ພິທີມອບ-ຮັບເຮືອນພັກຖາວອນ ໃຫ້ປະຊາຊົນທີ່ປະສົບໄພພິບັດ ຢູ່ເມືອງສະໜາມໄຊແຂວງອັດຕະປື

ວັນທີ 11 ພະຈິກ 2020 ນີ້ແຂວງອັດຕະປື ໄດ້ຈັດພິທີມອບ-ຮັບເຮືອນພັກຖາວອນໃຫ້ປະຊາຊົນທີ່ປະສົບໄພພິບັດ ຢູ່ເມືອງສະໜາມໄຊ ພາຍຫຼັງທີ່ສໍາເລັດການກໍ່ສ້າງໃນເບື້ອງຕົ້ນຈໍານວນ 66 ຫຼັງທີ່ສູນພັກຊົ່ວຄາວບ້ານດົງບາກໃໝ່ຫີນຄໍາ ແລະ ສູນພັກຊົ່ວຄາວດອນບົກ,ເຊິ່ງພິທີໄດ້ຈັດຂື້ນຢ່າງເປັນທາງການທີ່ສູນພັກຊົ່ວຄາວບ້ານດົງບາກໃໝ່ຫີນຄໍາ,

ໃຫ້ກຽດເຂົ້າຮ່ວມຂອງທ່ານນາງ ມີນາພອນ ໄຊສົມພູ ຮອງເລຂາພັກ ຫົວໜ້າຄະນະຈັດຕັ້ງ ແຂວງອັດຕະປື.ມີການນໍາຂອງແຂວງ,ເມືອງ ພ້ອມດ້ວຍອໍານາດການປົກຄອງບ້ານ ແລະ ປະຊາຊົນ ເຂົ້າຮ່ວມ . ສໍາລັບໂຄງການກໍ່ສ້າງເຮືອນພັກຖາວອນຂອງປະຊາຊົນທີ່ຖືກຜົນກະທົບນ້ຳຖ້ວມຈາກເຂື່ອນໄຟຟ້າເຊປຽນ-ເຊນໍ້ານ້ອຍແຕກໃນທ້າຍປີ 2018 ຜ່ານມາ,ທີ່ສໍາເລັດການກໍ່ສ້າງໃນເບື້ອງຕົ້ນຈຳນວນ 66 ຫຼັງ ຄັ້ງນີ໊ ມີຢູ່ເຂດດົງບາກຈໍານວນ 46 ຫຼັງ ແລະ ເຂດດອນບົກມີຈໍານວນ 20 ຫຼັງ,

ມີມູນຄ່າທັງໝົດ 9,​4​ ຕື້ກີບ​ ໂດຍແມ່ນທຶນ ຊ່ວຍເຫຼືອລ້າຂອງລັດຖະບານ ແລະ ປະຊາຊົນປະເທດຍີປຸ່ນ,ເຮືອນພັກຖາວອນທັງ 66 ຫລັງດັ່ງກ່ວ ໂຄງສ້າງເຮັດດ້ວຍເບຕົງເສີມເຫຼັກ,ຝາເຮືອນກໍ່-ໂບກ ແລະ ມຸງດ້ວຍກະເບື້ອງ .ໂອກາດດັ່ງກ່າວທ່ານ ທາເກະ ວາກະເຄໂຊ ເອກອັກຄະລະສະທູດຍີ່ປຸ່ນປະຈຳລາວ ກໍ່ໄດ້ກ່າວມອບເຮືອນຈໍານວນ 66 ຫຼັງດັ່ງກ່າວ ໃຫ້ອຳນາດການປົກຄອງບ້ານ ກໍ່ຄືປະຊາຊົນ ເພື່ອນໍາໃຊ້ໃນຂັ້ນຕໍ່ໄປ.

ໂອກາດດັ່ງກ່າວທ່ານນາງ ມີນາພອນ ໄຊສົມພູ ຮອງເລຂາພັກ ແຂວງອັດຕະປື ໄດ້ຕາງໜ້າອໍານາດການປົກຄອງແຂວງ ກ່າວສະແດງຄວາມຂອບໃຈມາຍັງລັດຖະບານຍີ່ປຸ່ນ ແລະ ປະຊາຊົນປະເທດຍີປຸ່ນ ລວມທັງໂຄງການຍູເອັນ ຮາບີຕັດ ປະຈໍາລາວ

ທີ່ໄດ້ໃຫ້ການສະໜັບສະໜູນຊ່ວຍເຫຼືອທາງດ້ານທືນຮອນ ສ້າງເຮືອນຢູ່ອາໄສໃຫ້ປະຊາຊົນ ທີ່ປະສົກໄພພິບັດ ຢູ່ເມືອງສະໜາມໄຊ ຈົນສຳເລັດ.ພ້ອມທັງຕາງໜ້າໃຫ້ປະຊາຊົນ ສັນຍາວ່າຈະສືບຕໍ່ປົກປັກຮັກສາ ແລະ ນໍາໃຊ້ເຮືອນທີ່ປຸກສ້າງສໍາເລັດໃນຄັ້ງນີ້ໃຫ້ເກີດປະໂຫຍດສູງສຸດ.

ຂ່າວ: ສິດຕິພອນ ສຸວັນນະວົງ