ແຂວງບໍ່ແກ້ວປະຈຸບັນເປັນເຂດທີ່ມີຄວາມສ່ຽງໂຄວິດ-19

ຫົວຫນ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ຂັ້ນແຂວງ ຂໍຖືເປັນກຽດຢ່າງສູງ ແຈ້ງມາຍັງບັນດາທ່ານ ຊາບວ່າ: ເພື່ອເປັນການຍົກສູງສະຕິສັງ ຄົມ ໃນການດໍາລົງຊີວິດປົກກະຕິແບບໃຫມ່ (New Normal Life) ແລະ ປະຕິບັດມາດຕະການໂຕ້ ຕອບໄວ ຕໍ່ການລະບາດຂອງພະຍາດໂຄວິດ-19 ໃຫ້ນັບມື້ເຂັ້ມງວດຍິ່ງຂຶ້ນ ເນື່ອງຈາກແຂວງບໍ່ແກ້ວພວກ ເຮົາ ປະຈຸບັນເປັນເຂດທີ່ມີຄວາມສ່ຽງ ຈຶ່ງໄດ້ແຈ້ງການເພີ່ມເຕີມດັ່ງນີ້:

1. ໃຫ້ໂຈະການຈັດງານບຸນປະເພນີບັນດາເຜົ່າ (ບຸນກິນຈຽງ, ບຸນເຕັດນົມ, ບຸນກິນວໍ, ນໍເປເຈົ້າ, ງານບວດ ງານແຕ່ງດອງ, ອອກກໍາເດືອນ, ງານຂື້ນເຮືອນໃຫມ່, ງານສົບ.. ທີ່ມີລັກສະນະກວ້າງຂວາງ (ຫຼາຍຄົນ) ໃຫ້ຫັນມາປະກອບພິທີການທາງສາສະຫນາຕາມຮີດຄອງພາຍໃນຄອບຄົວ, ພາຍໃນ ບ້ານເທົ່ານັ້ນ, ຈໍາກັດການເຂົ້າຮ່ວມຂອງຄົນທີ່ມີຈໍານວນຄົນຫຼາຍ, ແອອັດ, ທັງນີ້ກໍ່ເພື່ອເປັນການຮັກສາຮີດຄອງປະເພນີອັນດີງາມຂອງຊາດ, ຂອງເຜົ່າ ແລະ ຫຼຸດຜ່ອນການຫຼິ້ນກິນແບບຟຸມເຟືອຍ.

2. ການຈັດງານສະເຫຼີມສະຫຼອງວັນສໍາຄັນຕ່າງໆ ແລະ ຈັດກິດຈະກໍາ ຂອງສັງຄົມ ຕ້ອງໄດ້ກໍານົດເປົ້າຫມາຍເຂົ້າຮ່ວມຢ່າງເຫມາະສົມ ພ້ອມທັງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ຢ່າງເຂັ້ມງວດ ເຊັ່ນ: ການຮັກສາໄລຍະຫ່າງ 1 ແມັດຂຶ້ນໄປ, ໃສ່ຜ້າອັດປາກ-ດັ່ງ, ມີນ້ໍາສະອາດ, ເຈວ ຫຼື ສະບູລ້າງມື ແລະ ມີແພດປະຈໍາກວດວັດແທກອຸນຫະພູມ.

3. ມອບໃຫ້ຂະແຫນງການທີ່ກ່ຽວຂ້ອງ ຂອງແຂວງ ສົມທົບຂັ້ນເມືອງ ລົງກວດກາ, ຊຸກຍູ້, ປະເມີນບັນດາບ້ານພັກ, ໂຮງແຮມ, ຣີສອດ ໃຫ້ປະຕິບັດຫຼັກການອະນາໄມ 3 ສະອາດເປັນປະຈໍາເປັນຕົ້ນ: ປ່ຽນສົບຫມອນ, ຜ້າປູ, ຜ້າຫົ່ມ, ຜ້າເຊັດ, ຈອກນໍ້າ, ໃຊ້ນໍ້າຢາເຊັດຖຸໃນຫ້ອງນອນ, ຫ້ອງນໍ້າ, ຊຸດ ເຟີນີເຈີທຸກໆວັນ; ສໍາລັບຮ້ານອາຫານ, ຮ້ານກິນດື່ມ, ຕະຫຼາດ ໃຫ້ອະນາໄມບໍ່ໃຫ້ມີເປື້ອນເປີະ ຕົກຄ້າງ, ແມ່ຄ້າຕ້ອງໃຫ້ໃຊ້ຜ້າອັດປາກ-ດັ່ງທຸກຄົນ, ມີເຈວໃສ່ ຫຼັງມີການສໍາພັດແລກປ່ຽນ, ມີບ່ອນລ້າງມື, ສະບູບໍລິການໃຫ້ລູກຄ້າໃສ່ຫຼັງຈັບຈ່າຍສິນຄ້າ

4. ໃຫ້ບັນດາເມືອງ, ອົງການປົກຄອງແຕ່ລະຂັ້ນ, ເຂດເສດຖະກິດພິເສດສາມຫຼ່ຽມຄໍາ, ບັນດາຫົວຫນ່ວຍທຸລະກິດ ກໍ່ຄືຜູ້ປະກອບການດ້ານຕ່າງໆພາຍໃນແຂວງ ເພີ່ມທະວີການແນະນໍາ, ຊຸກຍູ້ການ ຈັດຕັ້ງປະຕິບັດເນື້ອໃນແຈ້ງການສະບັບນີ້ໃນຂອບເຂດຮັບຜິດຊອບຂອງຕົນ ໃຫ້ທົ່ວເຖິງ, ທັນເວລາ.

ແຈ້ງການສະບັບນີ້ນໍາໃຊ້ໄດ້ ນັບແຕ່ວັນລົງລາຍເຊັນເປັນຕົ້ນໄປ ຈົນກວ່າສະພາບການລະບາດຂອງພະຍາດໂຄວິດ-19 ສາມາດຄວບຄຸມໄດ້. ດັ່ງນັ້ນ, ຈຶ່ງແຈ້ງມາຍັງບັນດາທ່ານ ເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້ ໃຫ້ໄດ້ຮັບຜົນເປັນຢ່າງດີດ້ວຍ.