ເສຍຊີວິດສູນຫາຍ 30 ກວ່າຄົນຈາກໄພນ້ຳຖ້ວມທີ່ຫວຽດນາມ

ເຫດນ້ຳຖ້ວມຈາກພາຍຸໝູນເຂດຮ້ອນຖະຫຼົ່ມ ແລະຍັງ​ມີ​ສັດລ້ຽງ ​ປະ​ເພດ​ງົວ ​ແລະ ​ສັດ​ປີກ 150.800 ​ໂຕ ຕ້ອງຕາຍ ຫລື​ ຖືກ​ກະ​ແສ​ນ້ຳ​ພັດ. ຂະນະ​ນີ້ ຫວຽດນາມ ຍັງ​ກຽມ​ຮັບ​ມື​ກັບ​ພາຍຸ​ຫົວ​ໃໝ່ ທີ່​ພວມ​ເຄື່ອນ​ຕົວ​ ມາ​ຈາກ​ທະ​ເລ​ຈີນ​ໃຕ້ ​ແລະ ຄາດ​ວ່າ ​ຈະ​ສົ່ງ​ຜົນ​ໃຫ້​ເກີດ​ຝົນຕົກ​ໜັກ​ອີກ​ຄັ້ງ. ຂະນະ​ທີ່ ກອງທັບ​ຫວຽດນາມ ນຳ​ໃຊ້​ເຮີ​ລີ​ກົບ​ແຕ້ ອອກ​ປະຕິບັດ​ການ​ຊ່ວຍ​ເຫລືອ ຊາວ​ປະມົງ 8 ຄົນ​ໃນທ້ອງ​ທະ​ເລ ທີ່​ມີ​ຄື້ນລົມ​ພັດ​ຮຸນ​ແຮງ ​ຂອງ​ແຂວງ​ກວ໋າງຈິ.​

ໃນ​ຈຳນວນ​ນີ້ ມີ​ຊາວ​ປະມົງ ​ເສຍ​ຊີວິດ 3 ຄົນ ​ແລະ ອີກ 3 ຄົນ​ສູນຫາຍ. ຂະນະ​ນີ້ ​ເຈົ້າໜ້າ​ທີ່​ກ່ຽວຂ້ອງ ​ໄດ້​ຍົກຍ້າຍ​ປະຊາຊົນ 45.800 ກວ່າ​ຄົນ​ ອອກ​ຈາກ​ພື້ນ​ທີ່. ສ່ວນ​ເຮືອນ​ປະຊາຊົນ 109.000 ກວ່າ​ຫລັງ ຖືກ​ນ້ຳ​ຖ້ວມ​ຂັງ ​ແລະ ມີ 382 ຫລັງ​ໄດ້​ຮັບ​ຄວາມ​ເສຍ​ຫາຍ​ຢ່າງ​ໜັກ. ​ເນື້ອ​ທີ່​​ນາ ​ໄດ້​ຮັບ​ຄວາມ​ເສຍ​ຫາຍ ​ເກືອບ 580 ​ເຮັກຕາ ​ແລະ ພື້ນ​ທີ່​ປູກຝັງ 38.000 ກວ່າ​ເຮັກຕາ ຖືກ​ນ້ຳ​ຖ້ວມ​ຂັງ.

ວັນ​ທີ 12​ ຕຸລາ​ ນີ້, ຄະນະກຳມະການສູນ​ກາງ ​ເພື່ອ​ຂັບ​ເຄື່ອນ ຄວບ​ຄຸມ ​ແລະ ປ້ອງ​ກັນ​ໄພ​ທຳ​ມະ​ຊາດ ​ຂອງ​ຫວຽດນາມ​ ຖະ​ແຫລ​ງວ່າ ມີ​ຜູ້​ປະສົບ​ໄພ​ນ້ຳ​ຖ້ວມ ​ເຂດ​ຊົນນະບົດ​ ຂອງ​ແຂວງເຖືອ​ທຽນ​ເວ້, ກວ໋າງນາມ, ກວ໋າງບິ່ງ, ກວ໋າງຈິ ​ແລະ ກວ໋າງງາຍ ​ເຮັດ​ໃຫ້​ມີ​ຜູ້​ເສຍ​ຊີວິດ 18 ຄົນ ​ແລະ ​ສູນຫາຍ​ອີກ 14 ຄົນ ຍ້ອນກະ​ແສ​ນ້ຳ​ໄຫລພັດຢ່າງຮຸ​ນ​ແຮງ​.