ແພດໝໍຝາກເຕືອນໃຜຕິດພະຍາດໂຄວິດ-19 ແລ້ວບໍ່ໄດ້ເຊົາງ່າຍໆ

ຂໍອະນຸຍາດພື້ນທີ່ນີ້ເລົ່າເຖິງຄວາມເສຍສະຫຼະອັນຍີ່ງໃຫຍ່ຂອງອາຊີບແພດໝໍ ໂດຍສະເພາະທີມແພດທີ່ປິ່ນປົວຄົນເຈັບຕິດເຊື້ອໂຄວິດ-19ໃຫ້ສັງຄົມໄດ້ຮັບຮູ້ນຳກັນ. ທຸກໆວັນທີມແພດແມ່ນໃສ່ຊຸດອາວະກາດ(ຊຸດປ້ອງກັນການຕິດເຊື້ອ)ຫຼືເອີ້ນວ່າຊຸດ PPE ລວມທັງຊຸດເຄື່ອງນຸ່ງດ້ານໃນແມ່ນທັງໝົດ 5 ຊັ້ນ ມື້ລະ6ຊົ່ວໂມງ ທີ່ທໍລະມານແມ່ນຊຸດສວມໃສ່ແລ້ວບໍ່ສາມາດຖອດໄດ້ຈົນກ່ວາຈະຄົບ6ຊົ່ວໂມງ ສະນັ້ນທຸກຄົນຕ້ອງໄດ້ໃສ່ແພັມເພີດເພື່ອຖ່າຍໜັກ ຖ່າຍເບົາ ກັບຫັ້ນ ຖ້າແພດຍິງປະຈຳເດືອນມາກໍ່ຕາມນັ້ນ ພວກທ່ານຄິດອອກບໍວ່າມັນຢູ່ຍາກສ່ຳໃດ ຮ້ອນສ່ຳໃດ?? ຄົບ 6 ຊົ່ວໂມງ ຫຼັງຈາກໃສ່ຢຸກຢາໃຫ້ຄົນເຈັບແລ້ວ ຈິ່ງໄດ້ມີລົດຮັບສົ່ງມາຮັບໄປບ່ອນພັກທີ່ທາງການຈັດສັນໄວ້ໃຫ້ ກ່ອນເຂົ້າຫ້ອງຕ້ອງໄດ້ເຮັດການຂ້າເຊື້ອຊຸດເຄື່ອງນຸ່ງທີ່ສວມໃສ່ດ້ວຍນ້ຳຢາຂ້າເຂື້ອແລະຖອດເຄື່ອງດ້ວຍຄວາມລະມັດລະວັງ(ໃຊ້ເວລາສົມຄວນ)ເຂົ້າໄປໃນຫ້ອງແລ້ວຕ້ອງໄດ້ເຮັດອະນາໄມຫ້ອງເອງເນື່ອງຈາກເປັນພື້ນທີ່ສີແດງ ບໍ່ສາມາດໃຫ້ແມ່ບ້ານເຂົ້າເຮັດຄວາມສະອາດທາງໃນໃຫ້.

