ຄວາມຮັກຈະຢູ່ໄດ້ດົນຕ້ອງຮູ້ຈັກບໍລິຫານຄວາມຮັກໃຫ້ເປັນ

ເງິນຄືສິ່ງຈຳເປັນສ່ວນໜຶ່ງໃນຊີວິດຄູ່ ແຕ່ທີ່ສຳຄັນກວ່ານັ້ນຄື ຊີວິດຄູ່ຈະບໍລິຫານເງິນແບບໃດ? ຖ້າພວກເຈົ້າບໍ່ມີເງິນເບິ່ງ ຈະເປັນແບບນີ້ບໍ່? ຊີວິດຄູ່ແບບນີ້ກະເຮັດໄດ້ ແນວວ່າມີເງິນ ແລະອື່ນໆອີກ, ກະຖືວ່າເປັນການດີ ທີ່ຈະໄດ້ແລກບົດຮຽນກັນອີກໃນບົດຄວາມນີ້ ເພາະຂ້ອຍຈະອະທິບາຍໃຫ້ເຂົ້າໃຈວ່າເປັນຫຍັງ ຊີວິດຄູ່ຂອງຂ້ອຍກັບເມຍ ບໍ່ເດືອດຮ້ອນເລື້ອງເງິນ ແລະ ເງິນ ບໍ່ເຄີຍເປັນປະເດັນປັນຫາເລີຍໃນການຢູ່ຮ່ວມກັນ.

*ບົດຄວາມນີ້ຈະຍາວເປັນພິເສດ ເໝາະແກ່ການນັ່ງໃນຫ້ອງນໍ້າດົນໆ*

ກ່ອນອື່ນໝົດຂ້ອຍຢາກບອກວ່າຊີວິດຂ້ອຍເກີດມາພ້ອມກັບຄວາມສະບາຍ ສະບາຍຫຼາຍຈົນບໍ່ຕ້ອງຄິດຫຍັງ ມີໜ້າທີ່ຮຽນຢ່າງດຽວ!! ຂ້ອຍນຸ່ງເສື້ອຜ້າງາມ ລີດມີກີບທຸກມື້ໄປຮຽນມະຫາໄລ, ພາຍກະເປົາໜ່ວຍລະ 3 ລ້ານກີບທີ່ຕອນນັ້ນໃຜກະວ່າແພງ ແຕ່ຂ້ອຍຊື້ໄດ້ສະບາຍ, ຂ້ອຍຂີ່ລົດ Land Cruiser ຈັກ 10 ສູບ ທີ່ຕ້ອງໃສນໍ້າມັນລົດທິດລະ 5 ແສນກີບໄປໂຮງຮຽນ, ຂ້ອຍໄປທ່ຽວຫຼັງເລີກຮຽນ ຈົນເຖິງ 5ໂມງເຊົ້າ ພໍ່ແມ່ບໍ່ເຄີຍຮ້າຍ ຖາມແຕ່ວ່າກິນເຂົ້າລະບໍ່? ເລື້ອງນີ້ຖາມໝູ່ຄູ່ສະໄໝຮຽນຂອງຂ້ອຍໄດ້ວ່າແທ້ ຫຼື ບໍ່.

ຍ້ອນຫຍັງຈຶ່ງເປັນແບບນັ້ນ?

1. ເພາະເສື້ອທີ່ລີດຈົນເປັນກີບຄົມໆ ຂ້ອຍລີດເອງ ຂ້ອຍເລິ່ມລີດເຄື່ອງເອງຕັ້ງແຕ່ຮຽນ ປໍ 2

2. ກະເປົາແພງໆທີ່ໃຊ້ ຂ້ອຍທ້ອນເງິນໄປໂຮງຮຽນ ແລະ ເຮັດວຽກເສີມ ຊື້ເອງໄດ້ ຢ່າວ່າແຕ່ 3 ລ້ານ ຊື້ກະເປົາແລ້ວເງິນຂ້ອຍຍັງເຫຼືອອີກ 10 ກວ່າລ້ານ

