ຈົ່ງຢ່າຫລົງເຊື່ອຂ່າວປອມທາງສື່ສັງຄົມອອນລາຍກ່ຽວກັບງານມະຫາກຳບຸນຊ້າງປີນີ້ຢູ່ໄຊຍະບູລີ

ຮອງເຈົ້າແຂວງໄຊຍະບູລີ ແລະ ທັງເປັນຮອງປະທານຄະ​ນະ​ກຳມະການຮອບຜິດຊອບຈັດງານມະຫາກຳບຸນຊ້າງຄັ້ງທີ 14 ປະຈຳປີ 2020 ຢັ້ງຢືນວ່າ: ໃນກໍລະນີທີ່ມີສື່ສັງຄົມອອນລາຍອອກຂ່າວເມື່ອບໍ່ດົນມານີ້ກ່ຽວກັບເຫດການທີ່ມີຊ້າງແລ່ນອອກມາຈາກເດີ່ນແລ້ວທຳຮ້າຍຄົນ ແລະ ມີການນຳເອົາທຸງພັກປະຊາຊົນປະຕິວັດລາວມາປົກເທິງຫລັງຊ້າງແລ້ວໃຫ້ຄົນນັ່ງທັບໃນການຝຶກຊ້ອມກ່ອນໄຂງານມະຫາກຳບຸນຊ້າງຄັ້ງທີ 14 ນັ້ນ ແມ່ນບໍ່ແມ່ນຄວາມຈິງແຕ່ປະ​ການ​ໃດ ແລະ ຮຽກຮ້ອງມາຍັງສັງຄົມຈົ່ງຢ່າຫລົງເຊື່ອ ແລະ ມີສະຕິໃນການບໍລິໂພກຂໍ້ມູນຂ່າວສານ.

ໃນໂອກາດໃຫ້ສຳພາດຕໍ່ນັກຂ່າວວິທະຍຸກະຈາຍສຽງແຫ່ງ​ຊາດ​ລາວໃນວັນທີ 22 ກຸມພາ 2020 ຢູ່ແຂວງໄຊຍະບູລີ, ທ່ານນາງບຸນພັກ ອີນທະປັນຍາ, ຮອງເຈົ້າແຂວງໄຊຍະບູລີ ແລະ ຮອງປະທານຄະນະກຳມະການຮັບຜິດຊອບຈັດງານມະຫາກຳບຸນຊ້າງຄັ້ງທີ 14 ປີ 2020 ໃຫ້ຮູ້ວ່າ: ເຫດການທີ່ມີສື່ສັງຄົມອອນລາຍເຜີຍແຜ່ພາບວີດີໂອ ແລະ ອອກຂ່າວວ່າມີຊ້າງທຳຮ້າຍຄົນໃນການສະແດງກ່ອນມື້ໄຂງານມະຫາກຳບຸນຊ້າງຄັ້ງທີ 14 ນັ້ນ ແມ່ນບໍ່ເປັນຄວາມຈິງແຕ່ຢ່າງໃດ, ໂດຍເຫດການດັ່ງກ່າວເປັນພຽງແຕ່ການແລ່ນໄລ່ກັນຕາມປົກກະຕິລະຫວ່າງຊ້າງຜູ້ ແລະ ຊ້າງແມ່ທີ່ດົນໆໄດ້ມາພົບກັນ, ຊຶ່ງພໍດີຕອນນີ້ແມ່ນຢູ່ໃນລະດູການທີ່ຊ້າງກຳລັງທີ່ຈະມີການປະສົມພັນກັນ ຕາມທຳມະຊາດ,

