ຈີນ-ອາເມຣິກາ ຈະຮ່ວມມືກັນຕ້ານເຊື້ອໄວຣັສໂຄໂຣນາ

ທ່ານໂດນອລດ໌ ທຣຳ ໄດ້ກ່າວວ່າ: ສ.ອາເມຣິກາ ຈະສຸມທຸກຄວາມພະຍາຍາມເພື່ອສະໜັບສະໜູນ ສປ ຈີນໃນການຕ້ານກັບການແຜ່ລະບາດຂອງພະຍາດອັກເສບປອດຈາກໄວຣັສໂຄໂຣນາສາຍພັນໃໝ່ 2019. ຈີນໄດ້ສ້າງໂຮງໝໍສະເພາະຂຶ້ນໃນເວລາອັນສັ້ນທີ່ສຸດ, ເຊິ່ງເຮັດໃຫ້ຜູ້ຄົນໃນທົ່ວໂລກສະແດງຄວາມປະທັບໃຈຫຼາຍຕໍ່ເລື່ອງນີ້; ເຊິ່ງມັນສະແດງໃຫ້ເຫັນເຖິງຄວາມສາມາດດ້ານການຈັດຕັ້ງ ແລະ ການຮັບມືທີ່ດີຢ່າງເຕັມສ່ວນຂອງຈີນ. ພວກເຮົາເຊື່ອວ່າ ພາຍໃຕ້ການນຳພາຂອງທ່ານປະທານສີຈິ້ນຜິງ, ປະຊາຊົນຈີນຈະໄດ້ຮັບໄຊຊະນະໃນການຕ້ານກັບພະຍາດນີ້ຢ່າງບໍ່ຕ້ອງສົງໄສ. ສ.ອາເມຣິກາ ມີຄວາມເຊື່ອໝັ້ນຕໍ່ການພັດທະນາດ້ານເສດຖະກິດຂອງຈີນ. ສ.ອາເມຣິກາ ຈະມີທ່າທີສຸຂຸມໃນການຮັບມືກັບການແຜ່ລະບາດຂອງພະຍາດໃນຄັ້ງນີ້, ແລະ ຍິນດີຜ່ານຊ່ອງທາງຂອງສອງຝ່າຍ ກໍ່ຄື ອົງການອະນາໄມໂລກ ເພື່ອຮັກສາການຕິດຕໍ່ແລກປ່ຽນ ແລະ ການຮ່ວມມືກັບຈີນ.

ທ່ານສີຈິ້ນຜິງ ກໍ່ໄດ້ກ່າວເນັ້ນຕື່ມວ່າ: ຫວ່າງບໍ່ດົນມານີ້, ສປ ຈີນ ແລະ ສ.ອາເມຣິກາ ໄດ້ເຊັນສັນຍາດ້ານເສດຖະກິດ-ການຄ້າໄລຍະທີ 1; ເຊິ່ງການທີ່ ສປ ຈີນ ແລະ ສ.ອາເມຣິກາ ສາມາດບັນລຸການເຊັນສັນຍາແບບນີ້ ແມ່ນມີຜົນດີຕໍ່ຈີນ, ທັງມີຜົນດີຕໍ່ ສ.ອາເມຣິກາ ເຊັ່ນກັນ, ແລະ ທັງມີຜົນດີຕໍ່ສັນຕິພາບ ແລະ ຄວາມຈະເລີນຮຸ່ງເຮືອງຂອງໂລກອີກດ້ວຍ. ນີ້ສະແດງໃຫ້ເຫັນຢ່າງເຕັມສ່ວນວ່າ: ເຖິງວ່າ ສປ ຈີນ ແລະ ສ.ອາເມຣິກາ ຈະຍັງມີຄວາມເຫັນຂັດແຍ້ງກັນຈຳນວນໜຶ່ງກໍ່ຕາມ, ຂໍພຽງແຕ່ສອງຝ່າຍປະຕິບັດຕາມຫຼັກການທີ່ສະເໝີພາບກັນ ແລະ ເຄົາລົບເຊິ່ງກັນແລະກັນ, ກໍ່ຈະສາມາດຊອກເຫັນວິທີທາງແກ້ໄຂທີ່ສອງຝ່າຍຍອມຮັບໄດ້ໂດຍຜ່ານການປຶກສາຫາລືກັນ. ພວກເຮົາຫວັງວ່າ ສ.ອາເມຣິກາ ຈະສຸມຄວາມພະຍາຍາມເດີນໄປໃນທິດທາງດຽວກັນ, ຈັດຕັ້ງປະຕິບັດຄວາມເຫັນທີ່ເປັນເອກະພາບກັນທີ່ປະມຸກລັດສອງປະເທດໄດ້ຕົກລົງກັນ, ແລະ ຍຶດໝັ້ນທິດທາງລວມທີ່ໄດ້ປະສານງານກັນ, ຮ່ວມມືກັນ, ແລະ ມີຄວາມໝັ້ນທ່ຽງ, ຊຸກຍູ້ໃຫ້ການພົວພັນຈີນ-ອາເມຣິກາຂະຫຍາຍໄປໃນທິດທາງທີ່ຖືກຕ້ອງໃນປີໃໝ່ນີ້.

