ເປັນຫຍັງຄົນຈື່ງຫຼັ່ງໄຫຼອອກເຮືອນແຫ່ອອກນອກເຮືອນປານບຸນບັ້ງໄຟ

ດັ່ງທີ່ພວກເຮົາຮັບຊາບນຳກັນແລ້ວວ່າ ພາຍຫຼັງລາວເຮົາໄດ້ພົບຜູ້ຕິດເຊື້ອໄວຣັສໂຄວິດ-19 ເປັນລາຍທຳອິດໃນວັນທີ 24 ມີນາຜ່ານມາ, ລັດຖະບານກໍໄດ້ອອກມາດຕະການ 9 ຂໍ້ເພື່ອປິດປະເທດ ດ້ວຍຄຳສັ່ງຂອງນາຍົກລັດຖະມົນຕີເລກທີ 06/ນຍ, ລົງວັນທີ 29 ມີນາທີ່ຜ່ານມາ. ພໍມາເຖິງວັນທີ 15 ເມສາ ລັດຖະບານໄດ້ມີການປະເມີນສະຖານະການລະບາດຂອງພະຍາດໃນທົ່ວໂລກ ແລະ ຢູ່ພາຍໃນລາວເຮົາເອງເຫັນວ່າ ການລະບາດຂອງພະຍາດຍັງມີຄວາມຮຸນແຮງ ແລະ ແຜ່ຂະຫຍາຍເປັນວົງກ້ວາງ ຊຶ່ງເຮັດໃຫ້ມີຄວາມສ່ຽງ ແລະ ສິ່ງທ້າທາຍບໍ່ໜ້ອຍ. ດັ່ງນັ້ນ, ລັດຖະບານຈຶ່ງໄດ້ຕົກລົງ ແລະ ຊີ້ນຳໃຫ້ຢືດເວລາປະຕິບັດຄຳສັ່ງເລກທີ 06 ຂອງນາຍົກອອກໄປອີກຈົນຮອດວັນທີ 3 ພຶດສະພາ.

ແຕ່ມື້ນີີ້ເອງ ວັນທີ 19 ເປັນມື້ສຸດທ້າຍຂອງການກຳນົດເດີມປະຕິບັດຄຳສັ່ງຂອງທ່ານນາຍົກ. ປະຊາຊົນໄດ້ອອກຈາກບ້ານ ເຮືອນໄປເຮັດວຽກ, ເຮັດການ, ໄປທຳມາຫາກິນ…ໂດຍບໍ່ສົນໃຈກຳການຢືດເວລາຂອງລັດຖະບານເລີຍ. ບັນຫາເກີດຂຶ້ນຄືແນວນັ້ນຄິດວ່າອາດເກີດມາຈາກຫຼາຍສາເຫດ, ໃນນັ້ນສາເຫດຫຼັກໆ ອາດຈະແມ່ນ: 1. ພາຍຫຼັງລັດຖະບານຕົກລົງຢືດເວລາອອກໄປເຖິງວັນທີ 3 ພຶດສະພາແລ້ວ,

ພາກສ່ວນກ່ຽວຂ້ອງຕ່າງໆ ອາດຈະບໍ່ທັນໄດ້ມີແຈ້ງການເພີ່ມເຕີມໃຫ້ພາກສ່ວນຂອງຕົນຮັບຊາບທົ່ວເຖິງກັນ. ພຽງແຕ່ໄດ້ຍິນປາກເລົ່າຕໍ່ປາກ ເພາະບາງຄົນກໍບໍ່ມັກອ່ານເອກະສານເປັນທາງການ ອາໄສແຕ່ການເລົ່າລືກັນ. 2. ຍ້ອນການປະຊາສຳພັນຂອງລັດຖະບານບໍ່ທັນທົ່ວເຖິງທັນການ, ບໍ່ທັນມີມາດຕະການລະອຽດຖີ່ຖ້ວນ. 3. ພາກທຸລະກິດອາດຈະມີຄວາມຝືດເຄືອງ ເພາະປິດກິດຈະການມາຫຼາຍວັນແລ້ວ, ຂາດລາຍຮັບ ຂາດສິ່ງຄໍ້າປະກັນຊີວິດການເປັນຢູ່ ຍັງແຖມມີພັນທະຕໍ່ລັດຖະບານ.

4. ປະຊາຊົນຜູ້ຂາດເຂີນ ແລະ ພວກກຳມະກອນຫາເຊົ້າກິນຄໍ່າ ຈຳເປັນຕ້ອງເອົາຊີວິດລອດ ຈຶ່ງຈຳຕ້ອງຍອມອອກໄປເພື່ອຊອກຫາວຽກເຮັດງານທຳ. 5. ຍ້ອນຄວາມປະໝາດເລິນເລີ້, ບໍ່ເຊື່ອຟັງລັດຖະບານ ຄິດວ່າບ້ານເຮົາຊິບໍ່ໜັກໜ່ວງຄືປະເທດອື່ນ. ມີຈຳນວນໜຶ່ງຮູ້ແລ້ວກໍຕັ້ງແກ້ງກໍອາດເປັນໄປໄດ້. ເຖິງຢ່າງໃດກໍດີ ການທີ່ກະທຳຝືນຕໍ່ຄຳສັ່ງຂອງລັດຖະບານແບບນີ້ ແມ່ນບໍ່ຄວາຢ່າງຍິ່ງ. ລັດຖະບານກັນຫ້າມກໍບໍ່ແມ່ນເພື່ອຕົວເພີ່ນເອງ

ແຕ່ຫາກແມ່ນຄວາມເປັນຫ່ວງເປັນໃຍຕໍ່ຊີວິດອິນຊີຂອງປະຊາຊົນລາວທັງຊາດ. ເພື່ອຄວາມສະຫງົບຢູ່ດີກິນດີຂອງປະຊາຊົນ. ພວກເຮົາທຸກຄົນຕ້ອງອົດທົນປະຕິບັດຄຳສັ່ງໄປຮອດວັນທີ 3 ພຶດສະພາ ອາດຈະມີບາງດ້ານຜ່ອນຜັນກໍເປັນໄປໄດ້ ຖ້າສະພາບຢູ່ບ້ານເຮົາຫາກຍັງຢູ່ສະພາບແບບນີ້ຕໍ່ໄປ. ຂໍໃຫ້ປະຊາຊົນຈົ່ງສະໜັບສະໜູນ ແລະ ໃຫ້ການີ່ວມມືກັບລັດຖະບານຢ່າງເຕັມທີ່. ເຮົາຮັກສາຕົນເອງ ກໍເພື່ອຮັກສາປະຊາຊົນທັງຊາດ.     Cr: ໜັງສືພິມລາວພັດທະນາ