3. ນໍ້າມັນລົດພໍ່ຈ່າຍໃຫ້ແຕ່ສະເພາະໄປຮຽນ ຈະໄປທາງອື່ນກະເຕິມເອງ

ເຖິງຊີວິດຈະເກີດມາພ້ອມກັບເງື່ອນໄຂທີ່ສະບາຍ ແຕ່ພໍ່ແມ່ກະມີເງື່ອນໄຂທີ່ຫຍຸ້ງຍາກໃຫ້ຄືກັນ ມີເງິນໃຫ້ໄປຮຽນ ແຕ່ບໍ່ມີອັນອື່ນທີ່ບໍ່ຈຳເປັນໃຫ້, ມີລົດໃຫ້ຂີ່ ແຕ່ໃຫ້ຂີ່ເທົ່າທີ່ຈຳເປັນ ເພາະເພິ່ນບອກຕະຫຼອດວ່າ “ຖ້າລູກເຄີຍຜ່ານຄວາມທຸກແລ້ວ ສິກັບມາລຳບາກອີກຈັກເທື່ອກະບໍ່ເປັນປັນຫາ ຕອນພໍ່ແມ່ມີແຮງຊ່ວຍເຈົ້າ ຫີບຕັກຕວງເອົາຄວາມຮູ້ ໝົດບຸນພໍ່ແມ່ໄປແລ້ວ ເຈົ້າຕ້ອງເບິ່ງແຍງໂຕເອງ ເພາະບໍ່ມີໃຜສິມາຕາຍແທນເຈົ້າ” (ຟ້າເອີ້ຍ ອ້າຍບ່າວອາຍຸ 17 ບໍ່ຄິດຫຍັງດອກຕອນນັ້ນ, ລົມຜ່ານຫູຊື່ໆ)

ແລ້ວມື້ທີ່ຄວາມຄິດໃນຊີວິດປ່ຽນກະມາຮອດ! ມື້ທີ່ຂ້ອຍຕື່ນມາພ້ອມກັບເງິນໃນຖົງ 6.000 ກີບ, ຟ້າວໄປໂຮງຮຽນ ແຕ່ລົດບໍ່ມີນໍ້າມັນ, ຄົນໃນບ້ານອອກໄປວຽກໝົດ ບໍ່ມີໃຜເລີຍ! ແລ້ວຄຳເວົ້າຂອງພໍ່ກະແລ່ນມາໃນຫົວຂ້ອຍ ຂ້ອຍຢ້ານພໍ່ແມ່ຕາຍປະຫຼາຍ ໃນຕອນທີ່ຂ້ອຍຍັງບໍ່ມີເງິນເດືອນເປັນຂອງໂຕເອງ ບໍ່ເວົ້າເຖິງວ່າແຕ່ງເມຍດອກ ເມຍຍັງແຕ່ງຕາມຫຼັງໄດ້ ຄະແນມມີຄວາມຮູ້ ມີອາຊີບ ມີເງິນເດືອນ. ຫຼັງຈາກນັ້ນມັນເຮັດໃຫ້ຂ້ອຍບຸກບືນເພື່ອໂຕເອງຫຼາຍທີ່ສຸດ ກ່ອນຈະບໍ່ມີພໍ່ແມ່ຊ່ວຍ, ຂ້ອຍເຊົາໄປທ່ຽວເສເພ ແລະ ຮຽນທຸກຢ່າງທີ່ຂວາງໜ້າ ຮຽນພາສາ, ຮຽນໃຊ້ຄອມ, ຮຽນຂາຍເຄື່ອງ, ເງິນທີ່ຂໍພໍ່ແມ່ນຊື້ປື້ມ ກັບອຸປະກອນການຮຽນ ຈົນໃນທີ່ສຸດຂ້ອຍບືນຈົນໄດ້ໄປຮຽນຕ່າງປະເທດ

