ໄຟໄໝ້ປ່າທີ່ອົດ​ສະຕຣາລີເພີ່ມທະວີ​ຄວາມ​ຮຸນ​ແຮງຂື້ນຍ້ອນຄື້ນຄວາມຮ້ອນ

ອົດ​ສະຕຣາລີ​ປະກາດ​ສະຖານະ​ການ​ສຸກ​ເສີນ​ໃນ​ຂະນະ​ທີ່​ຄື້ນຄວາມ​ຮ້ອນ​ກຳລັງ​ເພີ່ມ​ທະວີ​ໃຫ້​ໄຟ​ໄໝ້​ປ່າ​ຍິ່ງ​ທະວີ​ຄວາມ​ຮຸນ​ແຮງ ທາງ​ການ​ອົດ​ສະຕຣາລີ​ປະກາດ​ສະຖານະ​ການ​ສຸກ​ເສີນ​ເປັນ​ເວລາ 7 ວັນ ​ໃນ​ລັດ​ນິວ​ເຊົາ​ເວລ ຫລັງ​ຈາກ​ຄື້ນຄວາມ​ຮ້ອນ​ຄັ້ງປະຫວັດສາດ​ໄດ້​ເຮັດ​ໃຫ້​ໄຟ​ໄໝ້​ປ່າ​ໃນ​ພື້ນທີ່​ຍິ່ງ​ລຸກລາມ​ໂດຍ​ຄາດ​ວ່າ​ໃນ​ວັນ​ທີ 19 ທັນວາ​ນີ້ ອຸນຫະພູມ​ຢູ່​ນະຄອນ​ຊິດ​ນີ ຈະ​ເພີ່ມ​ສູງ​ຂຶ້ນ​ໄປ​ຮອດ 41 ອົງສາ ​

ແລະ ຈະ​ສູງ​ເຖິງ 45 ອົງສາ ​ໃນ​ເຂດ​ນອກ​ເມືອງ​ທາງ​ຕາ​ເວັນ​ຕົກ ປະກອບ​ກັບ​ຈະມີ​ລົມ​ພັດ​ແຮງດ້ວຍ​ຄວາມ​ໄວ​ເຖິງ 100 ກິ​ໂລ​ແມັດ​ຕໍ່​ຊົ່ວ​ໂມງ ​ເຊິ່ງຈະ​ພັດ​ໃຫ້​ໄຟ​ໄໝ້​ປ່າ​ເຂົ້າ​ໃກ້​ຕົວ​ເມືອງ​ຫລາຍ​ຂຶ້ນອີກ. ​ເຈົ້າຄອງ​ລັດ​ນິວ​ເຊົາ​ເວລ ​ເປີດ​ເຜີຍ​ວ່າ: ການ​ປະກາດ​ສະຖານະ​ການ​ສຸກ​ເສີນ ​ເຊິ່ງຖື​ເປັນ​ການ​ປະກາດ​ຄັ້ງທີ 2 ນັບ​ແຕ່​ລະດູ​ໄຟ​ໄໝ້​ປ່າ​ໃນ​ປີ​ນີ້​ເລີ່​ມກ່ອນ​ກຳນົດ​ມາ​ແຕ່​ເດືອນ​ກັນຍາ​ເປັນ​ຜົນ​ມາ​ຈາກ​ສະພາບ​ອາກາດ​ແຫ້ງ​ແລ້ງ​ຫລາຍ ​

ແລະ ປັດຈຸບັນ ອົດ​ສະຕຣາລີ​ໄດ້​ລະດົມ​ເຈົ້າໜ້າ​ທີ່​ມອດ​ໄຟ 2.000 ຄົນ ພ້ອມ​ກຳລັງ​ເສີມ​ຈາກ​ອາ​ເມ​ລິ​ກາ, ກາ​ນາ​ດາ ​ແລະ ກອງທັບ​ອົດ​ສະຕຣາລີ ​ເພື່ອ​ຄວບ​ຄຸມ​ໄຟ​ໄໝ້​ປ່າ. ​ໄຟ​ໄໝ້​ປ່າ​ຍັງ​ເຮັດ​ໃຫ້​ເກີດ​ການ​ປະ​ທ້ວງ​ໂຈມ​ຕີ​ລັດຖະບານ​ອະນຸລັກ​ນິຍົມ​ທີ່​ເຫັນ​ອຸດສາຫະກຳ​ການ​ສົ່ງ​ອອກ​ຖ່ານ​ຫີນ​ຂອງ​ປະ​ເທດ ສຳຄັນ​ກວ່າ​ບັນຫາ​ໂລກ​ຮ້ອນ

​ແລະ ການ​ປ່ຽນ​ແປງ​ສະພາບ​ອາກາດ ​ໂດຍ​ຜູ້​ປະ​ທ້ວງ​ມີ​ແຜນ​ຈະ​ຊຸມນຸມ​ຢູ່​ໜ້າ​ເຮືອນ​ພັກ​ຂອງ​ນາຍົກລັດຖະມົນຕີ ສະ​ກອດ ມໍຣິສັນ ​ໃນ​ນະຄອນ​ຊິດ​ນີ ​ເພື່ອ​ຮຽກຮ້ອງ​ໃຫ້​ອົດ​ສະຕຣາລີ​ຫລຸດ​ການ​ປ່ອຍ​ແກັສ​ເຮືອນ​ແກ້ວ​ແລະ ​ເພື່ອ​ປະນາມ​ນາຍົກລັດຖະມົນຕີທີ່​ເດີນທາງ​ໄປ​ພັກຜ່ອນ​ຢູ່​ຕ່າງປະ​ເທດ​ໃນ​ໄລຍະ​ທີ່​ຫລາຍ​ພື້ນທີ່​ຂອງ​ອົດ​ສະຕຣາລີ​ກຳລັງ​ຖືກ​ໄຟ​ປ່າ​ເຜົາ​ຜານ.

ອົດສະຕຣາລີ ຮ້ອນສຸດໆ ອຸນຫະພູມທະລຸ 53 ອົງສາແລ້ວ 🔥 ເມືອງໜຶ່ງທາງພາກໃຕ້ຂອງອົດສະຕຣາລີ ອຸນຫະພູມສູງເຖິງ 53 ອົງສາ ຖະໜົນລາດຢາງໝາກຕ໋ອຍຈົນເປື່ອຍລະລາຍ. ໄລຍະນີ້ນະຄອນຊິດນີ ດວງຕາເວັນເປັນສີເລືອດທຸກວັນ. ກ່ອນໜ້ານີ້ ອຸຕຸນິຍົມຂອງອົດສະຕຣາລີ ລາຍງານວ່າ: ໃນວັນທີ 18 ທັນວາ 2019 ເປັນຕົ້ນໄປ

ອຸນຫະພູມໃນຫລາຍເຂດຂອງອົດສະຕຣາລີ ອາດຈະສູງເຖິງ 40 ອົງສາ. ນອກຈາກນີ້, ຄື້ນຄວາມຮ້ອນທີ່ມາຈາກດ້ານຕາເວັນຕົກຂອງປະເທດ ຍັງຈະເຮັດໃຫ້ອົດສະຕຣາລີ ພົບກັບອຸນຫະພູມທີ່ສູງທີ່ສຸດເປັນປະຫວັດການ ຊຶ່ງສະຖິຕິອຸນຫະພູມທີ່ຮ້ອນທີ່ສຸດທີ່ 50.7 ອົງສາ ໃນວັນທີ 2 ມັງກອນ 1960.