສຊະນິດນີ້

ຕາມຖະແຫຼງການຂອງສວນສັດບອງ ເຈົ້າຫນ້າທີ່ເກັບຕົວຢ່າງຈາກເສືອ ນາເດຍ ໄປກວດຫຼັງຈາກມັນກັບເສືອ ແລະ ສິງໃຫຍ່ໂຕອື່ນໆ ອີກ 5 ໂຕມີອາການໄອ, ຊຶ່ງເປັນໜຶ່ງໃນສັນຍານຂອງພະຍາດທາງເດີນຫາຍໃຈ ແຕ່ບໍ່ມີສັດໂຕອື່ນ ສະແດງອາການປ່ວຍໃນຕອນນີ້ ແລະ ຄາດວ່າເສືອທຸກໆໂຕຈະກັບມາຫາຍດີຄືເກົ່າ

“ເຖິງວ່າພວກມັນຈະມີກິນອາຫານຫຼຸດລົງບາງເທື່ອ ພວກແມວໃຫ່ຍໃນສວນສັດບອງ ກໍາລັງຟື້ນໂຕດີຂື້ນພາຍໃຕ້ການເບິ່ງແຍງຂອງສັດຕະວັດແພດ ແລະ ມີອາການຕື່ນໂຕ, ລ່າເລີງ ແລະ ມີຄວາມສະນິດກັບຜູ້ເບິ່ງແຍງພວກມັນອີກດ້ວຍ” ຖະແລງການຂອງທາງສວນສັດລະບຸ ແລະ ເສີມອີກວ່າ “ຍັງບໍ່ຊັດເຈນວ່າໄວຣັສຕົວນີ້ຈະເຮັດໃຫ້ເກີດອາການຫຍັງກັບເສືອເຫຼົ່ານີ້ ເພາະສັດຕ່າງສາຍພັນຈະມີປະຕິກິລິຍາກັບໄວຣັສສາຍພັນ ໃໝ່ແຕກຕ່າງກັນອອກໄປ”

ທັງນີ້ ຄາດວ່າເສືອນາເດຍກັບເສືອຕົວອື່ນໆ ຕິດເຊື້ອໄວຣັສໂຄໂຣນາຈາກໜຶ່ງໃນລູກຈ້າງຂອງສວນສັດທີ່ຕິດເຊື້ອໄວຣັສໂຕນີ້ແບບບໍ່ສະແດງອາການປ່ວຍ ໃນຂະນະທີ່ພວມເບິ່ງແຍງພວກມັນ ໂດຍເຫດການນີ້ເຮັດໃຫ້ສວນສັດບອງປະກາດຢຸດໃຫ້ບໍລິການມາຕັ້ງແຕ່ວັນທີ 16 ມີນາ 2020 ແລ້ວ. Cr: ໂທລະໂຄ່ງ