ພາຍຸ ໂນອຶນ ພັດເຂົ້າສູ່ຫຼາຍແຂວງທາງພາກໄຕ້ຂອງ ສປປລາວ ແລ້ວເຮັດໃຫ້ຝົນຕົກໜັກ

ກົມອຸຕຸນິຍົມ ແລະ ອຸທົກກະສາດ ໄດ້ແຈ້ງເຕືອນໄພ ສະບັບທີ 2 ລະວັງຝົນຕົກໜັກໃນ 15 ແຂວງພາກເໜືອ, ພາກກາງ ແລະ ພາກໃຕ້ ເນື່ອງຈາກພາຍຸໜູນເຂດຮ້ອນ ໂນອຶນ ທີ່ຈະເຄື່ອນທີ່ພັດຜ່ານເຂົ້າປະເທດລາວ ໃນວັນທີ 18 ກັນຍານີ້. ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແຈ້ງເຕືອນໄພພາຍຸໜູນເຂດຮ້ອນ ເລກທີ 1241/ກອຕທ, ນະຄອນຫຼວງວຽງຈັນ,

ວັນທີ 17 ກັນຍາ 2020 ແຕ່ໄລຍະວັນທີ 18 ຫາ 20 ກັນຍານີ້ ສະບັບທີ 2 ເນື່ອງຈາກວ່າພາຍຸໝຸນເຂດຮ້ອນ ໂນອຶນ (Noul) ຫົວທີ່ 11 ປະຈຳປີ 2020 ໃນເວລາ 7:30 ໂມງຂອງວັນທີ 17 ກັນຍານີ້ ມີຈຸດສູນກາງຢູ່ເສັ້ນຂະໜານ 14.4 ອົງສາເໜືອ ແລະ ເສັ້ນແວງທີ່ 114.0 ອົງສາຕາເວັນອອກ ກຳລັງເຄື່ອນທີ່ມາທາງທິດຕາເວັນຕົກ -ຕາເວັນຕົກສ່ຽງເໜືອ ດ້ວຍຄວາມໄວ 15 ກິໂລແມັດຕໍ່ຊົ່ວໂມງ.

ຄາດຄະເນວ່າພາຍຸຫົວນີ້ ຈະຂຶ້ນພາກກາງຂອງ ສສ ຫວຽດນາມ ໃນຕອນຄໍ່າຂອງວັນທີ 17 ກັນຍາ 2020 ແລະ ຈະສືບຕໍ່ເຄື່ອນທີ່ຜ່ານບັນດາແຂວງພາກໃຕ້ ຂຶ້ນໄປພາກກາງ ແລະ ພາກເໜືອ ໃນວັນທີ 18 ຫາ ຕອນເຊົ້າວັນທີ 19 ກັນຍາ 2020 ນີ້. ຈາກນັ້ນຈະອ່ອນກໍາລັງລົງເປັນພາຍຸດີເປຼຊັ້ນ ຊຶ່ງຈະເຮັດໃຫ້ມີຝົນຕົກໜັກພ້ອມຈະມີລົມພັດແຮງຢູ່ບັນດາແຂວງພາກເໜືອ ລົງຫາພາກກາງ ແລະ ພາກໃຕ້ ໃນໄລຍະວັນທີ 18 ຫາ 20 ກັນຍາ 2020 ນີ້.

ສະນັ້ນ, ຈຶ່ງຂໍແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງທຸກພາກສ່ວນທີ່ອາໄສຢູ່ບັນດາແຂວງພາກເໜືອ, ພາກກາງ ແລະ ພາກໃຕ້ເຊັ່ນ: ແຂວງຫົວພັນ, ຊຽງຂວາງ, ບໍ່ແກ້ວ, ຫຼວງພະບາງ, ໄຊຍະບູລີ, ວຽງຈັນ, ນະຄອນຫຼວງວຽງຈັນ, ແຂວງໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈໍາປາສັກ, ເຊກອງ ແລະ ອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ

ທີ່ຈະເຮັດໃຫ້ມີຕົ້ນໄມ້ຫັກ ແລະ ເສົາໄຟຟ້າລົ້ມ, ເຮືອນເປ່ເພ, ນ້ຳຖ້ວມຊູ, ດິນເຈື່ອນ ແລະ ນ້ຳຖ້ວມອັ່ງ. ພ້ອມນີ້ກໍ່ໃຫ້ຕິດຕາມການແຈ້ງເຕືອນໄພຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ. ສະຖານະການຫຼ້າສຸດ ພາຍຸເຂດຮ້ອນ Noul ໄດ້ພັດເຂົ້າຝັ່ງທະເລພາກກາງຂອງຫວຽດນາມ, ລັດຖະບານວາງແຜນອົບພະຍົບປະຊາຊົນຫລາຍກວ່າ 500,000 ຄົນທີ່ອາດຈະໄດ້ຮັບຜົນກະທົບ. ຫວຽດນາມກຽມທີ່ຈະອົບພະຍົບປະຊາຊົນປະມານເຄິ່ງລ້ານຄົນໃຫ້ພົ້ນຈາກພາຍຸ“ ໂນອຶນ” ຄາດວ່າຈະພັດເຂົ້າຝັ່ງຫວຽດນາມໃນວັນສຸກ (18 ກັນຍາ) ດ້ວຍລົມແຮງເຖິງ 135 ກມ / ຊມ.

ລົມພາຍຸເຂດຮ້ອນ Noul ແມ່ນໄວກ່ວາ 200 ກິໂລແມັດ/ຊົ່ວໂມງ ,ເຄື່ອນມາທາງທິດຕາເວັນອອກສຽງໃຕ້ຂອງໝູ່ເກາະ ພາຣາແຊນ ໃນທະເລຈີນໃຕ້ ແລະ ກຳລັງມຸ່ງ ໜ້າສູ່ເສັ້ນຊາຍຝັ່ງທະເລຈາກແຂວງ(ກວາງບິ່ງ) ເຖິງເມືອງດານັງ ທ່ານຮອງນາຍົກລັດຖະມົນຕີ Trinh Dinh Dung ໄດ້ໃຫ້ຮູ້ວ່າ: “ ນີ້ແມ່ນພາຍຸທີ່ແຮງຫຼາຍ. ເຊິ່ງອາດຈະເຮັດໃຫ້ເກີດດິນເຈື່ອນໃນເວລາທີ່ມີກະແສລົມແຮງສູງ … ເຈົ້າ ໜ້າທີ່ແຂວງ ຈຳ ເປັນຕ້ອງໄດ້ຊ່ວຍເຫຼືອປະຊາຊົນຍົກຍ້າຍອອກ ປົກປ້ອງຊີວິດແລະ ຊັບສິນຂອງປະຊາຊົນ”.