ຈຶ່ງຖືເປັນເລື່ອງປົກກະຕິ ແລະ ບໍ່ມີການທຳຮ້າຍຄົນຜູ້ຄົນແຕ່ຢ່າງໃດ ເພາະຊ້າງທຸກໂຕທີ່ນຳເຂົ້າມາສະແດງພາຍໃນງານໄດ້ຮັບການຝຶກແອບເປັນຢ່າງດີ.ສ່ວນອີກຫນື່ງເຫດການທີ່ສື່ສັງຄົມອອນລາຍບາງສື່ເຜີຍແຜ່ວີດີໂອ ແລະ ອອກຂ່າວກ່ຽວກັບການນຳເອົາທຸງພັກປະຊາຊົນປະຕິວັດລາວ ມາປົກຫລັງຊ້າງແລ້ວໃຫ້ຄົນນັ່ງທັບນັ້ນ ເປັນການຕັດຕໍ່ຮູບພາບຂອງກຸ່ມຄົນບໍ່ຫວັງດີຈຳນວນຫນື່ງທີ່ສ້າງຄວາມບໍ່ສະຫງົບໃນສັງຄົມ, ໂດຍຮູບພາບດັ່ງກ່າວສາມາດກວດສອບໄດ້, ຊຶ່ງທຸກໆການສະແດງແມ່ນໄດ້ຮັບການກວດສອບຈາກຂັ້ນເທີງຢ່າງເຂັ້ມງວດຢູ່ແລ້ວ.

ດັ່ງທີ່ທຸກຄົນໃນສັງຄົມເຂົ້າໃຈດີ, ທຸງພັກເປັນສັນຍາລັກໜຶ່ງຂອງຊາດລາວ ຊຶ່ງເປັນທີ່ເຄົາລົບບູຊາຂອງພະນັກງານ, ສະມາຊິກພັກ ແລະ ປະຊາຊົນລາວບັນດາເຜົ່າທົ່ວໄປ; ດັ່ງນັ້ນ ການນຳຂອງແຂວງຈຶ່ງຈະບໍ່ນຳເອົາທຸງພັກມາສະແດງແບບນີ້ຢ່າງແນ່ນອນ, ຈຶ່ງຂໍໃຫ້ສັງຄົມມີຄວາມເຊື່ອໝັ້ນ; ເຫດການທີ່ເກີດຂຶ້ນທັງຫມົດນີ້ເປັນພຽງການໃສ່ຮ້າຍປ້າຍສີ ແລະ ການຫວັງສ້າງຄວາມປັ່ນ​ປ່ວນພາຍໃນສັງຄົມຂອງພວກກຸ່ມຄົນບໍ່ດີຈຳນວນຫນື່ງ. ປັດຈຸບັນ, ອົງການປົກຄອງແຂວງໄຊຍະບູລີ ກຳລັງສົມທົບກັບພາກສ່ວນກ່ຽວຂ້ອງ ເພື່ອຕິດຕາມຫາຜູ້ກະທຳຜິດມາດຳເນີນຄະດີຕາມລະບຽບກົດຫມາຍ.

ທ່ານນາງບຸນພັກ ອີນທະປັນຍາ ໃຫ້ຮູ້ຕື່ມວ່າ: ສຳລັບງານມະຫາກຳບຸນຊ້າງຄັ້ງທີ 14 ຢູ່ແຂວງໄຊຍະບູລີໃນປີນີ້ນັ້ນ, ແມ່ນມີຊ້າງເຂົ້າຮ່ວມທັງຫມົດ 72 ໂຕ, ໃນນີ້ເປັນຊ້າງເຜືອກ 1 ໂຕ. ຈຸດປະສົງການຈັດງານເພື່ອອະນຸລັກຮັກສາຊ້າງທີ່ເປັນສັດຄູ່ບ້ານຄູ່ເມືອງຂອງຄົນລາວ ຕັ້ງແຕ່ອະດີດຈົນເຖິງປັດຈຸບັນນັ້ນ, ແມ່ນປະຕິບັດຕາມຮີດຄອງປະເພນີ ແລະ ວັດທະນະທໍາອັນດີງາມຂອງຊາດໃຫ້ແຂກພາຍໃນ ແລະ ຕ່າງປະເທດໄດ້ຮັບຮູ້, ພ້ອມທັງເປັນເວທີສະແດງຄວາມສາມາດໃນການຄວບຄຸມຊ້າງ,

