ສາເຫດທີ່ຄົນລາວຍັງບໍ່ຕິດ COVID-19

ປະເທດລາວເປັນປະເທດໜຶ່ງທີ່ຖືກອ້ອມລ້ອມດ້ວຍບັນດາປະເທດທີ່ມີການແພ່ລະບາດແລະຕິດເຊື້ອ COVID-19 ໂດຍສະເພາະແມ່ນມີຊາຍແດນຕິດກັບປະເທດຈີນທີ່ມີການລະບາດຢ່າງຮ້າຍແຮງ. ດັ່ງນັ້ນ, ປະເທດລາວຈຶ່ງເປັນປະເທດທີ່ມີຄວາມສ່ຽງສູງທີ່ຈະມີຜູ້ຕິດເຊື້ອພະຍາດດັ່ງກ່າວ.

ແຕ່ເຖິງແນວນັ້ນກໍຕາມ, ມາຮອດມື້ນີ້ ວັນທີ 19 ມີນາ 2020 ປະເທດລາວກໍຍັງບໍ່ພົບຜູ້ຕິດເຊື້ອດັ່ງກ່າວ ຄົງມີແຕ່ຜູ້ຕ້ອງສົງໄສວ່າຕິດຈຳນວນເກືອບ 100 ຄົນ ແຕ່ຜ່ານການເກັບຕົວຢ່າງໄປວິເຄາະຜົນອອກມາກໍເປັນລົບ ຫຼືບໍ່ຕິດ.ດ້ວຍເຫດຜົນອັນໃດຈຶ່ງເປັນແນວນັ້ນ? ແມ່ນຄຳຖາມຂອງປະຊາຊົນພາຍໃນປະເທດລາວ.

ເຂົາເຈົ້າເກີດຄວາມສົງໄປຂຶ້ນຫຼາຍຢ່າງຄື ຢ້ານວ່າກວດພົບຜູ້ມີເຊື້ອ ໂຄວິດ-19 ແຕ່ວ່າລັດຖະບານປົກປິດຂໍ້ມູນ, ການຄັດຕອງຜູ້ຕ້ອງສົງໄສບໍ່ລະອຽດ, ເຄື່ອງມືການກວດວິເຄາະບໍ່ດີ, ຄວາມຮູ້ຂອງໝໍລາວບໍ່ສູງ ຕ່າງໆ ນານາ… ດັ່ງນັ້ນ, ມື້ນີ້ທີມຂ່າວພວກເຮົາຈຶ່ງໄດ້ສະຫຼຸບບັນດາເຫດຜົນທີ່ຄົນລາວຍັງບໍ່ຕິດໂລກດັ່ງກ່າວມາເລົ່າສູ່ຟັງດັ່ງນີ້:

1. ຍ້ອນປະຊາກອນລາວບໍ່ໜາແໜ້ນ ແລະຜູ້ທີ່ມີໂອກາດໃກ້ຊິດກັບຜູ້ຕິດເຊື້ອບໍ່ຫຼາຍ: ວິທີທີ່ດີທີ່ສຸດທີ່ຈະບໍ່ຕິດເຊື້ອຄືໃຫ້ຢູ່ຫ່າງຈາກຜູ້ຕິດເຊື້ອ ໃນຂະນະທີ່ປະຊາກອນລາວບໍ່ຫຼາຍ ຄວາມແອອັດບໍ່ຄ່ອຍມີ. ປະກອບກັບຄົນລາວທີ່ມີໂອກາດໄດ້ໃກ້ຊິດຫຼືໄປຢູ່ໃນເຂດທີ່ລະບາດຫຼາຍຂອງຕ່າງປະເທດນັ້ນແມ່ນມີຈຳນວນໜ້ອຍ. ຈະມີສະເພາະແຕ່ນັກສຶກສາ, ນັກການທູດ, ນັກທ່ອງທ່ຽວ ແລະຜູ້ໄປອອກແຮງງານ ແຕ່ຖ້າທຽບໃສ່ບັນດາປະເທດອ້ອມຂ້າງ ເຊັ່ນ ໄທ ແລະ ຫວຽດນາມ ແລ້ວ ຄົນລາວມີຈຳນວນໜ້ອຍ. (ສຳຄັນແມ່ນຍັງບໍ່ທັນມີໃຜນຳເຊື້ອເຂົ້າມາເທື່ອ).

2. ຄົນລາວເປັນຄົນຕື່ນຕົກໃຈໄວແລະບໍ່ປະໝາດ: ຄົນລາວເປັນຄົນຂ້ອນຂ້າງອ່ອນໄຫວກັບຂ່າວ ດັ່ງນັ້ນ, ຈຶ່ງເຮັດໃຫ້ເຂົາເຈົ້າຕື່ນໂຕໄວ, ຢ້ານເອົາໄວ້ກ່ອນ ແລ້ວຮີບຮ້ອນປ້ອງກັນໂຕເອງ. (ສຳຄັນແມ່ນຍັງບໍ່ທັນມີໃຜນຳເຊື້ອເຂົ້າມາເທື່ອ).

