ເຫດຟ້າຜ່າຊາວບ້ານເສຍຊີວິດ 6 ຄົນ

ໃນວັນທີ 19 ກັນຍາ 2020 ຂ່າວຕ່າງປະເທດລາຍງານວ່າ ຈາກອິດທິພົນຂອງພາຍຸໜູນເຂດຮ້ອນໂນອຶນ ທີ່ພັດຖະຫຼົ່ມຫຼາຍປະເທດ ໂດຍທີ່ເມືອງຣຸກຂາ ຄີຣີ (Rukkhak Kirik) ແຂວງພະຕະບອງ (Battambang) ປະເທດກໍາປູເຈຍ ມີລາຍງານວ່າມີຜູ້ເສຍຊີວິດຈາກຟ້າຜ່າໂດຍເຫດການສະຫຼົດໃຈດັ່ງກ່າວເກີດຂຶ້ນຫລັງຈາກທີ່ຊາວບ້ານທີ່ເມືອງຣຸກຂາ ຄີຣີ ເຮັດບຸນສຳເລັດ

ຈາກນັ້ນບັນດາຍາດພີ່ນ້ອງກໍໄດ້ມາລວມກັນສັງສັນທີ່ໂຕະຫິນອ່ອນ ໃຕ້ຕົ້ນໝາກມ່ວງ ຈົນຄ່ຳກ່ອນທີ່ຈະມີລົມພັດແຮງ ຈົນເຮັດໃຫ້ໄຟຟ້າດັບ ກ່ອນທີ່ຊາວບ້ານຈະຕໍ່ໄຟຈາກໝໍ້ໄຟທີ່ໃຊ້ຈາກແຜງໂຊລ່າເຊວແຕ່ທັນໃດນັ້ນກໍ່ເກີດຟ້າຜ່າລົງມາກາງວົງທີ່ໂຕະມ້າຫິນອ່ອນ ຊຶ່ງມີຄົນນັ່ງຢູ່ 10 ຄົນ ເຮັດໃຫ້ມີຜູ້ເສຍຊີວິດທັນທີ່ 6 ຄົນ ແລະ ບາດເຈັບອີກ 4 ຄົນ ຊຶ່ງທັ້ງ 6 ຄົນທີ່ເສຍຊີວິດ ທາງພີ່ນ້ອງກໍ່ນຳໄປຈັດພິທີທາງສາສະໜາຕໍ່ໄປ