ບ່າວ ບຸນລ້ອມ ໄຊຍະສອນ ນັກຮຽນເກັ່ງລະດັບປະເທດ

ບ່າວ ບຸນລ້ອມ ໄຊຍະສອນ ບອກໄດ້ເລີຍວ່າບ່າວຄົນນີ້ ເປັນຄົນມີຄວາມຮູ້, ຄວາມສາມາດ ແລະ ຮຽນດີ ຮຽນເກັ່ງ ມາຕັ້ງແຕ່ຕອນຍັງນ້ອຍໆ ແລະ ສາມາດຮັກສາມູນເຊື້ອການສຶກສາຄົ້ນຄວ້າຮ່ຳຮຽນ ໄດ້ຢ່າງຄົງເສັ້ນຄົງວາຕະຫລອດມາ ດ້ວຍຄວາມຕັ້ງໃຈ, ຄວາມມານະອົດທົນ ແລະ ບໍ່ຍອມແພ້ຕໍ່ກັບບັນຫາຕ່າງໆທີ່ເກີດຂຶ້ນ. ແນວໃດກໍຕາມທາງແອັດມິນກໍຂໍສະແດງຄວາມຍິນດີ ແລະ ຊົມເຊີຍຕໍ່ກັບຜົນສຳເລັດໃນການສຶກສາຄັ້ງນີ້ດ້ວຍ ແລະ ໃນອະນາຄົດບໍ່ວ່າຈະໄປປະກອບອາຊີບຫຍັງກໍຂໍໃຫ້ມີຄວາມກ້າວຫນ້າຕະຫລອດໄປ.

ນອກຈາກການຮຽນທີ່ໂດດເດັ່ນແລ້ວ ບ່າວຄົນນີ້ຍັງເປັນຄົນທີ່ມີຄວາມມັກຮັກໃນດ້ານກິດຈະກຳຕ່າງໆ ນັບຕັ້ງແຕ່ຕອນຍັງເປັນນັກຮຽນຈົນກ້າວເຂົ້າສູ່ການເປັນນັກສຶກສາໃນມະຫາວິທະຍາໄລ. ພ້ອມນັ້ນ, ບ່າວຄົນນີ້ຍັງມີໂອກາດເຂົ້າຮ່ວມໂຄງການແລກປ່ຽນອື່ນໆທັງພາຍໃນ ແລະ ຕ່າງປະເທດ ຊຶ່ງລ່າສຸດກໍໄດ້ເປັນຕົວແທນຂອງນັກສຶກສາ ຄນລ ເຂົ້າຮ່ວມແລກປ່ຽນຢູ່ທີ່ ໂຕກຽວ ປະເທດ ຍີ່ປຸ່ນ ພາຍໃຕ້ຫົວຂໍ້ “ການພັດທະນາທີ່ຢືນຍົງ ແລະ ກົດຫມາຍ”. ບໍ່ພຽງແຕ່ເທົ່ານີ້, ໃນຍາມທີ່ເປັນນັກສຶກສາບ່າວຄົນນີ້ກໍທັງຮຽນ ແລະ ຫາເງິນໄປພ້ອມ ຊຶ່ງໄດ້ເປັນຄູສອນພາສາອັງກິດໃຫ້ນ້ອງໆນັກຮຽນປະຖົມ ແລະ ມັດທະຍົມ ຢູ່ສູນພາສາອັງກິດ ອໍກັສ ແລະ ຄ້າຂາຍ ໄປພ້ອມໆກັນ.

ຈາກນັກຮຽນເກັ່ງລະດັບຊາດສູ່ໃບປະກາສະນີຍະບັດແດງ ຄົນທີ 3 ຂອງພາກວິຊາ ກົດຫມາຍອາຍາ. ຍັງຈື່ບ່າວເມືອງ ມໍລະດົກໂລກ ຄົນນີ້ໄດ້ບໍ… ບ່າວຄົນນີ້ມີຊື່ວ່າ ບຸນລ້ອມ ໄຊຍະສອນ (ອ້າຍ). ບຸນລ້ອມ ມີຖານຖິ່ນກຳເນີດຢູ່ ບ້ານຫນອງຂຽວ, ເມືອງງອຍ, ແຂວງຫລວງພະບາງ. ປັດຈຸບັນຢູ່ ບ້ານຫາດຮ່ຽນ, ນະຄອນຫຼວງພະບາງ, ແຂວງຫລວງພະບາງ.

ບ່າວຄົນນີ້ ເຄີຍເປັນອະດີດ ນັກຮຽນເກັ່ງລະດັບຊາດ ອັນດັບທີ 2 ສາຍວິຊາ ພາສາລາວ-ວັນນະຄະດີ ຊັ້ນມັດທະຍົມສຶກສາຕອນຕົ້ນ ມ 4 ສົກຮຽນ 2012 – 2013 ແລະ ຊັ້ນມັດທະຍົມສຶກສາຕອນປາຍ ມ 7 ສົກຮຽນ 2015 – 2016, ໄດ້ຮັບກຽດນິຍົມອັນດັບ 1 ຈາກວິທະຍາໄລລາວນານາຊາດ ແລະ ລ່າສຸດໃນມື້ວັນທີ 09 ຕຸລາ 2020 ກໍໄດ້ກາຍເປັນເຈົ້າຂອງໃບປະກາສະນີຍະບັດແດງ ຫລື ກຽດນິຍົມ ເປັນຄົນທີ 3 ຂອງພາກວິຊາ ກົດຫມາຍອາຍາ, ຄະນະ ນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ ດ້ວຍຄະແນນສະເລ່ຍສະສົມ 3,97.