ຂໍຂອບໃຈຫຼາຍພາກສ່ວນຮ່ວມສົມທົບທຶນເພື່ອນໍາໄຟຟ້າເຂົ້າກຸຕິວັດ

ຊຶ່ງໃນອາທິດຜ່ານມາໄດ້ມີຫຼາຍພາກສ່ວນຮ່ວມສົມທົບທຶນເຂົ້າໃນການສ້າງກຸຕິວັດເປັນຕົ້ນແມ່ນຄອບຄົວຂອງທ່ານ ຄໍາຫຼ້າ ນາກຄະວົງ, ຄອບຄົວປະທານບໍລິສັດຂວັນເມືອງກຣຸບ, ຮອງປະທານສະພາການຄ້າ ແລະອຸດສາຫະກໍານະຄອນຫຼວງວຽງຈັນທັງເປັນທີ່ປຶກສາສະຫະພັນເປຕັງແຫ່ງຊາດລາວ; ນອກຈາກນີ້ຍັງມີຍາດໂຍມຖວາຍວັດຖຸປັດໄຈເປັນເງິນມູນຄ່າ 1,7 ລ້ານກີບ ເພື່ອຊື້ບານປະຕູໃສ່ກຸຕິວັດ ແລະຊ່ວຍຄ່າແຮງງານປັບບານປະຕູ ໃນນີ້ມີທ່ານ ຈັນທະບູນ ສຸກອາລຸນ ຜູ້ວ່າການໃຫຍ່ລັດວິສາຫະກິດໄຟຟ້າລາວ, ຄອບຄົວນາງ ດາ ລາແສງ ສຸກອາລຸນ ແລະຄອບຄົວຂອງທ່ານ ຄໍາຫວັ່ນ ແພງມະນີ.

ເມື່ອວັນທີ 7 ກັນຍາ 2020 ຜ່ານມາໄດ້ມີຫຼາຍພາກສ່ວນຮ່ວມສົມທົບທຶນເປັນຕົ້ນແມ່ນຄອບຄົວຂອງທ່ານ ຄໍາຫຼ້າ ນາກຄະວົງ ໄດ້ຖວາຍເງິນຈໍານວນ 51.310 ບາດ ຫຼືປະມານ 16 ລ້ານກວ່າກີບ ໃຫ້ວັດ ສຸຂສົມຫວັງໄຊຍະຣາມ ບ້ານນາໄຫ ເມືອງໄຊເສດຖາ ນະຄອນຄອນຫຼວງວຽງຈັນ ເພື່ອນໍາໄຟຟ້າເຂົ້າກຸຕິວັດ.

ພະອາຈານຖາວອນກົມມະເມືອງເຈົ້າອະທິການວັດສຸຂສົມຫັວງໄຊຍະຣາມກ່າວວ່າ: ວັດສຸຂສົມຫວັງໄຊຍະຣາມ ບ້ານນາໄຫ ເມືອງໄຊເສດຖາ ເຄີຍເປັນວັດຮ້າງມາຫຼາຍປີຕໍ່ມາພະອາຈານຖາວອນກົມມະເມືອງເຂົ້າມາຢູ່ຈຶ່ງເກີດມີຍາດໂຍມເຫຼື້ອມໄສສັດທາ, ວັດວາອາຮາມມີການພັດ ທະນາ ແລະມີການສົ່ງເສີມພະສົງສັມມະເນນໄດ້ສຶກສາຮໍ່າຮຽນ,

ສໍາລັບກຸຕິພຸດທະປາຣະມີສີຣິ ທຳໂມວັດສຸຂສົມຫວັງໄຊຍະຣາມແມ່ນສ້າງຂຶ້ນໃນເດືອນພຶດສະພາ 2017 ໂດຍການນໍາພາຂອງພະອາຈານຖາວອນກົມມະເມືອງປະຈຸບັນນີ້ທາງວັດສຸຂສົມຫວັງໄຊຍະຣາມແມ່ນມີຄວາມຕ້ອງການວັດຖຸປັດໄຈຈໍານວນຫຼາຍເປັນຕົ້ນແມ່ນປູນ, ເຫຼັກ ແລະອື່ນໆ ເພື່ອສ້າງກຸຕິພຸດທະປາຣະມີສີຣິທຳໂມໃຫ້ສໍາເລັດ,

ເຈົ້າອະທິການວັດສຸຂສົມຫວັງໄຊຍະຣາມໃຫ້ຮູ້ຕື່ມວ່າ: ໃນອະນາຄົດວັດສຸຂສົມຫວັງໄຊຍະຣາມ ບ້ານນາໄຫ ມີແຜນຈະສ້າງພະພຸດທະຮູບຊື່ວ່າ:“ ພະເຈົ້າໃຫ່ຍສຸຂສົມຫວັງ”ເພື່ອເປັນບ່ອນສັກກະລະບູຊາກາບໄຫ້ວ ແລະເປັນມິ່ງຂວັນຂອງຊາວພຸດລາວ.