3. ລັດຖະບານລາວຮ່ວມກັບອົງການສາກົນ ມີມາດຕະການປ້ອງກັນຢ່າງທັນການ: ເລີ່ມແຕ່ເດືອນ ມັງກອນ ປີ 2020 ເປັນຕົ້ນມາ, ລັດຖະບານໄດ້ປະຕິບັດບາງມາດຕະການ ເພື່ອສະກັດກັ້ນ ແລະ ປ້ອງກັນ ແຕ່ຫົວທີ ເປັນຕົ້ນແມ່ນ ໄດ້ແຕ່ງຕັ້ງຄະນະສະເພາະກິດ ເພື່ອຊີ້ນຳການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດດັ່ງກ່າວ, ໂດຍແມ່ນທ່ານ ສົມດີ ດວງດີ, ຮອງນາຍົກລັດຖະມົນຕີ, ເປັນຫົວໜ້າຄະນະສະເພາະກິດ ດັ່ງກ່າວນັ້ນ ແລະ ປະກອບຄະນະຈາກພາກສ່ວນກ່ຽວຂ້ອງ, ຄະນະສະເພາະກິດດັ່ງກ່າວ ໄດ້ປະຕິບັດວຽກງານດ້ວຍຄວາມຮັບຜິດຊອບສູງຫຼາຍຢ່າງ, ໃນນັ້ນ ລວມເຖິງ:

– ໂຄສະນາເຜີຍແຜ່ໃຫ້ສັງຄົມ ກໍ່ຄືປະຊາຊົນເຂົ້າໃຈກ່ຽວກັບໄພອັນຕະລາຍ ແລະ ວິທີປ້ອງກັນ ເພື່ອຫຼຸດຜ່ອນຄວາມສ່ຽງໃນການຕິດເຊື້ອພະຍາດດັ່ງກ່າວ;
– ເຂັ້ມງວດກັ່ນຕອງຜູ້ເດີນທາງເຂົ້າມາໃນ ສປປ ລາວ ໂດຍການກວດອຸນນະພູມ ແລະ ຄັດແຍກຜູ້ສົງໄສຕິດເຊື້ອ ເພື່ອຫຼີກລ້ຽງຄວາມສ່ຽງຈາກການແຜ່ລະບາດຂອງພະຍາດ;

– ກວດສຸຂະພາບຂອງຜູ້ທີ່ຕົກຢູ່ໃນກໍລະນີສົງໄສ ເພື່ອຢັ້ງຢືນການບົ່ງມະຕິພະຍາດ ດ້ວຍເຄື່ອງມືທີ່ທັນສະໄໝມາດຕະຖານສາກົນ ຮ່ວມກັບອົງການອະນາໄມໂລກ.
– ກຽມຄວາມພ້ອມຂອງໂຮງໝໍ ເພື່ອຮອງຮັບການແຍກປ່ຽວຜູ້ສົງໄສຕິດເຊື້ອ ແລະ ຄຸ້ມຄອງກໍລະນີຖ້າມີຜູ້ຕິດເຊື້ອ.

4. ມາຮອດມື້ນີ້ ລາວໄດ້ຍົກລະດັບມາດຕະການສະກັດກັ້ນຂຶ້ນຕຶີ່ມຄື:
4.1 ປິດດ່ານທ້ອງຖິ່ນ ແລະ ດ່ານປະເພນີ ໃນຂອບເຂດທົ່ວປະເທດ, ສ່ວນດ່ານສາກົນ ໃຫ້ເບິ່ງຄວາມຮັບປະກັນຮອບດ້ານ ໃນນັ້ນ ລວມເຖິງຄວາມພ້ອມທາງດ້ານອຸປະກອນ ແລະ ພະນັກງານ ໃນການກວດກາ, ກັ່ນກອງຫາຜູ້ຕິດເຊື້ອພະຍາດ ຢ່າງໄດ້ມາດຕະຖານ ຈຶ່ງອະນຸຍາດເປີດ ໃຫ້ເຂົ້າ-ອອກ ປົກກະຕິໄດ້;

