ຈູດບັ້ງກະໂພກກໍ່ສຽງເນືອງນັນສຸດທ້າຍຖືກປັບໄໝ

ປະຕິບັດຕາມແຈ້ງການທຸກປະການໃຜຂາຍ, ໃຊ້ວັດຖຸທີ່ກໍ່ໃຫ້ເກີດສຽງເນືອງນັນຈັບໄດ້ຢືດເຄື່ອງ ກ່າວເຕືອນພ້ອມປັບໃໝຕາມລະບຽບການ, ຫຼ້າສຸດນີ້ແມ່ນຜົນງານຂອງ ປກສ ກຸ່ມໜອງດ້ວງ. ອາທິດຜ່ານມາ ເຈົ້າໜາທີ່ ປກສ ກຸ່ມໜອງດ້ວງ ເມືອງສີໂຄດຕະບອງ ນະຄອນຫຼວງວຽງຈັນ ສົມທົບກັບອຳນາດການປົກຄອງ 10 ບ້ານລົງເຜີຍແຜ່ຂໍ້ຕົກລົງເລກທີ 620 /ຈນວ ວ່າດ້ວຍການຄອບຄຸມສຽງເນືອງນັ້ນ ຢູ່ນະຄອນຫຼວງວຽງຈັນ,

ເຮັດບົດບັນທືກປ້ອງກັນຄວາມສະຫງົບ ພ້ອມທັງເຮັດໜ້າທີ່ກວດກາຫ້າງຮ້ານຕ່າງໆ, ໃນການລົງກວດກາຄັ້ງນີ້ ເຈົ້າໜ້າທີ່ ປກສ ກຸ່ມພົບເຫັນທ້າວ ອາເຊ້ ເຊື້ອຊາດ, ສັນຊາດຈີນ ພັກເຊົາ-ຄ້າຂາຍ ຢູ່ບ້ານໜອງດ້ວງທົ່ງ ກຳລັງເກັບ – ຊຸກເຊື່ອງໝາກກະໂພກ ແລະ ວັດຖຸກໍ່ໃຫ້ເກີດສຽງແຕກສຽງດັງເຊັ່ນ: ບັງໄຟດອກ 30 ບັ້ງ, ບັງຟຸໃຫຍ່ 22 ອັນ, ກະໂພກຊະນິດເປັນພວງ 2 ກັບ.

ຈາກນັ້ນເຈົ້າໜ້າທີ່ຈື່ງໄດ້ເຮັດບົດບັນທືກຢຶດ ແລະ ສືກສາອົບຮົມ ກ່າວເຕື່ອນໃຫ້ຢຸດເຊົາການນຳເຂົ້າ ແລະ ຊື້ຂາຍໂດຍເດັດຂາດ ເພາະມັນເປັນການລະເມີດຂໍ້ຕົກລົງເລກທີ 620/ຈນວລົງວັນທີ 29 ກັນຍາ 2020 ວ່າດ້ວຍການຄວບຄຸມສຽງເນືອງນັນ. ພ້ອມນີ້, ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງບັນດາເຈົ້າຂອງຫົວໜ່ວຍທຸລະກິດ,

ຮ້ານຂາຍເຄື່ອງ, ພໍ່ແມ່ປະຊາຊົນ, ຊາວໜຸ່ມ-ນັກຮຽນທົ່ວນະຄອນຫຼວງວຽງຈັນ ຈົ່ງຢຸດຕິການຊື້-ຂາຍ ແລະ ຈູດໝາກກະໂພກ, ບັ້ງໄຟດອກ ຕາມຂໍ້ຕົກລົງເລກທີ 620/ຈນວ ວ່າດ້ວຍການຄວບຄຸມສຽງເນືອງນັນ ແລະ ຈົ່ງພ້ອມກັນຈັດຕັ້ງປະຕິບັດຢ່າງເຂັ້ມງວດ ທັງນີ້ກໍ່ເພື່ອເປັນການຕ້ານສະກັດກັ້ນເຫດການທີ່ບໍ່ເພິ່ງປາຖະໜາທີ່ອາດຈະເກີດຂຶ້ນເຊັ່ນ: ອັກຄີໄພ, ບາດເຈັບຈາກການຈຸດໝາກກະໂພກ ແລະ ອື່ນໆ.