ເຝົ້າລະວັງໄວຣັດໂຄໂລນາໃນລາວແລະວິທີການປ້ອງກັນ

ການລະບາດພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (Novel Corona Virus-nCOV) ເມືອງອູຫັ້ນ, ແຂວງຫູເປີ່ຍ, ສປ. ຈີນ, ຕາມບົດລາຍງານສະພາບການຂອງ PHEOC ສະບັບເລກທີ 05, ລົງວັນທີ 25 ມັງກອນ 2020. ສະຖານະການລ່າສຸດ ຂອງການລະບາດພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (Novel Corona Virus-nCOV) ເມືອງອູຫັ້ນ ແຂວງຫູເປີ່ຍ ສປ ຈີນ, ກະຊວງສາທາລະນະສຸກ ສປ ຈີນ ໄດ້ລາຍງານກໍລະນີ ຄົນເຈັບທີ່ຕິດເຊື້ອພະຍາດອັກເສບປອດ ທີ່ເກີດຈາກເຊື້ອ novel Corona Virus ມີທັງໝົດ 1.287 ກໍລະນີ, ເສຍຊີວິດ 41 ກໍລະນີ (ເມືອງອູຫັ້ນ 39 ກໍລະນີ ແລະອີກ 2 ກໍລະນີ ຈາກເມືອງ ອື່ນ) ຄົນເຈັບໜັກ 237 ກໍລະນີ. ຕາມການລາຍງານ ສະເພາະໃນ ສປ ຈີນ ມີທັງໝົດ 29 ເມືອງ, ປັດຈຸບັນ ພວມຕິດຕາມຜູ້ສຳຜັດ ແລະໃກ້ຊິດຄົນເຈັບ ຕິດເຊື້ອ 15 ຄົນ (ຂໍ້ມູນຈາກ China National Health Commission). ກໍລະນີ ຄົນເຈັບ ຈາກເມືອງອູຫັ້ນ ເດີນທາງໄປປະເທດອື່ນ ມີຄື:

– ຮົງກົງ: 5 ກໍລະນີ, – ມາເກົ້າ: 2 ກໍລະນີ, – ໃຕ້ຫວັນ: 3 ກໍລະນີ, – ໄທ : 4 ກໍລະນີ, ແລະເປັນຄົນໄທ 1 ກໍລະນີ (2 ກໍລະນີ ປີ່ນປົວດີຂື້ນ), – ຍີ່ປຸ່ນ: 2 ກໍລະນີ (1 ກໍລະນີປີ່ນປົວດີຂື້ນ), – ສ. ເກົາຫລີ: 2 ກໍລະນີ, – ຫວຽດນາມ: 2 ກໍລະນີ, – ສິງກະໂປ : 3 ກໍລະນີ, – ສ. ອາເມລິກາ: 2 ກໍລະນີ, – ເນປານ: 1 ກໍລະນີ (ລາຍງານໃໝ່), – ຝຣັ່ງ: 2 ກໍລະນີ (ລາຍງານໃໝ່) ສຳລັບ ມາດຕະການເຝົ້າລະວັງ ແລະ ໂຕ້ຕອບ ໃນ ສປປ ລາວ ມາຮອດປັດຈຸບັນ ຍັງບໍ່ມີລາຍງານກໍລະນີ ສົງໃສນຳເຂົ້າເທື່ອ, ກະຊວງສາທາລະນະສຸກ ສປປ ລາວ ກໍ່ໄດ້ເອົາໃຈໃສ່ຕິດຕາມສະພາບການຢ່າງໃກ້ຊິດ ແລະຈັດຕັ້ງປະຕິບັດ ວາງມາດຕະການໃນການປ້ອງກັນ. ໃນວັນທີ 25 ມັງກອນ 2020 ນີ້ ມີລະອຽດລຸ່ມນີ້: 1. ການປະສານງານ ແລະນິຕິກຳ, • ພົວພັນປະສານງານກັບແຕ່ລະພາກສ່ວນເພື່ອອັບເດດສະພາບການປະຈຳວັນ,