4.2 ໂຈະການອອກວີຊາ VISA ກັບດ່ານທຸກປະເພດ, ລວມທັງ ອີ–ວີຊາ (E-Visa) ແລະ ການອອກວີິຊາທ່ອງທ່ຽວ ສຳລັບທຸກປະເທດ ໃນໄລຍະເວລາ 30 ວັນ. ສຳລັບຜູ້ທີ່ໄດ້ວີິຊາເຂົ້າລາວແລ້ວ ກໍຕ້ອງມີການຢັ້ງຢືນການກວດສຸຂະພາບ ແລະ ກວດປະຫວັດການເຄື່ອນໄຫວໃນໄລຍະ 14 ວັນຜ່ານມາ, ສຳລັບປະເທດ ທີ່ໄດ້ຮັບການຍົກເວັ້ນວີິຊາ ແມ່ນເຫັນດີໃຫ້ຍົກເລີກການຍົກເວັ້ນວີິຊາດັ່ງກ່າວຊົ່ວຄາວ ຈົນກວ່າຈະມີການພິຈາລະນາໃໝ່ຂອງລັດຖະບານ.

4.3 ຫຼີກເວັ້ນການເດີນທາງໄປຕ່າງປະເທດ ໃນໄລຍະນີ້ ຂອງ ພົນລະເມືອງລາວ, ໂດຍສະເພາະ ການເດີນທາງ ດ້ວຍຍົນ ແລະ ພະຫະນະ ທີ່ມີຄົນຫຼາຍ. ຜູ້ທີ່ເດີນທາງກັບຈາກປະເທດທີ່ມີການແຜ່ລະບາດຂອງພະຍາດ ໃຫ້ປະຕິບັດການແຍກປ່ຽວດ້ວຍຕົນເອງຢ່າງໜ້ອຍ 14 ວັນ ເພື່ອຕິດຕາມສຸຂະພາບຂອງຕົນ ດ້ວຍຄວາມເປັນເຈົ້າການ ແລະ ຮັບຜິດຊອບສູງ. ກໍລະນີມີອາການໄຂ້ກໍຕ້ອງຕິດຕໍ່ຫາໝໍ ແລະ ເຈົ້າໜ້າທີ່ໆກ່ຽວຂ້ອງໂດຍດ່ວນ (ລາຍລະອຽດ ໄດ້ກຳນົດໄວ້ໃນໜັງສືແຈ້ງການ ຂອງຄະນະສະເພາະກິດ ສະບັບເລກທີ 12/ສພກ, ລົງວັນທີ 16 ມີນາ 2020).

4.4 ຫຼີກລ້ຽງການໂຮມຊຸມນຸມໃຫ່ຍ ທີ່ມີມວນຊົນເຂົ້າຮ່ວມຈຳນວນຫຼາຍ ເປັນຕົ້ນ: ງານບຸນປະເພນີຕ່າງໆ, ງານວາງສະແດງສິນຄ້າ, ງານແຂ່ງຂັນກິລາ, ງານດອງ, ບັນດາກິດຈະກຳຕ່າງໆໃນການສະເຫຼີມສະຫຼອງບຸນປີໃໝ່ລາວ ແລະ ອື່ນໆ.

4.5 ປິດກິດຈະການຮ້ານບັນເທິງ, ຮ້ານຄະຣາໂອເກະ ແລະ ຮ້ານນວດ, ສ່ວນກິດຈະການອື່ນໆ ແມ່ນສາມາດດໍາເນີນໄດ້ປົກກະຕິ ແຕ່ໃຫ້ບັນດາເຈົ້າຂອງກິດຈະການ ມີມາດຕະການປ້ອງກັນຂັ້ນພື້ນຖານ ເປັນຕົ້ນ ແມ່ນການກວດອຸ່ນນະພູມ ແລະ ສະໜອງນໍ້າຢາລ້າງມື ໃຫ້ລູກຄ້າ ເພື່ອປ້ອງກັນຕົນເອງ ແລະ ຜູ້ອື່ນ.

4.6 ປິດໂຮງຮຽນ ແຕ່ໂຮງລ້ຽງເດັກ, ອະນຸບານ, ປະຖົມສຶກສາ, ມັດທະຍົມ, ມະຫາວິທະຍາໄລ ແລະ ສະຖາບັນການສຶກສາຕ່າງໆ (ທັງພາກລັດ ແລະ ເອກະຊົນ) ໃນທົ່ວປະເທດ ຊົ່ວຄາວ ຈົນກວ່າມີການປ່ຽນແປງ, ພ້ອມກັນນັ້ນ ກໍໃຫ້ສົມທົບກັບບັນດາໂຮງຮຽນ ເພື່ອຮີບຮ້ອນຄົ້ນຄວ້າປືກສາຫາລື ເພື່ອກຳນົດນະໂຍບາຍ ຫຼື ຄໍາແນະນໍາໃນການສົ່ງເສີມວິທີການຮຽນ-ການສອນ ໂດຍຜ່ານລະບົບອອນລາຍ, ໂທລະພາບ, ວິທະຍຸ, ໜັງສືພິມ ແລະ ວິທີການອື່ນໆ ໃຫ້ນັກຮຽນ-ນັກສຶກສາ ຕາມທີ່ມີເງື່ອນໄຂ.

