ຫວຽດນາມ ຍັງພົບຄົນຕິດເຊື້ອໂຄວິດ-19 ເພີ່ມຂື້ນທຸກມື້ ໃນລະດູໜາວຈະມີຄົນຕິດເຊື້ອເພີ່ມຂື້ນ

ລາຍງານຂ່າວ ຈາກ ສສ ຫວຽດນາມ ຊີ້ໃຫ້ຮູ້ວ່າ ໃນວັນທີ 11/08/2020 ມີຕົວເລກຜູ້ເສຍຊີວິດເພີ່ມ ຍ້ອນໂຄວິດ-19 ເປັນຈໍານວນ 2 ກໍລະນີ ເຮັດໃຫ້ຕົວເລກສະສົມ ຜູ້ເສຍຊີວິດ ຢູ່ ປະເທດຫວຽດນາມ ເພີ່ມຂຶ້ນເປັນ 15 ຄົນ, ຕິດເຊື້ອສະສົມ 847 ຄົນ. ຂ່າວກ່ອນໜ້ານີ້ ສສ ຫວຽດນາມ 🇻🇳 ລາຍງານວ່າ ໃນວັນທີ 10 ສິງຫາ 2020 ມີຜູ້ເສຍຊີວິດເພີ່ມ ຈາກໂຄວິດ-19 ເຮັດໃຫ້ມີຍອດຜູ້ເສຍຊີວິດທົ່ວປະເທດ ເພີ່ມຂຶ້ນເປັນ 11 ຄົນ,

ມີຜູ້ຕິດເຊື້ອໃໝ່ ເພີ່ມຂຶ້ນ 31 ຄົນ ໂດຍທັງໝົດ ມີສ່ວນພົວພັນກັບ ກໍລະນີການແຜ່ລະບາດຢູ່ນະຄອນ ດານັງ. ຕົວເລກສະສົມ ຜູ້ຕິດເຊື້ອທັງໝົດ ຢູ່ປະເທດ ຫວຽດນາມ ໃນເວລານີ້ ຢູ່ທີ່ 841 ຄົນ. ຍອດຜູ້ຕິດເຊື້ອ ໂຄວິດ-19 ໃນທົ່ວໂລກ ທະລຸ 20 ລ້ານ ກໍລະນີ ເປັນທີ່ຮຽບຮ້ອຍແລ້ວ ໃນວັນທີ 10 ສິງຫາ 2020 ໂດຍຄວາມໄວຈາກ ຈາກຕົວເລກ 19 ລ້ານ ມາເປັນ 20 ລ້ານ ໃຊ້ເວລາພຽງ 72 ຊົ່ວໂມງ ຊຶ່ງເປັນ ອັດຕາຕິດເຊື້ອ ທີ່ໄວທີ່ສຸດ

ນັບຕັ້ງແຕ່ເລີ່ມມີການລະບາດ ຢູ່ ສປ ຈີນ ເປັນຕົ້ນມາ. ສະຖາບັນ ວິທະຍາສາດການແພດ ຂອງປະເທດອັງກິດ ເຕືອນໃຫ້ຫນ່ວຍງານດ້ານສາທາລະນະສຸກ ກຽມຮັບມື ການແຜ່ລະບາດຮອບສອງ ໃນໄລຍະລະດູຫນາວ ທີ່ຈະມາຮອດ ອີກບໍ່ພໍເທົ່າໃດເດືອນຂ້າງໜ້າ ຊຶ່ງເຊື້ອໄວຣັສ ອາດສາມາດ ແຜ່ກະຈາຍໄດ້ໄວຂຶ້ນ ແລະ ຈະເຮັດໃຫ້ການຄວບຄຸມ ເຮັດໄດ້ຍາກຂຶ້ນຕື່ມ. ຄາດການຜູ້ເສຍຊີວິດ ຈົນຮອດທ້າຍປີ ອາດຈະທະລຸຮອດ 1 ລ້ານຄົນ.