ທາງດ່ວນຖືກປະຊາຊົນບາງກຸ່ມແກະມ້າງຮົ້ວກັ້ນຂ້າງທາງ

ອີງຕາມຂໍ້ມູນສໍາພາດຈາກເຈົ້າໜ້າທີ່ ບໍລິສັດພັດທະນາທາງດ່ວນລາວ-ຈີນ ຈໍາກັດ ບາງເຂດຂອງເສັ້ນທາງດ່ວນຖືກປະຊາຊົນ ຫລື ບາງກຸ່ມບຸກຄົນ ແກະມ້າງຮົ້ວກັ້ນຂ້າງທາງ ເພື່ອອຳນວຍຄວາມສະດວກໃນການສັນຈອນສ່ວນຕົວ ຈຶ່ງເຮັດໃຫ້ຍັງພົບເຫັນ ສັດ ແລະ ຍານພະຫະນະທີ່ບໍ່ຜ່ານມາດຕະຖານສັນຈອນເທິງທາງດ່ວນ, ຢ່າງໃດກໍ່ຕາມເພື່ອຄວາມປອດໄພຂອງທຸກທ່ານ ຫວັງວ່າທຸກທ່ານຈະນຳໃຊ້ເສັ້ນທາງດ່ວນ ດ້ວຍຄວາມລະມັດລະວັງ ແລະ ມີສະຕິໃນການສັນຈອນຢູ່ສະເຫມີ.

ອີງຕາມການສໍາພາດກັບເຈົ້າໜ້າທີ່ ບໍລິສັດພັດທະນາທາງດ່ວນລາວ-ຈີນ ຈໍາກັດ ພາກປະຕິບັດໂຕຈິງເຫັນໄດ້ເນື່ອງຈາກຍັງບໍ່ສາມາດໃຊ້ມາດຕະການທີ່ເຂັ້ມງວດໄດ້ໃນບາງກໍລະນີເຊັ່ນ ທັງນີ້ທັງນັ້ນ ທາງພາກສ່ວນທີ່ກ່ຽວຂ້ອງກໍ່ໄດ້ເລັ່ງມືປັບປຸງແກ້ໄຂຢູ່ ແລະ ຫວັງວ່າຫາກທ່ານໃດມີບ້ານໃກ້ເຮືອນຄຽງ ຫລື ມີພີ່ນ້ອງທີ່ຕິດແທດຂອບເຂດເສັ້ນທາງດ່ວນ ກໍ່ພະຍາຍາມ ເບິ່ງແຍງລູກຫລານເຂດໃກ້ໃຫ້ເປັນຢ່າງດີ ເພາະເສັ້ນທາງດ່ວນ ເປັນເຂດທີ່ມີຍານພະນະສັນຈອນດ້ວຍຄວາມໄວສູງ. ຂ່າວກ່ອນໜ້ານີ້ ຜູ້ສັນຈອນທີ່ໃຊ້ພາຫະນະເຊັ່ນ: ລົດຈັກ, ​ລົດໄຖ ກໍ່ຄວນງົດຂຶ້ນທາງດ່ວນ ແລະ ທຸກຄົນຄວນເຄົາລົບກົດຈາລະຈອນໂດຍການບໍ່ຂັບຂີ່ຍ້ອນສອນ. ນອກຈາກນີ້, ພາກສ່ວນພາກສ່ວນທີ່ກ່ຽວຂ້ອງກັບໂຄງການທາງດ່ວນຄວນເຂົ້າມາແກ້ໄຂບັນຫາດັ່ງກ່າວຢ່າງຮີບດ່ວນ ເພື່ອໃຫ້ທາງດ່ວນຮັບປະກັນຄວາມປອດໄພຕໍ່ຜູ້ຊົມໃຊ້.

