ພຣະທາດໂມລີປະຕູມິຕິສູ່ເມືອງບາດານ

ວັດພຣະທາດໂມລີເປັນວັດທີ່ເກົ່າແກ່ເກືອບ 450 ປີ ຕາມການສັນນິຖານຂອງບັນດານັກປະຫວັດສາດ ຄາດວ່າສ້າງໃນສະໄໝ ພຣະເຈົ້າໄຊຍະເສດຖາທິຣາດ ກະສັດລ້ານຊ້າງ ຜູ້ສະຖາປານາ ເມືອງວຽງຈັນ ເປັນນະຄອນຫລວງຣາຊະທານີ, ພຣະອົງເປັນກະສັດທີ່ໃສ່ໃຈສາສະນູປະຖຳ ຄໍ້າຈູນວັດວາພຣະສົງ, ພຣະອົງຊົງໂປຣດໃຫ້ ສ້າງວັດ ສ້າງພຣະພຸດທະຮູບ ເຈດີ ຢ່າງຫລວງຫລາຍເກີນຈະນຳມາບັນຍາຍໄດ້.

ວັດພຣະທາດໂມລີ ກໍ່ເປັນວັດໜຶ່ງ ທີ່ມີສິລະປະເອກະລັກສະໄໝລ້ານຊ້າງຂອງພຣະອົງ ວັດພຣະທາດໂມລີ, ບ້ານຈອມສີ ເມືອງໄຊເສດຖາ ນະຄອນຫລວງວຽງຈັນ. ຂຶ້ນ 15 ຄໍ່າເດືອນ 7 ຫຼື (ເດືອນ 7 ເພັງ) ຂອງທຸກໆປີ ແມ່ນບຸນປະເພນີ ບູຊານະມັດສະການ ພຣະທາດໂມລີ ບ້ານຈອມສີ ເມືອງໄຊເສດຖາ ນະຄອນຫຼວງວຽງຈັນ

ບັນຍາກາດພາຍໃນງານແມ່ນລຽບງ່າຍ ປະຊາຊົນທີ່ມາຮ່ວມງານແມ່ນມີພຽງປະຊາຊົນພາຍໃນບ້ານ ແລະ ບ້ານອ້ອມຂ້າງຈຳນວນໜຶ່ງ ສຳລັບວັນເສົາ ແຮມ 1 ຄໍ່າເດືອນ 7 ແມ່ນຈະມີພິທີຕັກບາດຖວາຍທານແດ່ພຣະສົງ ໃນຕອນເຊົ້າ ຫຼັງຈາກນັ້ນ ແມ່ນຈູດບັ້ງໄຟບູຊາຕາມສົມຄວນ