ພົບແລ້ວໂຊເຟີລົດຕົກຂົວລົດໄຟ ລາວ-ຈີນ

ຮອດຕອນແລງຂອງວັນທີ່ 18 ກັນຍາ 2020 ເວລາ 18:02 ນາທີ ທີມງານໄດ້ຮັບແຈ້ງຈາກພີ່ນ້ອງຂອງຜູ້ເສຍຊີວິດວ່າພົບເຫັນຮ່າງຂອງຜູ້ເສຍຊີວິດຢູ່ບໍລິເວນຂົວ ເມືອງນານ-ທ່າເດື່ອ ແຂວງໄຊຍະບູລີ ເຊິ່ງໄກຈາກຈຸດທີ່ຕົກຫຼາຍກິໂລແມັດ. ທີມງານກູ້ຊີບອົງການກາແດງລາວອອກກວດສອບເຫດພົບຄົນເສຍຊີວິດເພດຊາຍ 1 ຄົນ ສັນຊາດລາວ ຊື່ທ້າວ ເພັງ ອາຍຸ 43 ປີ

ບ້ານຢູ່ປັດຈຸບັນ ບ້ານນູນສະຫວາດ ນະຄອນຫລວງພະບາງ ແຂວງຫລວງພະບາງ ສ່ວນສາເຫດຂອງການເສຍຊີວິດແມ່ນຜູ້ກ່ຽວໄດ້ຂັບລົດເຄນຍົກເຫລັກຢູ່ທີ່ຂົວລົດໄຟຢູ່ທີ່ບ້ານ ພອນໄຊ ນະຄອນຫລວງພະບາງ ແຕ່ລົດຍົກເຫລັກບໍ່ຂື້ນຈື່ງເຮັດໃຫ້ຜູ້ກ່ຽວເສຍການຊົງໂຕພາດຕົກລົງໄປໃນແມ່ນ້ຳຂອງແລະເສຍຊີວິດໃນທີ່ສຸດ

ຫນ່ວຍກູ້ຊີບອົງການກາແດງລາວຈື່ງໄດ້ທຳການທຳການຫໍ່ສົບຂອງຜູ້ເສຍຊີວິດແລ້ວນຳສົ່ງໂຮງເຢັນໂຮງຫມໍແຂວງຫລວງພະບາງ ແລະ ຈະມອບຕໍ່ໃຫ້ຍາດພີ່ນ້ອງໄປຊາປະນະກິດຕໍ່ໄປ. ທາງທີມງານຫນ່ວຍກູ້ຊີບອົງການກາແດງລາວ ຫລວງພະບາງພວກເຮົາຂໍສະແດງຄວາມເສຍໃຈມາຍັງຍາດຕິພີ່ນ້ອງຜູ້ເສຍຊີວິດ ແລະ ຂໍໃຫ້ດວງວິນຍານຂອງຜູ້ເສຍຊີວິດໄປສູ່ສຸຂະຕິດ້ວຍເທີ້ນ.

ຂ່າວກ່ອນໜ້ານີ້ ຫນ່ວຍກູ້ຊີບອົງການກາແດງລາວແຈ້ງໃຫ້ຮູ້ວ່າ ຈາກເຫດການລົດເຄນປີ້ນ ໃນຕອນແລງວັນທີ 15 ກັນຍາ 2020 ມີຄົນຕົກຂົວສູນຫາຍຢູ່ເສັ້ນທາງລົດໄຟ ບ້ານພອນໄຊ ນະຄອນຫລວງພະບາງ ທີມງານຫນ່ວຍກູ້ຊີບອົງການກາແດງລາວ ປະຈໍາແຂວງຫຼວງພະບາງ ໄດ້ອອກປະຕິບັດຫນ້າທີ່ດຳນ້ຳເພື່ອຄົ້ນຫາ, ເຊິ່ງໄດ້ນຳໃຊ້ເຮືອຄົ້ນຫາຈຸດທຳອິດຢູ່ທີ່ທ່າບ້ານຊຽງແກ້ວ ຫາຈຸດເກີດເຫດເປັນເວລາ 2 ວັນແຕ່ບໍ່ພົບ. ຈິ່ງໄດ້ຢຸດການຄົ້ນຫາຊົ່ວຄາວ.