ຫຼັງຈາກຮຽນຈົບກັບມາແຕ່ຕ່າງປະເທດ ຂ້ອຍໃຊ້ຊີວິດໃນແບບ !!ຈຳເປັນ!! ແລະ ບໍ່ໄດ້ຂໍເງິນພໍ່ແມ່ໃຊ້ອີກເລີຍ ເພາະບໍລິຫານເງິນເດືອນຂອງໂຕເອງ, ເລິ່ມຈາກການຂຽນໂຕເລກລາຍຮັບທີ່ມີ ແລະ ລາຍຈ່າຍທົ່ວໄປ, ອັນໃດທີ່ເຫັນວ່າບໍ່ຈຳເປັນກະຕັດອອກ ເພາະຕອນນັ້ນຕ້ອງຟ້າວທ້ອນເງິນໄປແຕ່ງນາງ ວາລິສາ ດາວສະຫວັນ(ເມຍຂ້ອຍທຸກມື້ນີ້ລະ ) ຫຼຸດຈາກການໃຊ້ຈ່າຍອາທິດລະ 400.000 ກີບ ໃຫ້ເຫຼືອ 90.000 ກີບ (ມື້ໜ້າຈະອະທິບາຍໃຫ້ຟັງວ່າເຮັດແບບໃດ), ຂ້ອຍມີເງິນເກັບທຸກເດືອນ 2ລ້ານເພື່ອແຕ່ງເມຍ

ເມື່ອອອກມາເປັນຄອບຄົວຂອງຕົນເອງ ຂ້ອຍແລະເມຍ ບໍລິຫານເງິນທີ່ຫາໄດ້ ແລະ ທ້ອນໄວ້ຍາມຈຳເປັນບາງສ່ວນ ເພາະຄິດວ່າຖ້າໃຊ້ ໜ້ອຍ ກວ່າຫາໄດ້ ຈັ່ງໃດເງິນກະເຫຼືອເກັບ ຈະເອົາໄປລົງທຶນ ຫຼື ເຮັດແນວອື່ນໃຫ້ງອກເງີຍກະໄດ້.

ທຸກມື້ນີ້ຂ້ອຍທຽວໄປການດ້ວຍລົດຈັກເກົ່າໆຂອງອ້າຍຂ້ອຍ ໃສນໍ້າມັນອາທິດລະ 20-25 ພັນກີບ ເດືອນໜຶ່ງເອົາເຕັມທີ 100.000 ກີບ ຝົນຕົກແດ່ກະຈັ່ງເອົາລົດໃຫຍ່ໄປ, ຂ້ອຍກິນເຂົ້າບ້ານຕະຫຼອດ ຈະອອກໄປສັງສັນເດືອນລະ 2-3 ເທື່ອ, ເຄື່ອງນຸ່ງບໍ່ໄດ້ຊື້ເພິ່ມ ຈົນກວ່າເມຍສັງເກດເຫັນມັນເລິ່ມເນົ່າແລ້ວ ຈຶ່ງຊື້ໃໝ່.

ສະຫຼຸບຕອນນີ້ຂ້ອຍໃຊ້ເງິນປະມານອາທິດລະ ສອງ-ສາມແສນກີບ ຈົບເດືອນໃຊ້ໄປປະມານ ແປດແສນ-ລ້ານກີບ ຂ້ອຍວ່າຖ້າຜູ້ເປັນພະນັກງານຫ້ອງການ ເງິນເດືອນຫຼັກລ້ານປາຍ ກະຍັງພໍມີເງິນເຫຼືອເກັບທ້າຍເດືອນ 3-4 ແສນກີບ ເອົາເງິນທີ່ເຫຼືອໄປລ້ຽງໄກ່ ເກັບໄຂ່ຂາຍກະໄດ້ເງິນຕື່ມ, ລອງຄິດເບິ່ງວ່າຂ້ອຍເລິ່ມຈາກຖານະທີ່ເລົ່າມາໃຫ້ຟັງ ຂ້ອຍຍັງໄດ້ຊຳນີ້ ຖ້າເຈົ້າເລິ່ມຈາກຕຳ່ກວ່າຂ້ອຍ ສະແດງວ່າເຈົ້າຕ້ອງອົດທົນ ແລະ ປະຫຍັດກວ່າຂ້ອຍອີກ ເຖິງຈະຢູ່ລອດ.