ການຢູ່ຮ່ວມກັນຂອງຄົນແລະຊ້າງ ແລະ ການສະແດງຄວາມສາມາດຂອງຊ້າງ, ໂດຍຜ່ານກິດຈະກຳຕ່າງໆ.ນອກຈາກນັ້ນ, ພາຍໃນງານ ຍັງມີການສະແດງກິດຈະກຳອື່ນໆຂອງຊ້າງ, ແລະ ການສະແດງສິນລະປະວັນນະຄະດີທີ່ເປັນເອກະລກຂອງຊາວແຂວງໄຊຍະບູລີໃນທຸກໆຄໍ່າຄືນ; ນອກຈາກນັ້ນ, ກໍ່ຍັງມີການວາງສະແດງສິນຄ້າຈາກພາຍໃນແລະ ຕ່າງປະເທດ ຈຳນວນ 132 ຮ້ານ ແລະ ຈະດຳເນີນໄປຮອດວັນທີ 28 ກຸມພາ 2020 ຈື່ງຈະສຳເລັດລົງ. ຂ່າວ,​ພາບ: ເດດອາລຸນ ແກ້ວວິໄລວົງ

ຂ່າວກ່ອນໜ້ານີ້ ມີຊ້າງ 72 ເຊືອກເຂົ້າຮ່ວມການສະແດງຢູ່ງານມະຫາກຳບຸນຊ້າງຄັ້ງທີ 14 ປະຈຳປີ 2020 ຂະນະທີ່ ວຽກງານການອະນຸລັກຮັກສາຊ້າງແມ່ນວາລະສໍາຄັນຂອງຊາດເພື່ອຄວາມຍືນຍົງ ແລະ ມີໄວ້ໃຫ້ລູກຫລານໄດ້ເຫັນໃນອະນາຄົດ,ຄາດວ່າປັດຈຸບັນປະຊາກອນຊ້າງປ່າ ແລະ ຊ້າງບ້ານຍັງເຫລືອພຽງແຕ່ 300 ກວ່າເຊືອກ.

ໃນຕອນເຊົ້າວັນທີ 22 ກຸມພາ 2020 ທີ່ແຂວງໄຊຍະບູລີ, ງານມະຫາກຳບຸນຊ້າງຄັ້ງທີ 14 ປະຈຳປີ 2020ໄດ້ໄຂຂຶ້ນຢ່າງເປັນທາງການໂດຍ ພາຍໃຕ້ການເປັນປະທານຈັດງານຂອງ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ໃຫ້ກຽດເຂົ້າຮ່ວມຂອງ ທ່ານ ພັນຄຳ ວິພາວັນ ຮອງປະທານປະເທດ, ມີການນຳຂັ້ນສູງພັກ-ລັດທີ່ມາຈາກສູນກາງ, ການນຳແຂວງໄຊຍະບູລີ, ພະເຖລານຸເຖລະ, ພ້ອມດ້ວຍມວນຊົນທັງພາຍໃນແລະຕ່າງປະເທດຈຳນວນຫລາຍ.

ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ກ່າວໃນພິທີເປີດງານວ່າ: ການຈັດງານມະຫາກຳບຸນຊ້າງເພື່ອແນໃສ່ອະນຸລັກຮັກສາຊ້າງທີ່ເປັນມູນມໍລະດົກຂອງຊາດທີ່ເປັນມິ່ງບ້ານຂວັນເມືອງຂອງຄົນລາວ ເປັນການຮັກສາວັດທະນະທຳ, ຮີດຄອງປະເພນີອັນດີງາມຂອງຊາດ ກໍ່ຄືຂອງປະຊາຊົນແຂວງໄຊຍະບູລີ ທີ່ມີວິທີການດຳລົງຊີວິດຕິດພັນກັບຊ້າງມາແຕ່ສະໄຫມກ່ອນ ໃຫ້ນັກທ່ອງທ່ຽວທັງພາຍໃນແລະຕ່າງປະເທດໄດ້ຮັບຮູ້ ພ້ອມທັງເປັນເວທີສະແດງຄວາມສາມາດແລະທັກສະການຄວບຄຸມຊ້າງຂອງຄວນຊ້າງ, ການສະແດງກິດຈະກຳຕ່າງໆຂອງຊ້າງຕື່ມອີກ.

