ຮອງປະທານຄະນະກຳມະການເລືອກຕັ້ງລະດັບຊາດພ້ອມດ້ວຍຄະນະເຄື່ອນໄຫວຢ້ຽມຍາມແລະເຮັດວຽກຢູ່ເມືອງບຸນເໜືອ

ວັນທີ 6 ກຸມພານີ້, ທ່ານ ຈັນສີ ໂພສີຄຳ ອະດິດກຳມະ ການກົມການເມືອງສູນກາງພັກ, ອາດິດຫົວໜ້າຄະນະຈັດຕັ້ງສູນກາງພັກ, ຮອງປະທານຄະນະກຳມະການເລືອກຕັ້ງລະດັບຊາດ ແລະ ທ່ານ ຄຳຜອຍ ວັນນະສານ ກຳ ມະການສູນກາງພັກ, ເລຂາພັກແຂວງ, ເຈົ້າແຂວງໆຜົ້ງສາລີ ພ້ອມດ້ວຍຄະນະ ລົງເຄື່ອນໄຫວຢ້ຽມຍາມ ແລະ #ຊຸກຍູ້ການກະກຽມບັ້ນເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ #ສະພາປະຊາຊົນແຂວງຜົ້ງສາລີຊຸດທີ II ຢູ່ #ເມືອງບຸນເໜືອ #ແຂວງຜົ້ງສາລີ ໃຫ້ການຕ້ອນຮັບໂດຍທ່ານ ພອນໄຊ ແກ້ວສົມພັນ ກຳມະການປະຈຳພັກແຂວງ, ເລຂາພັກເມືອງ, ເຈົ້າເມືອງໆບຸນເໜືອ, ພ້ອມດ້ວຍກຳມະການປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ສອງກອງບັນຊາການ, ຄະນະພັກຮາກຖານ ແລະ ພະນັກງານ-ລັດຖະກອນອ້ອມຂ້າງເມືອງເຂົ້າຮ່ວມ.

ທ່ານ ພອນໄຊ ແກ້ວສົມພັນ ກຳມະການປະຈຳພັກແຂວງ, ເລຂາພັກເມືອງ, ເຈົ້າເມືອງໆບຸນເໜືອ ໄດ້ລາຍງານຫຍໍ້ການຈັດຕັ້ງປະຕິບັດແຜນພັດທະນາເສດຖະກິດ – ສັງ ຄົມ, ຕິດພັນກັບ ການກະກຽມຄວາມພ້ອມຮອບດ້ານ ໃຫ້ແກ່ບັ້ນເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະພາປະຊາຊົນແຂວງຜົ້ງສາລີ ຊຸດທີ II . ເມືອງບຸນເໜືອມີເນື້ອການປົກຄອງທັງໝົດ 1.112,6 ກິໂລຕາແມັດ ປະກອບດ້ວຍ 1 ເທດສະບານ, 5ກູ່ມບ້ານ, 66ບ້ານ, 4.773 ຄອບຄົວ, ມີພົນລະເມືອງທັງໝົດ 26.023 ຄົນ, ຍິງ 12.628 ຄົນ, ຊື່ງຊົນເຜົ່າອາຄາກວມ42,42% ຂອງຈຳນວນພົນລະເມືອງທັງໝົດ.

ທົ່ວເມືອງມີບ້ານພົ້ນທຸກ 43 ບ້ານ ກວມ 63,63%, ບ້ານຍັງບໍ່ພົ້ນທຸກ 23 ບ້ານກວມ 34,84%, ຄອບຄົວພົ້ນທຸກມີ 2.978ຄອບຄົວ, ກວມ 62,39%, ຄອບຄົວຍັງບໍ່ພົ້ນທຸກ 1.795ຄອບຄົວ, ກວມ 37,60%, ມີຄອບຄົວພັດທະນາ 190 ຄອບຄົວກວມ 7%, ໃນປີ 2020 ມີລວມຍອດລາຍຮັບ 384,504 ຕື້ກີບ ເສດຖະກິດພາຍໃນເມືອງຂະຫຍາຍຕົວສະເລ່ຍ8,09% ທຽບໃສ່ແຜນການລຸດແຜນ 2,98% ໃນນັ້ນກະສິກຳ ແລະ ປ່າໄມ້ ປະຕິບັດໄດ້ 225,922 ຕື້ກີບ, ອຸດສາຫະກຳ-ຫັດຖະກໍາປະຕິບັດໄດ້ 54,879 ຕື້ກີບ, ການບໍລິການປະຕິບັດໄດ້ 103,707 ຕື້ກີບ, ໂຄງປະກອບເສດຖະກິດໄດ້ມີການປ່ຽນແປງຄື: ຂະແໜງກະສິກໍາ ແລະ ປ່າໄມ້ ກວມ 58,76 %, ອຸດສາຫະກຳ-ຫັດຖະກໍາກວມ 14,37% ແລະ ການບໍລິການ ກວມ 27,15 %, ສະເລ່ຍໃສ່ຫົວຄົນໄດ້ 15,317 ລ້ານກີບ ເທົ່າກັບ 1.680ໂດລາສະຫາລັດ.

