ສານນະຄອນຫລວງຕັດສີນປະຫານຊີວິດຜູ້ຄ້າຢາເສບຕິດລາຍໃຫຍ່

ສານນະຄອນຫລວງ ຕັດສິນປະຫານຊີວິດ ຜູ້ຄ້າຢາເສບຕິດລາຍໃຫ່ຍ 8 ຄົນ,​ ໃນວັນທີ 23 ມັງກອນ 2020 ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ໄດ້ຕັດສິນຕັດສິນປະຫານຊີວິດຜູ້ຄ້າຂາຍຢາເສບຕິດລາຍໃຫຍ່ 8 ຄົນ ຈຳເລີຍໃນສຳນວນຄະດີດັ່ງກ່າວ ລວມມີ: ຈໍາເລີຍ 1: ທ້າວ ກິນ້ອຍ ຫຼື ແອນ້ອຍ ອາຍຸ 36 ປີ ຢູ່ບ້ານອາກາດ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ກະທໍາຜິດທາງອາຍາໃນສະຖານການຄ້າຂາຍຢາເສບຕິດ ປະເພດຢາບ້າ ແລະ ເຮໂຣອິນ, ການຟອກເງິນ, ການຊື້-ຂາຍອາວຸດເສິກ ໂດຍຜິດຕໍ່ກົດໝາຍ, ເປັນນັກເລງອັນຕະພານ, ການທໍາຮ້າຍຮ່າງກາຍ ແລະ ຊື້-ຂາຍຊັບຂອງພົນລະເມືອງຢ່າງຜິດກົດໝາຍ.

ຈຳເລີຍ 2: ນາງ ປາວິນາ ຫຼື ຈູລີ ອາຍຸ 19 ປີ ຢູ່ບ້ານວັດໄຕນ້ອຍ ເມືອງສີໂຄດຕະບອງ ນະຄອນຫຼວງວຽງຈັນ ໃນສະຖານການຄ້າຂາຍຢາເສບຕິດ ປະເພດຢາບ້າ ແລະ ເຮໂຣອິນ, ການຟອກເງິນ; ຈຳເລີຍ 3: ທ້າວ ຫວາດ ອາຍຸ 41 ປີ ແລະ ຈໍາເລີຍ 4: ນາງ ແກ້ວ ອາຍຸ 39 ປີ ທັງ 2 ເປັນຜົວເມຍກັນ ຢູ່ບ້ານສີບຸນເຮືອງ ເມືອງຕົ້ນເຜິ້ງ ແຂວງບໍ່ແກ້ວ ແລະ ກະທໍາຜິດທາງອາຍາໃນສະຖານການຄ້າ ຂາຍຢາເສບຕິດປະເພດຢາບ້າ ແລະ ເຮໂຣອິນ, ການຟອກເງິນ, ການມີອາວຸດເສິກໄວ້ໃນຄອບຄອງໂດຍບໍ່ຖືກຕ້ອງຕາມກົດໝາຍ, ການຊື້-ຂາຍອາວຸດເສິກ ໂດຍຜິດຕໍ່ກົດໝາຍ. ຈຳເລີຍ 5: ທ້າວ ຄອນປະສົງ ແລະ ຈໍາເລີຍ 6: ນາງ ມະນີວັນ ອາຍຸ 43 ປີ ທັງ 2 ເປັນຜົວ ເມຍກັນ ຢູ່ບ້ານສະພັງເມິກ ເມືອງໄຊທານີ ນະຄອນຫຼວງວຽງຈັນ ກະທຳຜິດໃນສະຖານການຄ້າຂາຍຢາເສບຕິດ, ການຟອກເງິນ, ການມີຊິ້ນສ່ວນສັດຫວງຫ້າມໄວ້ໃນຄອບຄອງໂດຍບໍ່ຖືກຕ້ອງຕາມກົດໝາຍ.

ຈຳເລີຍ 7: ທ້າວ ເພັດສາຄອນ ຫຼື ຈຸ້ນ ອາຍຸ 24 ປີ ຢູ່ບ້ານໜອງແຕ່ງໃຕ້ ເມືອງສີໂຄດຕະບອງ ນະ ຄອນຫຼວງວຽງຈັນ ກະທຳຜິດໃນສະຖານການຄ້າຂາຍຢາເສບຕິດປະເພດຢາບ້າ, ການມີອາວຸດເສິກໄວ້ໃນຄອບຄອງ, ການຊື້-ຂາຍອາວຸດເສິກ ໂດຍບໍ່ຖືກຕ້ອງຕາມກົດໝາຍ; ຈໍາເລີຍ 8: ທ້າວ ໄມແສງຊອນ ອາຍຸ 42 ປີ ຢູ່ບ້ານປາກຮາວເໜືອ ເມືອງຫ້ວຍຊາຍ ແຂວງບໍ່ແກ້ວ ກະທໍາຜິດທາງອາຍາໃນສະຖານການຄ້າຂາຍຢາເສບຕິດ, ການຟອກເງິນ. ນອກນີ້, ສານຍັງໄດ້ຢຶດຊັບທີ່ພົວພັນກັບການກະທຳຜິດຂອງພວກຈຳເລີຍໃນຄັ້ງນີ້ ເຊັ່ນ: ເຮືອນ, ທີ່ດິນ, ລົດ, ຊັບສິນທີ່ກ່ຽວຂ້ອງ ແລະອື່ນໆ ເຂົ້າເປັນຂອງລັດ ສ່ວນລາຍລະອຽດແມ່ນຈະນຳສະເໜີພາຍຫຼັງ. ນອກນີ້, ສານຍັງໄດ້ຢຶດຊັບທີ່ພົວພັນກັບການກະທຳຜິດຂອງພວກຈຳເລີຍໃນຄັ້ງນີ້ ເຊັ່ນ: ເຮືອນ, ທີ່ດິນ, ລົດ, ຊັບສິນທີ່ກ່ຽວຂ້ອງ ແລະອື່ນໆ ເຂົ້າເປັນຂອງລັດ ສ່ວນລາຍລະອຽດແມ່ນຈະນຳສະເໜີພາຍຫຼັງ. ພາບ-ຂ່າວ: ໜັງສືພິມ ຄວາມສະຫງົບ