ເຈົ້າໜ້າທີ່ອອກກວດກາກັກຜູ້ກະທໍາຜິດໄດ້ 11 ຄົນພ້ອມຢາບ້າ 295 ເມັດພ້ອມເຮັດບົດບັດທຶກກັບເຈົ້າຂອງຮ້ານເກມ 1 ຮ້ານ

ໃນວັນທີ 24 ເມສາ 2020 ກອງພັນປ້ອງກັນເຄື່ອນທີ່ ປກສ ນະຄອນຫຼວງວຽງຈັນ ສົມທົບກັບກອງບັນຊາການທະຫານ ນະຄອນຫຼວງວຽງຈັນ ອອກກວດກາລາດຕະເວນຕາມເສັ້ນທາງຂອບເຂດຮັບຜິດຊອບ ສາມາດກັກຜູ້ກະທຳຜິດ 11 ຄົນ ພ້ອມຢາບ້າ 295 ເມັດ, ລົດຈັກ 1 ຄັນ ແລະ ເຮັດບົດບັນທຶກກ່າວເຕືອນເຈົ້າຂອງຮ້ານເກມ 1 ຮ້ານ.

ໃນເວລາ 19:20 ໂມງ ໄດ້ພົບເຫັນຜູ້ຕ້ອງສົງໃສເປັນຊາຍ 2 ຄົນ ຈອດລົດຢູ່ແຄມທາງແຖວເດີນທາດຫຼວງ ໜ້າຫໍສະພາແຫ່ງຊາດ, ຈຶ່ງໄດ້ເຂົ້າສອບຖາມ ແລະ ກວດຄົ້ນ ພົບເຫັນຢາບ້າ 10 ເມັດໃນຖົງໂສ້ງຂອງທ້າວ ໄຊປັນຍາ, ອາຍຸ 31 ປີ, ປະຊາຊົນບ້ານໂພນສະຫວັນໃຕ້ ເມືອງສີສັດຕະນາກ ແລະ ຢາບ້າ 40 ເມັດໃນຖົງພາຍຂອງທ້າວ ວິໄລຫົງ, ອາຍຸ 29 ປີ,

ປະຊາຊົນບ້ານໂພນທັນ ເມືອງໄຊເສດຖາ, ເຈົ້າໜ້າທີ່ຈຶ່ງໄດ້ນໍາຕົວທັງສອງຄົນ ພ້ອມຂອງກາງ ແລະ ລົດຈັກສີຟ້າ ເລກທະບຽນ ຈຈ 5299 ກໍາແພງນະຄອນ ມາກອງພັນປ້ອງກັນເຄື່ອນທີ່ ເພື່ອດໍາເນີນການສືບສວນ ແລ້ວຈຶ່ງນໍາສົ່ງຕົວຜູ້ກ່ຽວທັງສອງໃຫ້ກອງຄະດີອາຍາ ປກສ ນະຄອນຫຼວງວຽງຈັນ ສືບຕໍ່ດໍາເນີນການສືບສວນ-ສອບສວນຕາມລະບຽບກົດໝາຍ.

ຕໍ່ມາເວລາປະມານ 21:30 ໂມງ ໄດ້ເຂົ້າກວດກາຮ້ານອິນເຕີເນັດກາເຟ່ ຢູ່ເຂດບ້ານໂພນຕ້ອງສະຫວາດ ເມືອງຈັນທະບູລີ ພົບເຫັນໄວລຸ້ນຈໍານວນໜຶ່ງກຳລັງຊຸມນຸມກັນຢູ່ຮ້ານເກມໂດຍບໍ່ເປິດໄຟ, ຈຶ່ງໄດ້ເຂົ້າກວດກາ ແລະ ພົບເຫັນຢາບ້າ 245 ເມັດ ໃນຖົງຍາງນ້ອຍ ຊຸກເຊືອງໄວ້ຢູ່ຕັ່ງນັ່ງ, ຈຶ່ງໄດ້ປະສານສົມທົບພາກສ່ວນກ່ຽວຂ້ອງກວດຄົ້ນສະຖານທີ່

ພົບອຸປະກອນການເສບຈໍານວນຫຼາຍ ຢູ່ໃນຫ້ອງນ້ໍາຂ້າງຮ້ານເກມ ແລະ ພົບເຫັນຊາຍໜຸ່ມຈໍານວນໜຶ່ງຊຸມນຸມກັນຕີສະນຸກເກີ້ຢູ່ໃນຮ້ານ, ຈຶ່ງໄດ້ເຮັດບົດບັນທຶກກ່າວເຕືອນທ້າວ ບຸນລ້ຽງ, ອາຍຸ 34 ປີ, ເຈົ້າຂອງຮ້ານ ເພື່ອເປັນຂໍ້ມູນຫຼັກຖານ; ສ່ວນໄວລຸ້ນທັງໝົດມີຈໍານວນ 9 ຄົນ, ຍິງ 1 ຄົນ ໄດ້ນໍາຕົວໄປໄວ້ຫ້ອງຕໍາຫຼວດ ປກສ ນະຄອນຫຼວງວຽງຈັນ ເພື່ອດໍາເນີນການສືບສວນ.