ສຳລັບການຫ້າງຫາກະກຽມບັ້ນການເລືອກຕັ້ງ ແມ່ນ ໄດ້ສ້າງ ແຜນເພື່ອວາງກຳລັງປ້ອງກັນຕາມຈຸດສຳຄັນຕ່າງ ແລະ 13 ຈຸດໜ່ວຍປ່ອນບັດເລືອກພ້ອມ 5 ຈຸດໜ່ວຍປ່ອນບັດເຄື່ອນທີ. ອະນຸກຳມະການກອງເລຂາໄດ້ກະກຽມບັນດາເນື້ອໃນເອກະສານຕ່າງໆ ຕາມຄູ່ມືຂອງຂອງສູນກາງ, ຂອງແຂວງ ແລະ ເປີດຝຶກອົບຮົມແນະນຳວຽກງານດັ່ງກ່າວໃຫ້ແກ່ຄະນະຮັບຜິດປ່ອນບັດແຕ່ລະຈຸດ. ຈັດກອງປະຊຸມຝຶກອົບຮົມເຊື່ອມຊຶມເອກະສານສໍາຄັນ ທີ່ກຽ່ວຂ້ອງກັບການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ລວມມີ 7 ເອກະສານຂອງຂັ້ນເມືອງ ແລະ ມີເອກະສານຈາກຂັ້ນແຂວງຂັ້ນສູນກາງອິກຈໍານວນໜື່ງ. ອອກ ແຈ້ງການການຂື້ນບັນຊີລາຍຊື່ ແລະ ຄຸ້ມຄອງຜົນລະເມືອງຜູ້ມີສິດເລືອກຕັ້ງທົ່ວເມືອງກ່ອນປ່ອນບັດເລືອກຕັ້ງ 7 ວັນ ບໍ່ໃຫ້ມີການເຄື່ອນຍ້າຍພົນລະເມືອງຜູ້ທີ່ມີສິດເລືອກຕັ້ງ.

ອະນຸກຳມະການໂຄງປະກອບ ແລະ ບຸກຄະລາກອນ ໄດ້ຄົ້ນຄວ້າສັງລວມຊີວະປະຫວັດຜູ້ຮັບສະມັກເລືອກຕັ້ງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງສົ່ງໃຫ້ອະນຸກຳມະການໂຄງປະກອບ ແລະ ບຸກຄະລາກອນຂັ້ນແຂວງສຳເລັດຕາມແຜນການ, ແຕ່ງຕັ້ງຄະນະກໍາມະການເລືອກຕັ້ງຂັ້ນເມືອງ, ຄະນະຮັບຜິດຊອບເລຂານຸການ ແລະ ອະນຸກໍາມະການຮັບຜິດຊອບວຽກງານຕ່າງໆ ລວມ 5 ອະນຸກຳມະການ ເພື່ອເຄື່ອນໄຫວ ແລະ ຈັດຕັ້ງປະຕິບັດຢູ່ຂັ້ນເມືອງ, ແບ່ງຄວາມຮັບຜິດຊອບໃຫ້ຄະນະຮັບຜິດຊອບໜ່ວຍປ່ອນບັດເລືອກຕັ້ງຂັ້ນເມືອງ ໂດຍໄດ້ກຳນົດ 13 ໜ່ວຍປ່ອນບັດ, 5 ໜ່ວຍປ່ອນບັດເຄື່ອນທີ ໂດຍມີຄະນະຮັບຜິດຊອບປ່ອນບັດທັງໝົດ 149 ຄົນ. ມີຜູ້ສະໜັກສະພາປະຊາຊົນແຂວງຊຸດທີ 2 ເຂດເມືອງບຸນເໜືອ ລວມ 6 ທ່ານ, ຍິງ 1 ທ່ານ. ເລືອກເອົາ 4 ທ່ານ ລົງເກັບກໍາສະຖິຕິຂໍ້ມູນສະທິຕິຈໍານວນຜູ້ມີສິດປ່ອນບັດເລືອກຕັ້ງ ນັບແຕ່ອາຍຸ 18 ປີ ຂື້ນໄປຕາມກົດໜາຍການເລືອກຕັ້ງໃນທົ່ວເມືອງສໍາເລັດ,

