ປະຊາຊົນໂຮມເງິນກັນສ້າງທາງເບຕົງ

ເມື່ອບໍ່ດົນມານີ້, ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ພ້ອມດ້ວຍຄະນະ ໄດ້ລົງຕິດ ຕາມຊຸກຍູ້ການກໍ່ສ້າງທາງເບຕົງຢູ່ບ້ານວັງປາ ເມືອງແກ່ນທ້າວ ແຂວງໄຊຍະບູລີ ຊຶ່ງການກໍ່ສ້າງທາງ ຮ່ອມບ້ານວັງປາ ມີ 3 ຮ່ອມ ໂດຍໄດ້ເລີ່ມກໍ່ສ້າງມາແຕ່ເດືອນພະຈິກ ປີ 2020, ມີຄວາມຍາວ ທັງໝົດ 300 ກວ່າແມັດ. ໃນນີ້, ຮ່ອມ 7 ຍາວ 49 ແມັດ, ຮ່ອມ 8 ຍາວ 252 ແມັດ ແລະ ຮ່ອມ 14 ຍາວ 35 ແມັດ,

ແຕ່ລະຮ່ອມມີຄວາມກວ້າງ 5 ແມັດ, ໜາ 15 ຊັງຕີແມັດ, ມີມູນຄ່າການກໍ່ສ້າງ ທັງໝົດ 226 ລ້ານກວ່າກີບ. ໃນນີ້, ທຶນຂອງແຂວງປະກອບສ່ວນຊີມັງ ມູນຄ່າ 99 ລ້ານກີບ ແລະ ທຶນຂອງປະຊາຊົນພາຍໃນບ້ານ 127 ລ້ານກວ່າກີບ, ມາຮອດປັດຈຸບັນ ເສັ້ນທາງດັ່ງກ່າວສໍາເລັດແລ້ວ 92% ຄາດວ່າການກໍ່ສ້າງຈະສໍາເລັດໃນທ້າຍເດືອນກຸມພາ 2021 ນີ້.