ຈັບຄາເຮືອນພ້ອມເຮໂຣອິນແລະຢາບ້າ

ຈັບຄາເຮືອນ ພ້ອມເຮໂຣອິນ 600 ແທ່ງ ແລະ ຢາບ້າ 4.000 ເມັດ ວັນທີ 7 ກຸມພາ 2021, ພະແນກຕໍາຫຼວດສະກັດ ກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງບໍລິຄໍາໄຊ ໄດ້ນໍາກໍາລັງເຈົ້າໜ້າທີ່ວິຊາສະ ເພາະ ລົງສົມທົບກັບພາກສ່ວນທີ່ກ່ຽວຂ້ອງ ເຂົ້າປິດລ້ອມເຮືອນເປົ້າໝາຍຢາເສບຕິດລາຍໃຫຍ່ ຢູ່ບ້ານໂພນເມືອງນ້ອຍ ເມືອງຄໍາເກີດ,ຜ່ານການກວດຄົ້ນເຮືອນ ພົບເຮໂຣອິນ ຈໍານວນ 600 ແທ່ງ ນ້ໍາໜັກ 231 ກິໂລກຼາມ ແລະ ຢາບ້າຈໍານວນ 4.000 ເມັດ ພ້ອມທັງກັກຕົວເປົ້າໝາຍໄດ້ 4 ຄົນ. ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍລິຄໍາໄຊ ໃຫ້ຮູ້ວ່າ: ຜູ້ຖືກຫາທັງ 4 ຄົນ ຊື່ ທ້າວ ເບຍເຢ້ຊົ່ງ ອາຍຸ 57 ປີ (ເຈົ້າຂອງເຮືອນ), ທ້າວ ເຢ້ຊົ່ງ ອາຍຸ 34 ປີ, ທ້າວ ເນັ່ງຊົ່ງ ອາຍຸ 27 ປີ ແລະ ທ້າວ ເຊຊົ່ງ ອາຍຸ 21 ປີ ທັງ 4 ຄົນ ຢູ່ບ້ານດຽວກັນ;

ກ່ອນມ້າງຄະດີດັ່ງກ່າວໃນວັນທີ 5 ກຸມພາ 2021 ໄດ້ຮັບລາຍງານວ່າ ຈະມີການເຄື່ອນຍ້າຍຢາເສບຕິດປະເພດ ເຮໂຣອິນ ຈໍານວນຫຼາຍໄປພັກເຊົາ ຢູ່ເມືອງຄໍາເກີດ ແຂວງບໍລິຄໍາໄຊ ກຽມຂາຍອອກໄປປະເທດໃກ້ຄຽງ. ຈາກນັ້ນ, ຈຶ່ງໄດ້ຈັດຕັ້ງກໍາລັງເຈົ້າໜ້າທີ່ວິຊາສະເພາະຕິດຕາມເປົ້າໝາຍ; ຮອດເວລາປະມານ 13:40 ໂມງຂອງວັນທີ 7 ກຸມພາ 2021,ຈຶ່ງໄດ້ນໍາກໍາລັງເຈົ້າໜ້າທີ່ເຂົ້າປິດລ້ອມເຮືອນ ຂອງ ທ້າວ ເບຍເຢ້ຊົ່ງ ແລະ ກວດຄົ້ນເຮືອນ ພົບຢາເສບຕິດ ເຮໂຣອິນ 600 ແທ່ງ ແລະ ຢາບ້າຈໍານວນ 4.000 ເມັດ ພ້ອມທັງຈັບຕົວເປົ້າໝາຍໄດ້ ທັງ4 ຄົນ. ຜ່ານການສອບສວນ ໃນເບື້ອງຕົ້ນພວກກ່ຽວ ສາ ລະພາບວ່າ: ຢາເສບຕິດຈໍານວນດັ່ງກ່າວ ແມ່ນໄດ້ຮັບມາຈາກກຸ່ມຮ່ວມຂະບວນການຄ້າຂາຍຢາເສບຕິດນໍາກັນ ເພື່ອກຽມເອົາຂາຍໃຫ້ຜູ້ທີ່ສັ່ງຊື້ ໄປເທດໃກ້ຄຽງ ແຕ່ກໍຖືກຈັບກ່ອນ.