ມັນບໍ່ກ່ຽວວ່າເຈົ້າຈະຫາເງິນໄດ້ຫຼາຍ-ໜ້ອຍປານໃດ ຖ້າເຈົ້າບໍລິຫານມັນບໍ່ໄດ້ ມັນກະກາຍເປັນປັນຫາ ແລ້ວປັນຫາມັນຈະໃຫຍ່ຂຶ້ນໄປອີກຫຼາຍເທົ່າ ຖ້າຜົວເມຍບໍ່ມີຈິດໃຈທີ່ເຂັ້ມແຂງ ທີ່ຢູ່ເໜືອກວ່າວັດຖຸ.

ຂ້ອຍເຄີຍເວົ້າໄວ້ໃນບົດຄວາມກ່ອນໆວ່າ ເມື່ອໃດທີ່ເຈົ້າເອົາລາຍຮັບ ຫຼື ສິ່ງຂອງ ຫຼື ຊັບສິນຂອງຕົນເອງ ໄປທຽບກັບຄົນອື່ນທີ່ມີຫຼາຍກວ່າ ເຈົ້າສິທຽບອີກຈັກພັນເທື່ອເຈົ້າກະທຸກ!!! ຜູ້ເຂົ້າຊື້ເກີບຄູ່ລະ ແປດລ້ານ ເຂົາມີ ແປບສິບຕື້ ເຈົ້າມີບໍ່ພໍສູນຈຸດຫ້າຕື້ ແຕ່ຢາກຊື້ຄູ່ລະແປດລ້ານຄືເຂົາ ມັນກະບໍ່ເປັນ! ຖ້າແນມໄປເບິ່ງຄົນທີ່ດ້ອຍກວ່າເຮົາ ເບິ່ງເທື່ອດຽວເຈົ້າກະຮູ້ແລ້ວວ່າເຈົ້າໂຊກດີຊຳໃດ!! ເຈົ້າກິນມື້ລະສາມຄາບ ແຕ່ເຂົາກິນຄາບລະສາມມື້ ກະເຫັນລະເດະ. ຖ້າເຈົ້າຊອກຫາວິທີວ່າຈະເຮັດຈັ່ງໃດ ໃຫ້ການເງິນໃນຄອບຄົວດີຂຶ້ນ ເຈົ້າອາດຈະມີແວວລວຍ

ບາງຄົນວ່າ “ບາດມີຄອບຄົວ ມີລູກ ມີພາລະມາກ່ອນຈະຮູ້ສຶກ ວ່າທີ່ເວົ້າມັນບໍ່ງ່າຍ” ແຕ່ຂ້ອຍວ່າເຮົາຄວນຮູ້ສຶກ ແລະ ວ່າງແຜນກ່ອນຈຶ່ງມີລູກ ມີພາລະ ອັນນີ່ ຖືກກວ່າ, ບໍ່ມີເງິນເດືອນ ແຕ່ຢາກແຕ່ງເມຍ ບໍ່ມີເງິນຊື້ນົມ ແຕ່ຢາກມີລູກ ຄິດຊື່ໆກະ ຜິດ ແລ້ວ

ຜົວເມຍຄວນຊ່ວຍກັນເພີ່ມພູນຜະລິດຜົນ ບໍ່ແມ່ນມານັ່ງຄິດວ່າໃຜຫາໄດ້ຫຼາຍ ໃຜຫາໄດ້ໜ້ອຍ ເພາະບໍ່ວ່າຈະຜົວຫາ ຫຼື ເມຍຫາ ເງິນ ກະຕ້ອງເອົາມາໃຊ້ໃນຄອບຄົວ ແລະ ທີ່ສຳຄັນຄວນຄິດກ່ອນຈະຈ່າຍ ບໍ່ແມ່ນຈ່າຍແລ້ວ ລະມາຈົ່ມ.

ມີຫຼາຍມີໜ້ອຍບໍ່ສຳຄັນ ຖ້າບໍລິຫານມັນໄດ້ ຊີວິດຄູ່ກະ OK!! ຢູ່

ທີ່ມາ: ອັດສະວິນ ເດວຽງໄຊ