4.7 ກຳນົດສະຖານທີ່ໃນການກັກບໍລິເວນ 14 ວັນ ສຳລັບຜູ້ທີ່ເດິນທາງມາຈາກປະເທດທີ່ມີຄວາມສ່ຽງໃນນັ້ນ ລວມເຖິງ ແຮງງານລາວ ແລະ ນັກສຶກສາລາວ ທີ່ຈະເດີນທາງກັບລາວ ໃນໂອກາດບຸນປີໃໝ່ລາວໃນປີນີ້ (ກ່ຽວກັບແຮງງານລາວ ຈະມີການແນະນຳລະອຽດຕ່າງຫາກ).

4.8 ແນະນຳໃຫ້ຄົນລາວ ທີ່ອາໃສຢູ່ຕ່າງປະເທດ ເລື່ອນການເດີນທາງກັບປະເທດ ຈົນກວ່າສະຖານະການລະບາດທົ່ວໂລກຈະດີຂຶ້ນ.

ໝາຍເຫດ: ເຖິງແມ່ນວ່າປະເທດລາວຍັງດ້ອຍພັດທະນາ, ໃນສາຍຕາຂອງສາກົນອາດຈະເບິ່ງວ່າລະບົບສາທາລະນະສຸກຂອງລາວບໍ່ທັນສະໄໝ ແຕ່ລາວບໍ່ໄດ້ຢູ່ໂດດດ່ຽວ, ປະເທດລາວມີອົງການສາກົນ ເປັນຕົ້ນແມ່ນອົງການອະນາໄມໂລກມາປະຈຳຢູ່ ແລະການປະຕິບັດມາດຕະການຕ່າງໆ ລວມທັງການກວດວິເຄາະພະຍາດ ແມ່ນຜ່ານເຄື່ອງມືທີ່ທັນສະໄໝ ໄດ້ມາຕະຖານສາກົນ ຄຽງບ່າຄຽງໄຫຼ່ກັບອົງການອະນາໄມໂລກ.

ເຖິງແມ່ນວ່າ ມື້ນີ້ ປະເທດລາວຍັງບໍ່ພົບຜູ້ຕິດເຊື້ອ ແຕ່ກໍຂໍໃຫ້ທຸກຄົນຢ່າປະໝາດ ເພາະທີ່ຕັ້ງຂອງປະເທດເຮົາມີຄວາມສ່ຽງສູງ ຈຶ່ງຂໍໃຫ້ລະມັດລະວັງ ຮັກສາໂຕເອງໃຫ້ດີ ຮັບຂ່າວສານທີ່ໜ້າເຊື່ອຖື ແລະປະຕິບັດຕາມມາດຕະການຂອງຂັ້ນເທິງວາງອອກຢ່າງເຂັ້ມງວດ. ມີສະຕິຢ່າແຕກຕຶ່ນ ໃຊ້ຊີວິດຢ່າງປົກກະຕິ ຢ່າເຊື່ອຂ່າວທີ່ຍັງບໍ່ໄດ້ຮັບການຢືນຢັນຈາກຂັ້ນເທິງ.

ພາກພູມໃຈຄວາມເປັນຈິດໜື່ງໃຈດຽວປວງຊົນລາວທັງຊາດປະຕິບັດຕາມແນວທາງ ແລະ ນະໂຍບາຍຂອງລັດຖະບານ ໃນການສະກັດກັ້ນ ຄວບຄຸມ ແລະ ຕ້ານກັບການແຜ່ລະບາດ COVID-19.” ສປປລາວ ໄດ້ມີຄວາມພ້ອມໃນທຸກດ້ານ ເພື່ອຮອງຮັບການລະບາດຂອງພະຍາດນີ້, ທີ່ອາດຈະແຜ່ລະບາດຢູ່ ສປປລາວ, ເປັນຕົ້ນໄດ້ມີຄວາມພ້ອມທາງດ້ານບຸກຄະລາກອນ, ອຸປະກອນທາງການແພດ ແລະ ສະຖານທີ່ຮອງຮັບຄົນເຈັບ ໂດຍໄດ້ກຳນົດເອົາໂຮງໝໍມິດຕະພາບ 150 ຕຽງ ແລະ ໂຮງໝໍສູນກາງ 103 ເປັນຫລັກ, ເຊິ່ງໂຮງໝໍດັ່ງກ່າວ ມີຄວາມພ້ອມທາງດ້ານອຸປະກອນທີ່ທັນສະໄໝ ຫ້ອງປິ່ນປົວ ແລະ ອື່ນໆ.