ສຳລັບງານມະຫາກຳບຸນຊ້າງປີນີ້ໄດ້ຈັດຂຶ້ນຢ່າງຍິ່ງໃຫຍ່ຄືທຸກໆປີຜ່ານມາພາຍໃນງານມີການສະແດງສີນລະປະວັນນະຄະດີ ທີ່ເປັນເອກະລັກຂອງປະຊາຊົນຊາວແຂວງໄຊຍະບູລີ, ຮັບຊົມສະແດງການເດີນສວນສະຫນາມຂອງກ້ອນກຳລັງຕ່າງໆມາຈາກ 11 ເມືອງທົ່ວແຂວງ, ຂະບວນແຮ່ພາຂັວນຊ້າງ, ຂະບວນແຫ່ຊ້າງຈຳນວນ 72 ໂຕ ໃນນີ້ມີຊ້າງເຜືອກ 1ໂຕ, ທ່ຽວຊົມພິພິທະພັນຊ້າງ, ການສະແດງຊ້າງຄຳຮູ້, ປະກວດຊ້າງງາມ, ພິທີບາສີສູ່ຂວັນຊ້າງ, ຂີ່ຊ້າງຊົມເທດສະບານແຂວງ ແລະກິດຈະກຳສຳຄັນຈຳນວນຫນຶ່ງ.

ນອກນີ້ພາຍໃນງານຍັງມີການງວາງສະແດງສິນຄ້າອຸປະໂພກບໍໂພກຈຳນວນຫລາຍ, ສິນຄ້າໂອດ໋ອບທີ່ມີຊື່ສຽງຈາກພາຍໃນແລະຕ່າງປະເທດຈຳນວນ 132 ຮ້ານ ເຊິ່ງໄດ້ຈະສິ້ນສຸດໃນວັນທີ 28 ກຸມພາ 2020. ຜູ້ຊ່ຽວຊານອາວຸໂສກ່ຽວກັບການອະນຸລັກຊ້າງໄດ້ເປີດເຜີຍວ່າ: ກ່ອນຫນ້ານັ້ນປະເທດລາວຂຶ້ນຊື່ ແລະ ຂະຫນານນາມວ່າ”ປະເທດລ້ານຊ້າງເພາະມີປະຊາກອນຊ້າງນັບລ້ານໆໂຕ

ໂດຍສ່ວນໃຫຍ່ນັ້ນປະຊາຊົນໄດ້ເພີ່ນພາອາໃສແຮງງານຊ້າງລາງແກ່ສິນຄ້າ, ລໍາລຽງສິນຄ້າ ແລະ ອື່ນໆ ນອກຈາກນັ້ນຊ້າງຍັງເປັນສັນຍາລັກເຈົ້າປ່າ. ເວລາຜ່ານໄປປະຊາກອນຊ້າງໄດ້ຫລຸດລົງຢ່າງຕໍ່ເນື່ອງຍ້ອນການບຸກລຸກເຂດຊ້າງອາໃສຢູ່, ການລ່າຊ້າງແບບຜິດກົດຫມາຍ ແລະ ອື່ນໆ, ຄາດວ່າຊ້າງຍັງຫລົງເຫລືອພຽງແຕ່ 300 ກວ່າເຊືອກ. ໂດຍ: ເກີດຂວັນໃຈ ມາລີຈັນສີ