ໝົດຄວາມຫວັງໃນການຊອກຫາສົບຜູ້ເສຍຊີວິດທັງ 7 ຄົນແລ້ວ

ທ່ານ ເຈົ້້າເມືອງວຽງໄຊ ໄດ້ກ່າວວ່າ ເຊື່ອວ່າ 7 ຄົນ ທີ່ສູນຫາຍ ອາດໄຫຼໄປຕາມນ້ຳເຂົ້າເມືອງກອນ ເຊີນ ແຂວງ ແທງຮົວ ປະເທດຫວຽດນາມ ແລ້ວ ເພາະຊາຍແດນຫວຽດນາມຫ່າງຈາກຈຸດທີ່ເກີດເຫດພຽງແຕ່ 3 ກິໂລແມັດເທົ່ານັ້ນ ສະນັ້ນຈະໄດ້ມີການປະສານສົມທົບ ຕື່ມກັບຝ່າຍຫວຽດນາມ ເພື່ອຊອກຄົ້ນຊ່ວຍຕື່ມ, ທ່ານ ພອນສຸກ ອະທິບາຍວ່າ ຫຼາຍທ່ານຖາມວ່າຜູ້ສູນຫາຍບໍ່ແມ່ນ ຖືກຂີ້ຕົມຖົມຢູ່ພື້ນຫ້ວຍບໍ ຄຳຕອບກໍ່ຄືວ່າເປັນໄປບໍ່ໄດ້ເພາະພື້ນ ຫ້ວຍບໍ່ມີຂີ້ຕົມມີແຕ່ເປັນຫີນເພາະວ່າ ດິນ ຫຼື ຂີ້ຕົມຖືກນ້ຳພັດໄປໝົດແລ້ວ.

ຍັງເຫຼືອແຕ່ດອນຊາຍຊຶ່ງມີເນື້ອທີປະ ມານ 1,600 ຕາແມັດເທົ່ານັ້ນທີ່ຍັງບໍ່ໄດ້ຄົ້ນ ສວ່ນນອກນັ້ນແມ່ນໄດ້ຄົ້ນລະອຽດ ໜົດແລ້ວ, ດອນດັ່ງກ່າວເປັນດອນຊາຍທີ່ນ້ຳພັດ ເອົາດິນໄປໃສ່ມີຄວາມໜາປະມານ 2 ແມັດ ແລະ ທາງການຈັດຕັ້ງທ້ອງຖິ່ນພ້ອມດ້ວຍ ເຈົ້າໜ້າທີ່ທີ່ກ່ຽວຂ້ອງ ແລະ ທະຫານ ກຳລັງຊອກຄົ້ນຫາຢູ່ດອນດັ່ງກ່າວນັບແຕ່ຕອນເຊົ້າມື້ນີ້ 12/8/2019, ທ່ານ ພອນສຸກ ອິນທະວົງ ເຈົ້າເມືອງ ເມືອງວຽງໄຊ ໄດ້ກ່າວຕໍ່ທີມງານວຽງຈັນທາຍ ມື້ວານນີ້ 11/8/2019 ວ່າ ໄດ້ມີການຄົ້ນຫາຜູ້ສູນຫາຍດັ່ງກ່າວ ແບບລະອຽດແລ້ວໃນເນື້ອທີ່ ເກີດອຸທົກກະໄພນັ້ນ ແຕ່ກໍ່ຍັງບໍ່ທັນເຫັນ.

ເຈົ້າໜ້າທີ່ກ່ຽວຂ້ອງ, ປະຊາຊົນ ແລະ ທະຫານ ຈຳນວນ 200 ກວ່າຄົນ ໄດ້ໃຊ້ກົນຈັກຊ່ວຍ ເພື່ອຊອກຫາ 7 ຄົນທີ່ສູນຫາຍ ຈາກດິນເຈື່ອນທັບທີ່ບ້ານຫີນດຳ, ເມືອງວຽງໄຊ ແຂວງຫົວພັນ ຢ່າງລະອຽດ ໃນວັນເສົາ ແລະ ວັນອາທິດ (10-11/8/2019) ທີ່ຜ່ານມາ ແຕ່ກໍ່ຍັງບໍ່ພົບ.

ຂ່າວ : ສົມພາວັນ | ພາບ: ຫ້ອງການ ຖວທ ເມືອງວຽງໄຊ | ທີ່ມາ: ໜັງສືພິມວຽງຈັນທາຍ