ບຸກຄົນໃດຍັງສືບຕໍ່ລະເມີດຄຳສັ່ງ 06/ນຍ ຈະຖືກດໍາເນີນຄະດີທາງອາຍາ

ໃນວັນທີ 23 ເມສາທີ່ຜ່ານມາ ເຈົ້າໜ້າທີ່ກອງພັນປ້ອງກັນເຄື່ອນທີ່ ປກສ ນະຄອນຫຼວງວຽງຈັນ ໄດ້ອອກກວດກາລາດຕະເວນຕາມຂອບເຂດເມືອງໄຊເສດຖາ ຫາເມືອງຫາດຊາຍຟອງ ໄດ້ພົບເຫັນຮ້ານເກມອອນລາຍຍັງເປີດໃຫ້ບໍລິການ ລວມມີ 3 ຮ້ານ; ເຊີ່ງຖືວ່າເປັນການລະເມີດ ຝາຝືນຕໍ່ຄໍາສັ່ງເລກທີ 06/ນຍ,

ເຈົ້າໜ້າທີ່ຈຶ່ງໄດ້ເຮັດບົດບັນທຶກກ່າວເຕືອນ ແລະ ໃຫ້ປິດຮ້ານ. ຄື: ເວລາ 14:40 ໂມງ ໄດ້ພົບເຫັນຊາຍໜຸ່ມຄົນໜຶ່ງຢືນຢູ່ໜ້າຮ້ານເກມອອນລາຍ 89 ຢູ່ບ້ານໂນນສະຫງ່າ ເມືອງໄຊເສດຖາ, ກວດຄົ້ນຕົວພົບຢາບ້າ 1 ເມັດ ແລະ ບັດເຕີມເກມ,

ຈຶ່ງກັກຕົວໄວ້ກ່ອນ ຄື: ທ້າວ ວົງ, ອາຍຸ 45 ປີ; ພ້ອມເຂົ້າເຮັດບົດບັນທຶກກ່າວເຕືອນກັບເຈົ້າຂອງຮ້ານເກມດັ່ງກ່າວ ທີ່ຍັງເປີດໃຫ້ບໍລິການ ແລະ ເວລາ 20:30 ໂມງ ໄດ້ເຂົ້າເຮັດບົດບັນທຶກກ່າວເຕືອນກັບຮ້ານເກມອອນລາຍ ທີທີ,

ຢູ່ບ້ານຊໍາເຄ້ ເມືອງໄຊເສດຖາ ແລະ ເວລາ 22:00 ໂມງ ໄດ້ເຂົ້າເຮັດບົດບັນທຶກກ່າວເຕືອນກັບເຈົ້າຂອງຮ້ານເກມອອນລາຍສະປອດ 777, ຢູ່ບ້ານດົງຄໍາຊ້າງ ເມືອງຫາດຊາຍຟອງ ທີ່ຍັງເປີດໃຫ້ບໍລິການ; ພ້ອມໃຫ້ປິດຮ້ານ.

ພັທ ສຸກພະຈັນ ບຸດດາຄໍາ ຮັກສາການຫົວໜ້າກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ໃຫ້ສໍາພາດໃນວັນທີ 22 ເມສາຜ່ານມາວ່າ: ນັບແຕ່ນີ້ໄປຮອດວັນທີ 03 ພຶດສະພາ 2020, ຖ້າຫາກບຸກຄົນ, ຄອບຄົວ ຫຼື ຫົວໜ່ວຍທຸລະກິດໃດ ຍັງຝ່າຝືນ

ແລະ ດື້ດ້ານບໍ່ປະຕິບັດຕາມຄຳສັ່ງ 06/ນຍ ແລະ ມາດຕະການຕ່າງໆ ເພື່ອປ້ອງກັນ, ຄວບຄຸມ ແລະ ສະກັດກັ້ນພະຍາດໂຄວິດ-19, ກອງບັນຊາການ ປກສ ນະຄອນຫຼວງວຽງຈັນ ແມ່ນຈະດຳເນີນຄະດີຢ່າງເດັດຂາດ ໂດຍມອບໃຫ້ກໍາລັງຕໍາຫຼວດ 1191,

ກອງພັນປ້ອງເຄື່ອນທີ່, ປກສ ເມືອງ, ປກສ ກຸ່ມບ້ານ ແລະ ໜ່ວຍກວດກາຂັ້ນບ້ານ ລົງກວດກາເຮັດບົດບັນທຶກ ແລະ ສຶກສາອົບຮົມກ່າວເຕືອນ ໃຫ້ຜູ້ລະເມີດຢຸດເຊົາພຶດຕິກໍາ ແລະ ການກະທໍາໃນທັນທີ, ຖ້າພົບເຫັນການເມີດທີ່ສ້າງຄວາມເສຍຫາຍທາງດ້ານຊີວິດ ແລະ ສຸຂະພາບຂອງບຸກຄົນອື່ນ ແມ່ນຈະຖືກດໍາເນີນຄະດີ ໂດຍໃຊ້ແທນຄ່າເສຍຫາຍທາງແພ່ງ,

ຖ້າຍັງຝ່າຝືນຈະຖືກດໍາເນີນຄະດີທາງອາຍາຕາມປະມວນກົດໝາຍອາຍາ ມາດຕາ 199, ມາດຕາ 208 ແລະ ມາດ 209 ຢ່າງເຂັ້ມງວດ. ສໍາລັບຂໍ້ມູນທີ່ປະຊາຊົນໄດ້ແຈ້ງເຂົ້າມາທາງອິນບ໋ອກ ຂອງເຟສບຸກປ້ອງກັນຄວາມສະຫງົບ ນະຄອນຫຼວງວຽງຈັນ ກໍາລັງຕໍາຫຼວດ ປກສ ນະຄອນວຽງຈັນ ກໍ່ໄດ້ສົມທົບກັບທະຫານ ນວ, ປກສ ເມືອງ ແລະ ການຈັດຕັ້ງບ້ານ

ລົງແກ້ໄຂທັນເຫດການພາຍໃນ 30 ນາທີ ເປັນຕົ້ນແມ່ນກໍລະນີຮ້ານເກມ ຢູ່ເຂດຕະຫຼາດເຊົ້າທີ່ຍັງເປີດໃຫ້ຄົນເຂົ້າໄປຫຼິ້ນ, ກໍລະນີທີ່ຄົນຫຼັ່ງໄຫຼເຂົ້າໄປຊິດເບັດ ຢູ່ໜອງປາເຂດບ້ານໜອງໄຮ, ເຫດການມີປະຊາຊົນຈຳນວນຫຼາຍອອກມາຮັບເຄື່ອງຊ່ວຍເຫຼືອຢູ່ເຂດບ້ານດອນແດງ ເມືອງຈັນທະບູລີ ແລະ ການຊຸມແຊວຈໍານວນຫຼາຍ.

ວີດີໂອ