ໃນຕອນເຊົ້າວັນທີ 7 ກຸມພາ 2020ນີ້, ທ່ານສີຈິ້ນຜິງ, ປະທານປະເທດສປ ຈີນ ໄດ້ສົນທະນາທາງໂທລະສັບ ກັບ ທ່ານໂດນອລດ໌ ທຣຳ, ປະທານາທິບໍດີອາເມຣິກາ, ໂດຍທ່ານສີຈິ້ນຜິງໄດ້ກ່າວເນັ້ນວ່າ, ນັບແຕ່ເກີດການແຜ່ລະບາດຂອງ ພະຍາດອັກເສບປອດຈາກເຊື້ອໄວຣັສໂຄໂຣນາ ສາຍພັນໃໝ່ 2019 ເປັນຕົ້ນມາ, ລັດຖະບານ ແລະ ປະຊາຊົນຈີນ ໄດ້ສຸມທຸກຄວາມພະຍາຍາມເພື່ອຕ້ານກັບການແຜ່ລະບາດຂອງພະຍາດດັ່ງກ່າວ. ພວກເຮົາໄດ້ລະດົມຂົນຂວາຍທົ່ວປະເທດ ໃຫ້ວາງແຜນຢ່າງຮອບດ້ານ ແລະ ຮັບມືຢ່າງວ່ອງໄວ, ໃຊ້ມາດຕະການປ້ອງກັນ ແລະ ຄວບຄຸມທີ່ຮອບດ້ານ ແລະ ເຂັ້ມງວດທີ່ສຸດ. ວຽກງານທີ່ກ່ຽວຂ້ອງພວມໄດ້ຮັບປະສິດທິຜົນເທື່ອລະກ້າວ, ພວກເຮົາມີຄວາມໝັ້ນໃຈ ແລະ ຄວາມສາມາດຢ່າງເຕັມປ່ຽມທີ່ຈະເອົາຊະນະການແຜ່ລະບາດຂອງພະຍາດໃນຄັ້ງນີ້ໄດ້. ທ່ວງທ່າທີ່ເສດຖະກິດຈີນຈະຂະຫຍາຍຕົວໄປໃນທິດທາງທີ່ດີໃນໄລຍະຍາວນັ້ນຈະບໍ່ມີການປ່ຽນແປງ.