ເພື່ອຮັບປະກັນການເດີນທາງ ແລະ ຫຼີກລ່ຽງຄວາມສ່ຽງຈາກການເກີດອຸບັດຕິເຫດ ບັນຫາດັ່ງນີ້ຕ້ອງໄດ້ຮັບການຮ່ວມມືຈາກຫຼາຍຝ່າຍບໍ່ວ່າຈະເປັນປະຊາຊົນຜູ້ລ້ຽງສັດກໍ່ຕ້ອງມີການຄຸ້ມຄອງສັດລ້ຽງຂອງຕົນເອງບໍ່ປອຍຊະຊາຍໃຫ້ມາໃກ້ເຂດທາງດ່ວນ, ພາຍຫຼັງທີ່ເປີດໃຫ້ໃຊ້ບໍລິການທາງດ່ວນນັບຕັ້ງແຕ່ວັນທີ 21 ທັນວາ 2020 ເປັນຕົ້ນມາ ປະກົດວ່າຢູ່ຕາມສາຍທາງດ່ວນດັ່ງກ່າວຍັງພົບເຫັນສັດລ້ຽງຈໍານວນຫຼາຍເຊັ່ນ: ງົວ, ຄວາຍ, ໝາ ແລະ ແບ້ ທີ່ຫາກິນຢູ່ຕາມແຄມທາງນອກຮົ້ວກັ້ນທາງດ່ວນ ແລະ ມີສັດລ້ຽງບາງໂຕໄດ້ແລ່ນຕັດໜ້າລົດ, ນອກນັ້ນຍັງມີປະຊາຊົນຈໍານວນໜຶ່ງທີ່ໃຊ້ລົດໄຖນາ (ລົດຕ໋ອກຕ໋ອກ) ແລະ ມີລົດຈັກຂຶ້ນແລ່ນຕາມທາງດ່ວນນໍາອີກ ເຊິ່ງສິ່ງເຫຼົ່ານີ້ມັນເກີດໃຫ້ມີບັນຫາໃນການສັນຈອນ ເຮັດໃຫ້ຜູ້ຂຶ້ນໃຊ້ທາງດ່ວນມີຄວາມກັງວົນກ່ຽວກັບຄວາມປອດໄພ.

ນອກຈາກພົບສັດລ້ຽງ ແລະ ພາຫະນະຫ້າມຂຶ້ນທາງດ່ວນແລ້ວ ຍັງພົບກັບບັນຫາຜູ້ສັນຈອນບາງຄົນເຮັດຜິດກົດລະບຽບໂດຍການຂັບລົດຍ້ອນສອນ ເຊິ່ງພຶດຕິກຳແບບນີ້ມັນສ້າງຄວາມອັນຕະລາຍໃຫ້ກັບຜູ້ໃຊ້ລົດ-ໃຊ້ຖະໜົນເທິງທາງດ່ວນ. ມີລາຍງານວ່າ ໄດ້ເກີດອຸບັດຕິເຫດລົດຕຳໝາແລ່ນຕັດໜ້າລົດເທິງທາງດ່ວນ ເຮັດໃຫ້ໜ້າລົດເກີດຄວາມເສຍຫາຍ ແລະ ໝາຕາຍ, ໂດຍຜູ້ໃຊ້ ເຟສບຸກ​ Bounthieng Lattanavong ໄດ້ໂພສ​ໃນວັນທີ​ 23 ​ທັນວາ​ 2020 ນີ້ວ່າ: “Laos only ທາງດ່ວນຕ້ອງ(ຕ້ອງ)ຮັບປະກັນຄວາມປອດໄພກວ່ານີ້ ຕ້ອງບໍ່ມີງົວ ຕ້ອງບໍ່ມີສັດອື່ນໆມາເລາະຢູ່ຕາມທາງດ່ວນ. ມື້ວານເຫັນຢູ່ facebook ເຫັນມີຄົນເອົາຮູບງົວຢູ່ທາງດ່ວນລົງ ຄິດວ່າແມ່ນຮູບຕອນເຂົາກໍ່ສ້າງ ຈົນໄດ້ມາເຫັນດ້ວຍຕາໂຕເອງ ຈົນປະສົບອຸບັດຕິເຫດດ້ວຍຕົນເອງຈຶ່ງຮູ້ວ່າທີ່ເຂົາເອົາລົງນັ້ນແມ່ນຄວາມຈິງ.”