ກໍລະນີມີຄົນເຈັບຂ້ອນຂ້າງອາການໜັກແມ່ນໄດ້ພັດປ່ຽນກັນດູແລຕິດຕາມຢ່າງໃກ້ຊິດ. ເວລາກິນເຂົ້າ ແມ່ນມີຄົນເຮັດເຂົ້າກ່ອງໄປສົ່ງແບບປ່ອນໃຫ້ນັກໂທດຢູ່ຄຸກ ພ້ອມກັນນີ້ແມ່ນຟ້າວກິນຟ້າວແລ້ວເພື່ອຫຼີກລ່ຽງການໃຊ້ເວລາດົນຈະເປັນຊ່ອງວ່າງຂອງການຕິດເຊື້ອ ທຸກເວລາໃນການໃກ້ຊິດຄົນເຈັບແມ່ນຕ້ອງໄດ້ທຳໃຈຖ້າຫາກພາດກໍ່ຄືການຕິດເຊື້ອເຂົ້າຮ່າງກາຍຕົນເອງ. ຕ້ອງຫ່າງໄກຈາກຄອບຄົວ ຈາກຄົນທີ່ຮັກ ເພາະບໍ່ສາມາດກັບໄປເຮືອນໄດ້ຈົນກ່ວາຈະປິ່ນປົວຄົນເຈັບຫາຍດີ. ນີ້ແມ່ນການເສຍສະຫຼະຂອງນັກຮົບເສື້ອຂາວທີ່ຍາມໃດກໍ່ຕ້ອງປົກປ້ອງຊີວິດຂອງຄົນເຈັບດ້ວຍການເອົາຊີວິດຕົນເອງເປັນເດີມພັນ. ຖ້າມື້ໃດເຫັນວ່າບໍ່ມີການພົບເຊື້ອເພີ້ມ ແມ່ນທຸກຄົນດີໃຈ ມີຮອຍຍີ້ມ ລວມທັງລັດຖະບານກໍ່ຄືຄະນະສະເພາະກິດກໍ່ພາກພູມໃຈ ດີໃຈທີ່ສຸດ ທຸກມື້ນີ້ພວກເພີ່ນທັງໝົດເຮັດວຽກຢ່າງໜັກໜ່ວງເພື່ອພວກເຮົາ ສະນັ້ນພວກເຮົາຕ້ອງເຮັດເພື່ອພວກເພີ່ນດ້ວຍການປ້ອງກັນຕົວຂອງທ່ານເອງບໍ່ໃຫ້ຕິດເຊື້ອ.

ດ້ວຍຄວາມຮັກ ແລະ ຫ່ວງໃຍຈາກຕູ້ສັນຕິສຸກ. ແລະວັນທີ 11/4/2020 ທີ່ນະຄອນຫຼວງວຽງຈັນ ມື້ວານປະກາດວ່າມີຜູ້ຕິດເຊື້ອເພີ່ມອີກ 2 ຄົນລວມເປັນ 18 ຄົນ ແຕ່ລະມື້ເຮົາເຫັນແຕ່ຂ່າວຈຳນວນຜູ້ປ່ວຍເພີ່ມຂຶ້ນ ແຕ່ຍັງບໍ່ມີຂ່າວໃຜທີ່ປົວເຊົາເລີຍ ບັນຫາທີ່ເປັນຕາວິຕົກກໍ່ຄື ຢ້ານແຕ່ແພດໝໍຊິບໍ່ພໍກັບຜູ້ປ່ວຍຫັ້ນດອກ ຜູ້ປ່ວຍຄົນ 1 ໃຊ້ແພດໝໍ 5-6 ຄົນໃນການເບິ່ງແຍງ ຖ້າຈຳນວນຜູ້ປ່ວຍຮອດຫລັກ 1xx ຫຼືຫລັກ 1,xxx ປະເທດເຮົາເຈິບັນຫາໜັກແທ້ ຂໍໃຫ້ທຸກຄົນເປັນເຈົ້າການລະມັດລະວັງຕື່ມເນາະ ໃຜທີ່ຮູ້ຕົວວ່າມີການພົວພັນກັບຜູ້ປ່ວຍກໍ່ໃຫ້ໄປກວດຈັກ 2-3 ເທື່ອເດີ້ແລະກັກໂຕເອງໄວ້…ໃຜທີ່ຍັງຊຸມນຸມຫຼືຍັງຊອກເລາະຫຼິ້ນຢູ່ກະຂໍໃຫ້ຢຸດກ່ອນເນາະ ຖືວ່າເຮັດເພື່ອສ່ວນລວມ ແລະບົດສົນທະນານີ້ເປັນຄວາມວິຕົກແລະເປັນຫ່ວງຂອງນາຍໝໍທ່ານໜື່ງ ຈັ່ງໃດກໍ່ຂໍເປັນກຳລັງໃຈໃຫ້ແພດໝໍທຸກຄົນເດີ້ເຮົາຈະຜ່ານວິກິດຄັ້ງນີ້ໄປພ້ອມກັນ

Cr: ຕູ້ສັນຕິສຸກ | Facebook