• ສຳເລັດການສັງລວມສະພາບການຂອງພະຍາດ nCOV ເພື່ອລາຍງານການນຳກະຊວງສາທາລະນະສຸກ ລາຍງານຫ້ອງວ່າການລັດຖະບານ. • ສຳເລັດສັງລວມທີມແພດສູນກາງ ທີ່ສາມາດສື່ສານພາສາຈີນ ໄດ້ໃນບັນດາໂຮງໝໍສູນກາງ ພ້ອມທັງຈັດຕາຕະລາງປະຈຳການເພື່ອໂທຕິດຕໍ່ກໍລະນີມີຄົນເຈັບສົງໃສທີ່ເປັນຄົນຈີນ ມາບໍລິການ. 2. ການເຝົ້າລະວັງ ແລະວິເຄາະ, • ສໍາເລັດການຮ່າງແບບຟອມການສອບສວນການລະບາດພະຍາດ nCOV, • ສໍາເລັດການຮ່າງແບບຟອມກໍລະນີສໍາພັດ ຂອງພະຍາດ nCOV, • ໂທຕິດຕາມ ແລະສອບຖາມ ປະຫວັດພ້ອມທັງໃຫ້ຄຳແນະນຳແກ່່ຜູ້ທີ່ໂທເຂົ້າມາປືກສາໃນສາຍດ່ວນ 166 ແລະສາຍດ່ວນ IHR ທີ່ກົມຄວບຄຸມພະຍາດຕິດຕໍ່, 3. ວຽກງານປິ່ນປົວ ແລະປ້ອງກັນການຕິດເຊື້ອ, – ຈັດຕາຕະລາງປະຈຳການແພດໝໍໃນໂຮງໝໍສູນກາງເພື່ອໂທຕິດຕໍ່ກໍລະນີມີຄົນເຈັບສົງໃສທີ່ເປັນຄົນຈີນມາບໍລິການ.

– ກົມຄວບຄຸມພະຍາດຕິດຕໍ່ສະເໜີຂໍເຈວ (ນ້ຳຢາ) ລ້າງມືຈາກກົມອາຫານ ແລະຢາ, ພ້ອມທັງສຳເລັດແຈກຢາຍໃຫ້ພະແນກສາທາແຂວງ (ໂຮງໝໍແຂວງ ແລະດ່ານທົ່ວປະເທດ), ສືບຕໍ່ກະກຽມແຈກຢາຍ ໃຫ້ 5 ໂຮງໝໍສູນກາງ, ໂຮງໝໍທະຫານ ແລະຕຳຫລວດ. 4. ການສື່ສານເພື່ອຫລຸດຜ່ອນຄວາມສ່ຽງ, – ສຳເລັດສ້າງຂໍ້ມູນຂ່າວສານ nCOV ທີ່ເຮັດເປັນ 3 ພາສາ (ລາວ,ຈີນ ແລະອັງກິດ) ເພື່ອແຈກຢາຍໃຫ້ຜູ້ໂດຍສານຂາເຂົ້າ ຢູ່ສະໜາມບີນ ແລະດ່ານຕ່າງໆ ຊຶ່ງເລີ່ມແຈກຢາຍແລ້ວ ສຳລັບສະໜາມບີນວັດໄຕສາກົນ, 5. ວຽກງານດ່ານເຂົ້າ-ອອກ, – ສຳເລັດໃຫ້ຂໍ້ມູນຂ່າວສານ ແລະຄວາມຮູ້ກ່ຽວກັບພະຍາດອັກເສບປອດ ທີ່ເກີດຈາກເຊື້ອຈຸລະໂລກ nCOV ໃຫ້ພະນັກງານຢູ່ສະໜາມບີນວັດໄຕ ສາກົນ ພ້ອມທັງວິທີປ້ອງກັນຕົນເອງ ແລະກົນໄກການປະສານງານເວລາພົບຜູ້ໂດຍສານທີ່ສົງໃສເປັນພະຍາດດັ່ງກ່າວ.