ວັນທີ 10 – 11 ຕຸລານີ້ລະວັງຝົນຍັງຕົກໜັກທາງພາກໄຕ້

ແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງທຸກພາກສ່ວນທີ່ອາໄສຢູ່ແຂວງພາກກາງ ແລະ ພາກໃຕ້ເຊັ່ນ: ແຂວງບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ມີຕົ້ນໄມ້ຫັກ ແລະ ເສົາໄຟຟ້າລົ້ມ, ເຮືອນເປ່ເພ, ນ້ຳຖ້ວມຊຸ, ດິນເຈື່ອນ ແລະ ນ້ຳຖ້ວມອັ່ງ, ພ້ອມນີ້ກໍ່ໃຫ້ຕິດຕາມການແຈ້ງເຕືອນໄພຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.

ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນໄພວ່າ ເນື່ອງຈາກຄວາມກົດດັນອາກາດສູງຈາກປະເທດຈີນ ຍັງສືບຕໍ່ແຜ່ລົງມາປົກຄຸມເຂດພາກເໜືອຂອງລາວ, ສ່ວນພາກກາງ ແລະ ພາກໃຕ້ປົກຄຸມດ້ວຍຄວາມກົດດັນອາກາດຕ່ຳທີ່ມີກຳລັງແຮງເພີ່ມຂຶ້ນ ສົມທົບກັບລົມຕາເວັນຕົກ-ຕາເວັນອອກສ່ຽງເໜືອ ພັດປົກຄຸມເປັນສ່ວນໃຫຍ ເຊິ່ງຈະເຮັດໃຫ້ອາກາດເຢັນລົງໃນຕອນເຊົ້າ ແລະ ຈະມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍຢູ່ໃນແຕ່ລະພາກ ແລະ ຕົກປານກາງ ຫາ ຕົກໜັກ ພ້ອມຈະມີລົມພັດແຮງຢູ່ບາງທ້ອງຖິ່ນແຂວງພາກກາງ ແລະ ພາກໃຕ້ ໃນໄລຍະວັນທີ 09-11 ຕຸລານີ້.

ດັ່ງນັ້ນ,​ຈຶ່ງຂໍຝາກເຕືອນພໍແມ່ພີ່ນ້ອງປະຊາຊົນທຸກຂົງເຂດປະຊາຊົນຊາວເມືອງ ບ້ານທິ່ຕິດກັບແຄມເຊ, ສາຍນ້ຳນ້ອຍໃຫຍ່ຈົ່ງມີສະຕິລະວັງຕົວຢູ່ຕະຫຼອດເວລາ. ຈຸດຫົວຂົວຖືກນ້ຳເຊາະເຈື່ອນເຊິ່ງພົບຄວາມຫຍຸ້ງຍາກໃນການສັນຈອນໄປມາ ລົດໃຫຍ່ທຸກປະເພດແມ່ນບໍ່ສາມາດຂ້າມໄປມາໄດ້ເປັນຕົ້ນ: ເສັ້ນທາງແຕ່ບ້ານ ດົງສະຫວັນ ເມືອງເຊໂປນ ຫາ ເມືອງນອງ ແຂວງສະຫວັນນະເຂດ ການສັນຈອນຕ້ອງໄດ້ໃຊ້ເຮືອຫຼືບັກເທົ່ານັ້ນຂ້າມ. ສ່ວນເສັ້ນທາງລະຫວ່າງບ້ານຕໍ່ບ້ານຂອງເມືອງນອງຖຶກຕັດຂາດຫຼາຍບ່ອນເຊັ່ນ:

ເຂດຈຸດສຸມແກ້ງລີ້ນມີເສັ້ນທາງແຕ່ບ້ານໄກສອນ-ຕັງອະຫາບ້ານແກ້ງລີ້ນ,ແຕ່ຈຸດສຸມແກ້ງລີ້ນຫາ ບ້ານປະຈະຕຽນ ຈຸດນ້ຳຖ້ວມຂັງແມ່ນຂົວຈົມເຊສະໝູນ ປະຊາຊົນຕ້ອງໄດ້ໃຊ້ເຮືອຂ້າມ,ເຂດຈຸດສຸມປະເລາະ-ອາສິງ​ເສັ້ນທາງຖືກຕັດຂາດໃນບໍລິເວນທີ່ເປັນຫ້ວຍມີ: ແຕ່ບ້ານອາສິງ ຫາບ້ານແສນ ແລະ ບ້ານອາສິງສາລີ​ ຄຸ້ມ 1 ຫາຄຸ້ມ​ 2, ໃນນັ້ນມີເສົາໄຟຟ້າຫັກໂຄ່ນລົງມາ​ 2​ ຫຼັກ ໄຟດັບ. ຝົນຍັງສືບຕໍ່ຕົກລິນຕະຫຼອດມື້ຕະຫຼອດຄືນເຊິ່ງໄດ້ຮັບອິດທິພົນຈາກ ພາຍຸ ດີເປຣຊັ້ນ ຮອດປະຈຸບັນ,ມີຝົນຕົກລິນ,ຕົກແຮງບາງຄັ້ງເຮັດໃຫ້ເສັ້ນທາງລະຫວ່າງເມືອງກັບເມືອງ ແລະບ້ານຕໍ່ບ້ານຖືກຕັດຂາດ.