5 ປີມ້າງຄະດີຢາໄດ້ 13 ພັນກວ່າເລື່ອງ

ປັດຈຸບັນ, ບັນຫາຢາເສບຕິດ ໄດ້ແຜ່ລາມແຕ່ຕົວເມືອງ ໄປສູ່ຊົນນະບົດໃນຫຼາຍລະດັບ ທີ່ແຕກຕ່າງກັນ ໂດຍກຸ່ມຄົນບໍ່ດີທີ່ລັກລອບຄ້າຂາຍ. ເຊິ່ງພວກເຂົາໄດ້ພະຍາຍາມຊອກຫາທຸກວິທີທາງ ເພື່ອເຄື່ອນໄຫວລັກລອບ, ລໍາລຽງຂົນສົ່ງຢາເສບຕິດ ແລະ ສານເຄມີ ຈາກປະເທດໃກ້ຄຽງ ຜ່ານ ສປປ ລາວ ໄປຍັງປະເທດທີ່ 3 ໂດຍອາໄສຈຸດພິເສດທີ່ຕັ້ງພູມສັນ ຖານຢູ່ໃນແຕ່ລະທ້ອງຖິ່ນ ດ້ວຍຫຼາຍຮູບແບບວິທີການ. ເຊິ່ງໃນໄລຍະ 5 ປີ ຜ່ານມາ ສາມາດມ້າງຄະດີຢາເສບຕິດ ໄດ້ 13.735 ເລື່ອງ,ຈັບຜູ້ຖືກຫາໄດ້ 20.221 ຄົນ ຢຶດຢາເສບຕິດ ປະເພດຕ່າງໆໄດ້ຫຼາຍໂຕນ. ພົຈວ ຄຳກິ່ງ ຜຸຍຫຼ້າມະນີວົງ ຫົວໜ້າກົມໃຫຍ່ຕໍາຫຼວດ ກະຊວງ ປກສ ກ່າວວ່າ: ໃນ 5 ປີຜ່ານມາ, ເຈົ້າໜ້າທີ່ປ້ອງກັນຄວາມສະຫງົບ ໄດ້ເອົາໃຈໃສ່ປະຕິບັດມາດຕະການດ້ານກົດ ໝາຍໃນການສະກັດກັ້ນ ແລະ ຕ້ານຢາເສບຕິດຢ່າງມີຄວາມຕັ້ງໜ້າ; ໃນໄລຍະປີ 2015-2019 ທົ່ວປະເທດ ສາມາດມ້າງຄະ ດີຢາເສບຕິດ ໄດ້ 13.735 ເລື່ອງ,ຈັບຜູ້ຖືກຫາໄດ້ 20.221 ຄົນ ຍິງ 2.714 ຄົນ.

ໃນນີ້, ມີຄົນຕ່າງປະເທດ 403 ຄົນ, ສາມາດຢຶດຢາເສບຕິດ ປະເພດ ເຮໂຣອິນໄດ້ 943,94 ກິໂລກຼາມ, ກັນຊາ 10.653,53 ກິໂລກຼາມ, ຢາບ້າ 6.867,29 ກິໂລກຼາມ, ຢາໄອສ໌ 8.757,43 ກິໂລກຼາມ,ຝິ່ນ 577,25 ກິໂລກຼາມ, ແປ້ງຝຸ່ນປະສົມຢາເສບຕິດ 21.645,74 ກິໂລກຼາມ ແລະ ສານອື່ນໆອີກຈໍານວນໜຶ່ງ; ເຖິງແມ່ນວ່າເຈົ້າໜ້າທີ່ຈະເອົາໃຈໃສ່ສະກັດກັ້ນ ແລະ ແກ້ໄຂບັນຫາຢາເສບຕິດໄດ້ຢ່າງຕໍ່ເນື່ອງກໍຕາມ. ແຕ່ບັນຫາຢາເສບຕິດ ກໍບໍ່ມີທ່ວງທ່າທີ່ຈະຫຼຸດລົງ. ໃນສະພາບການຄວາມເປັນຈິງ ແລະ ພາວະວິໄສດັ່ງກ່າວນັ້ນ, ກະຊວງ ປກສ ໄດ້ສ້າງແຜນຍຸດທະສາດ ການຄວບຄຸມ, ສະກັດກັ້ນ ແລະ ຕ້ານຢາເສບຕິດຢູ່ ສປປ ລາວ ແຕ່ປີ 2020-2025 , ວິໄສທັດຮອດ ປີ 2030 ເພື່ອປົກປັກຮັກສາ ຄວາມໝັ້ນຄົງຂອງຊາດ, ສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍ-ຄວາມປອດໄພ ແລະ ເຮັດໃຫ້ສັງຄົມລາວ ປອດຢາເສບຕິດ.