ດ່ານສາກົນລານຕຸ້ຍມີຈຸດຄ່ຽນຖ່າຍສິນຄ້າແລະສາງຝາກເຄື່ອງແລ້ວ

ສາງຝາກສິນຄ້າ, ຈຸດຄ່ຽນຖ່າຍສິນຄ້າ ແລະ ເດີ່ນພັກລົດດັ່ງກ່າວຕັ້ງຢູ່ບ້ານຊຽງສ້ຽວ, ເມືອງຍອດອູ, ແຂວງຜົ້ງສາລີ, ຊຶ່ງຢູ່ຫ່າງຈາກດ່ານສາກົນລານຕຸ້ຍ 10 ກວ່າກິໂລແມັດ, ມີເນື້ອທີ່ປະມານ 10 ກວ່າເຮັກຕາ, ໂດຍແມ່ນບໍລິສັດ ຕົ່ງ ກໍ່ສ້າງ ແລະບໍລິການສາງຝາກສິນຄ້າ, ຄ່ຽນຖ່າຍສິນຄ້າ ແລະທ່ອງທ່ຽວຄົບວົງຈອນ ຈຳກັດຜູ້ດຽວ ເປັນຜູ້ລົງທຶນ. ຊຶ່ງການກໍ່ສ້າງໂຄງລ່າງພື້ນຖານດ້ານຕ່າງໆ ເປັນຕົ້ນການບຸກເບີກ-ດຸດປັບພື້ນທີ່, ການປູຫີນໜີບແໜ້ນ, ການກໍ່ສ້າງເດີ່ນພັກລົດ, ການກໍ່ສ້າງຈຸດຄ່ຽນຖ່າຍສິນຄ້າໃນຮົ່ມ ແລະ ກາງແຈ້ງ ,ການກໍ່ສ້າງສາງຝາກສິນຄ້າ, ກໍ່ສ້າງຫ້ອງການເຮັດວຽກຂອງບໍລິສັດ, ຫ້ອງການພາສີ, ຫ້ອງການກະສີກຳ, ເຮືອນນອນຂອງພະນັກງານບໍລິສັດ, ພະນັກງານພາສີ, ພະນັກງານກະສີກຳ; ການຕິດຕັ້ງຊິງຊັ່ງ,ຕິດຕັ້ງປ້າຍບໍລິສັດ, ປ້າຍຫ້ອງການ,

ຕິດຕັ້ງຄອມພິວເຕີ, ຕິດຕັ້ງລະບົບອະຊິກຸດະ (ASYCUDA) ເພື່ອເຊື່ອມຕໍ່ຖານຂໍ້ມູນໃຫຍ່, ຕິດຕັ້ງລະບົບຮັກສາຄວາມປອດໄພ,ລ້ອມຮົ້ວອ້ອມສຳນັກງານ ແລະອື່ນໆແມ່ນເລີ່ມກໍ່ສ້າງມາແຕ່ທ້າຍປີ 2018, ຮອດປະຈຸບັນແມ່ນສຳເລັດໂດຍພື້ນຖານ ແລະເປີດນຳໃຊ້ຢ່າງເປັນທາງການແລ້ວ. ພິທີເປີດ ບໍລິສັດ ຕົ່ງກໍ່ສ້າງ ແລະເປີດການບໍລິການສາງຝາກສິນຄ້າ, ຈຸດຄ່ຽນຖ່າຍສິນຄ້າ ແລະເດີ່ນພັກລົດເພື່ອບໍລິການການຂົນສົ່ງສິນຄ້າທີ່ເຂົ້າ-ອອກ ຜ່ານດ່ານສາກົນລານຕຸ້ຍໄດ້ຈັດຂຶ້ນໃນວັນທີ 3 ກຸມພາ 2021 ໂດຍການໃຫ້ກຽດເຂົ້າຮ່ວມຂອງທ່ານ ສຈ.ປອ. ຈະເລີນ ເຢຽປາວເຮີ, ລັດຖະມົນຕີປະຈຳສຳນັກງານນາຍົກລັດຖະມົນຕີ ແລະທ່ານ ຄຳຜອຍ ວັນນະສານ, ເຈົ້າແຂວງຜົ້ງສາລີ ພ້ອມດ້ວຍການນໍາຂອງແຂວງຜົ້ງສາລີ, ການນຳເມືອງຍອດອູ ແລະຜູ້ຕາງໜ້າຂະແໜງການທີ່ກ່ຽວຂ້ອງເຂົ້າຮ່ວມ.