ທ່ານສີຈິ້ນຜິງ ໄດ້ຊີ້ອອກຕື່ມວ່າ: ສປ ຈີນບໍ່ພຽງແຕ່ປົກປ້ອງຄວາມປອດໄພດ້ານຊີິວິດ ແລະ ສຸຂະພາບທີ່ແຂງແຮງຂອງປະຊາຊົນຈີນເທົ່ານັ້ນ, ແຕ່ຍັງໄດ້ປົກປ້ອງຄວາມປອດໄພດ້ານຊີິວິດ ແລະ ສຸຂະພາບທີ່ແຂງແຮງຂອງປະຊາຊົນທົ່ວໂລກອີກດ້ວຍ. ພວກເຮົາໄດ້ຍຶດໝັ້ນໃນທ່າທີທີ່ເປີດເຜີຍ, ປອດໂປ່ງ ແລະ ຮັບຜິດຊອບ, ແຈ້ງສະພາບການຕໍ່ອົງການອະນາໄມໂລກ, ບັນດາປະເທດ ແລະ ເຂດແຄວ້ນທີ່ກ່ຽວຂ້ອງ ເຊິ່ງລວມທັງສະຫະລັດອາເມຣິກາຢ່າງທັນການ, ທັງເຊື້ອເຊີນຜູ້ຊ່ຽວຊານຂອງອົງການອະນາໄມໂລກ ແລະ ອົງການຈັດຕັ້ງສາກົນອື່ນໆ ໃຫ້ໄປສຳຫຼວດເບິ່ງຕົວຈິງຢູ່ເມືອງອູຮັ້ນ. ສປ ຈີນຢືນຢູ່ແນວໜ້າໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໃນຄັ້ງນີ້; ພວກເຮົາໄດ້ໃຊ້ມາດຕະການທີ່ມີປະສິດທິຜົນຢ່າງເຂັ້ມແຂງ ແລະ ທັນການ, ໄດ້ຮັບການຍອມຮັບ ແລະ ການຕີລາຄາສູງຈາກອົງການອະນາໄມໂລກ ກໍ່ຄື ຈາກນາໆຊາດ.

ທ່ານສີຈິ້ນຜິງ ຍັງໄດ້ຊີ້ອອກອີກວ່າ: ສປ ຈີນ ແລະ ສ.ອາເມລິກາ ໄດ້ຮັກສາການຕິດຕໍ່ແລກປ່ຽນກ່ຽວກັບການປ້ອງກັນ ແລະ ການຄວບຄຸມການແຜ່ລະບາດຂອງພະຍາດມາຕັ້ງແຕ່ຕົ້ນ. ຂ້າພະເຈົ້າຂໍຊົມເຊີຍທ່ານປະທານາທິບໍດີອາເມລິກາ ທີ່ຕີລາຄາຢ່າງຕັ້ງໜ້າມາຫຼາຍເທື່ອຕໍ່ວຽກງານປ້ອງກັນ ແລະ ຄວບຄຸມຂອງຈີນ, ຂອບໃຈຕໍ່ວົງການຕ່າງໆໃນສັງຄົມອາເມລິກັນທີ່ໄດ້ໃຫ້ການຊ່ວຍເຫຼືອມອບເຄື່ອງມືອຸປະກອນຕ່າງໆທີ່ຈຳເປັນແກ່ພວກເຮົາ. ການແຜ່ລະບາດຂອງພະຍາດຕິດແປດຕ້ອງໃຫ້ປະເທດຕ່າງໆຮ່ວມມືແກ້ໄຂ. ປະຈຸບັນ, ການປ້ອງກັນ ແລະ ຄວບຄຸມການແຜ່ລະບາດຂອງພະຍາດນີ້ແມ່ນຢູ່ໃນໄລຍະເວລາຫົວລ້ຽວຫົວຕໍ່, ອົງການອະນາໄມໂລກໄດ້ຮຽກຮ້ອງຫຼາຍເທື່ອໃນທາງວິຊາການວ່າ: ປະເທດຕ່າງໆບໍ່ຄວນມີປະຕິກິລິຍາວິຕົກກັງວົນຈົນເກີນເຫດ. ພວກເຮົາຫວັງວ່າ ສະຫະລັດອາເມຣິກາ ຈະປະເມີນສະພາບການແຜ່ລະບາດຂອງພະຍາດດັ່ງກ່າວນີ້ ຢ່າງມີສະຕິສຸຂຸມຮອບຄອບ ແລະ ສ້າງສັນ, ແລະ ປັບປຸງມາດຕະການຮັບມືຢ່າງສົມເຫດສົມຜົນ. ສປ ຈີນ ແລະ ສ.ອາເມຣິກາ ສາມາດຮັກສາການຕິດຕໍ່ແລກປ່ຽນ, ເພີ່ມທະວີການປະສານງານ, ແລະ ຮ່ວມມືກັນປ້ອງກັນ ແລະ ຄວບຄຸມການແຜ່ລະບາດຂອງພະຍາດນີ້ໄດ້.