ຊື່ງປະກອບມີ ຜູ້ໃຊ້ສິດປ່ອນບັດເລືອກຕັ້ງທັງໝົດ 16.207 ຄົນ, ຍິງ 7.873 ຄົນ, ຜູ້ສາມາດປ່ອນບັດຢູ່ບ້ານຂອງຕົນເອງ ( ຕາມສໍາມະໂນຄົວ ) 14.927 ຄົນ, ຍິງ 7.317, ຜູ້ທີ່ໄປເຮັດວຽກຢູ່ຕ່າງແຂວງ, ຕ່າງເມືອງ ຫຼື ທ້ອງຖີ່ນອື່ນຕາມສໍາມະໂນຄົວ 770 ຄົນ, ຍີງ 317 ຄົນ, ຜູ້ທີ່ໄປເຮັດວຽກຢູ່ຕ່າງປະເທດມີ 116 ຄົນ, ຍິງ 69 ຄົນ. ຜູ້ມີສິດປ່ອນບັດທີ່ມາຈາກທ້ອງຖີ່ນອື່ນ 406 ຄົນ, ຍີງ 170 ຄົນ. ໂອກາດນີ້, ທ່ານ ຈັນສີ ໂພສີຄຳ ຮອງປະທານຄະນະກຳມະການເລືອກຕັ້ງລະດັບຊາດ ໄດ້ໃຫ້ທິດຊີ້ນຳຕໍ່ຄະນະພັກ ພະນັກງານຫຼັກແຫຼ່ງ, ຄະນະກຳມະການເລືອກຕັ້ງຂັ້ນເມືອງ, ຄະນະຮັບຜິດຊອບໜ່ວຍເລືອກຕັ້ງທຸກພາກສ່ວນ ຕ້ອງກຳແໜ້ນຈຳນວນພົນລະເມືອງຜູ້ມີສິດປ່ອນບັດເລືອກຕັ້ງ, ເອົາໃຈໃສ່ສຶກສາອົບຮົມການເມືອງ-ແນວຄິດ, ແກ້ໄຂບັນຫາປະກົດ ການຫຍໍ້ທໍ້ເປັນສຳຄັນ ເອົາໃຈໃສ່ປະສານສົມທົບກັບ ຄະນະຮັບຜິດຊອບການເລືອກຕັ້ງຂັ້ນແຂວງ,

ຊີ້ນຳໆພາຢ່າງໃກ້ສິດຕິດແທດ ຄະນະພັກຮາກຖານ, ອົງການປົກຄອງບ້ານໃຫ້ຖືເປັນວຽກງານໜຶ່ງທີ່ເປັນປາງບຸນໃຫຍ່ໃນວຽກງານການເມືອງ ເປັນເຈົ້າການຕິດຕາມກວດກາຄືນການເກັບກຳສະຖິຕິພົນລະເມືອງ ຮຽກຮ້ອງໃຫ້ເພີ້ມທະວີສ້າງຄວາມສາມັກຄີປອງດອງຊ່ວຍເຫຼືອເຊິ່ງກັນ ແລະ ກັນ, ກຳນົດຈຸດທີ່ຈະໃຫ້ຜູ້ລົງສະຫມັກຮັບເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນແຂວງຜົ້ງສາລີ ສະເໜີໂຕໃຫ້ລະອຽດຈະແຈ້ງ ເປັນກົກ ຍົກສູງວຽກງານປ້ອງກັນຊາດ-ປ້ອງກັນຄວາມສະຫງົບ ມາດຕະການຈັດຕັ້ງປະຕິບັດຕົວຈິງ ເຮັດໃຫ້ບັ້ນເລຶອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະພາປະຊາຊົນແຂວງຜົ້ງສາລີຊຸດທີ II ດຳເນີນໄປຕາມ 3 ຄາດຫມາຍໃຫຍ່ ດ້ວຍຜົນສຳເລັດ 100%.