ປະເທດລາວບໍ່ມີຄົນຕິດເຊື້ອໄວຣັດໂຄໂລນາແລະໄວຣັດໂຄໂລນາກຳເນີດມາຈາກຕະຫຼາດສົດໃນນະຄອນອູ່ຮັ່ນ

ເບື້ອງຕົ້ນ ທາງການໄດ້ຮັບລາຍງານຈາກ 2 ແມ່ລູກຄົນຈີນທີ່ມາຈາກເມືອງອູ່ຮັ່ນ ເມື່ອວັນທີ 20 ມັງກອນ 2020 ແລະ ທາງການໄດ້ລົງໄປຕິດຕາມ ເຊິ່ງເຜີດເຜີຍວ່າເຈັບຫົວຊື່ໆ ແຕ່ທາງການກໍຍັງໄດ້ຕິດຕາມ ແລະ ມີການກວດກາແຕ່ບໍ່ພົບເຊື້ອ ແລ້ວຈຶ່ງປ່ອຍໂຕ ແລະ ໃນປັດຈຸບັນກໍຕິດຕາມຢູ່ ແຕ່ກໍບໍ່ພົບຫຍັງ. ສ່ວນກໍລະນີ ຂອງນັກສຶກສາລາວຈາກຈີນທີ່ເປັນຫວັດ, ທ່ານລັດຖະມົນຕີກ່າວວ່າ ພໍ່ແມ່ຂອງຜູ້ກ່ຽວໄດ້ພາມາກວດທີ່ໂຮງໝໍມະໂຫສົດ ແລະ ທາງແພດໄດ້ມີການກວດກາຫາເຊື້ອ ປາກົດວ່າຜົນກວດເປັນລົບ (ບໍ່ມີເຊື້ອໄວຣັດໂຄໂຣນາສາຍພັນໃໝ່) ແລະ ຄວາມຈິງແລ້ວແມ່ນເປັນໄຂ້ຫວັດທຳມະດາ.

ສ່ວນອີກຂ່າວລືໜຶ່ງທີ່ຖືກເຜີຍແຜ່ໂດຍເຟສບຸກເພຈຈຳນວນໜຶ່ງວ່າ ມີກໍລະນີຕິດເຊື້ອລາຍໜຶ່ງເຂົ້າຮັກສາຢູ່ໂຮງໝໍມິດຕະພາບ, ທ່ານລັດຖະມົນຕີກ່າວວ່າ ໃນຮູບແມ່ນແພດໃສ່ຊຸດ PE (ຊຸດປ້ອງກັນ) ເນື່ອງຈາກຄົນເຈັບທີ່ມາຫາເປັນກໍລະນີສົງໄສ ແລະ ແພດຕ້ອງໄດ້ນຸ່ງເຄື່ອງປ້ອງກັນໂຕເອງ ເພື່ອສອບຖາມປະຫວັດຄົນເຈັບ ແລະ ເກັບຕົວຢ່າງເພື່ອໄປກວດຫາເຊື້ອ ເຊິ່ງນີ້ເປັນວິທີເຮັດວຽກຂອງແພດໝໍ. ຜົນການກວດເຊື້ອພົບວ່າ ຜົນເປັນລົບ ບໍ່ພົບເຊື້ອໄວຣັດໂຄໂຣນາສາຍພັນໃໝ່ເຊັ່ນກັນ ແຕ່ເປັນໄຂ້ຫວັດຕິດໜາວເທົ່ານັ້ນ.

ທ່ານກ່າວຢໍ້າອີກວ່າ ສະພາບປັດຈຸບັນຢູ່ລາວ ແມ່ນບໍ່ທັນມີກໍລະນີຢືນຢັນວ່າຕິດເຊື້ອເທື່ອ ມີແຕ່ກໍລະນີສົງໄສ ແລ້ວກໍມີການຕິດຕາມ-ກວດຫາເຊື້ອເທົ່ານັ້ນ ເຊິ່ງຜົນທີ່ອອກມາແມ່ນເປັນລົບຕາມທີ່ກ່າວມາເບື້ອງຕົ້ນ. ທ່ານ ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກໄດ້ຖະແຫຼງຂ່າວຕໍ່ສື່ມວນຊົນເມື່ອຕອນບ່າຍຂອງມື້ນີ້ (27 ມັງກອນ 2020) ກ່ຽວກັບສະຖານນະການເຝົ້າລະວັງພະຍາດອັກເສບປອດຈາກເຊື້ອຈຸລະໂລກ (ໄວຣັດ) ໂຄໂຣນາສາຍພັນໃໝ່ (2019-nCoV) ຢູ່ ສປປ ລາວ ເພື່ອຕອບຂໍ້ສົງໄສຂອງສັງຄົມກ່ຽວກັບຄຳຖາມຫຼາຍຄຳຖາມ ເປັນຕົ້ນແມ່ນ ມີກໍລະນີຕິດເຊື້ອຢູ່ລາວບໍ່, ທາງການໄດ້ກະກຽມການຮັບມືແນວໃດ,

ຈະປ້ອງກັນແນວໃດ ແລະ ສະພາບປັດຈຸບັນລາວມີແນວໃດແດ່ແລ້ວ. ພ້ອມນັ້ນທ່ານຍັງກ່າວວ່າ ຂ່າວລືທີ່ມີການເຜີຍແຜ່ກັນໃນໂລກອອນລາຍວ່າ ມີກໍລະນີແລ້ວໃນໂຮງໝໍມິດຕະພາບແມ່ນບໍ່ແມ່ນຄວາມຈິງ. ທ່ານ ດຣ. ບຸນກອງ ໄດ້ກ່າວເຖິງທີ່ໄປທີ່ມາຂອງໄວຣັດດັ່ງກ່າວ ເຊິ່ງມີຕົ້ນກຳເນີດມາຈາກເມືອງອູ່ຮັ່ນ ແຂວງຫູເປີ່ຍ ທາງພາກກາງຂອງຈີນ ສາມາດຕິດຕໍ່ຈາກສັດສູ່ຄົນ ແລະ ຈາກຄົນສູ່ຄົນ ໂດຍສະຖານະການປັດຈຸບັນຢູ່ຈີນມີຜູ້ຕິດເຊື້ອແລ້ວ 2,795 ລາຍ ແລະ ເສຍຊີວິດ 80 ລາຍ ແລະ ປະເທດອື່ນໆອີກຈຳນວນໜຶ່ງ. ທ່ານກ່າວວ່າ ໄລຍະບົ່ງພະຍາດແມ່ນຢູ່ທີ່ 7-14 ມື້ ຈົນກວ່າຈະຮູ້ວ່າຕິດເຊື້ອດັ່ງກ່າວ ຫຼື ບໍ່ ແລະ ໃນໄລຍະດັ່ງກ່າວນີ້ສາມາດເຮັດໃຫ້ຜູ້ທີ່ມີເຊື້ອສາມາດແຜ່ເຊື້ອໃຫ້ຄົນອື່ນຕໍ່ໄດ້.

ທ່ານກ່າວວ່າ ທາງກະຊວງສາທາລະນະສຸກຫຼັງຈາກໄດ້ຮັບການລາຍງານຂອງ ສປ ຈີນ ແລະ ອົງການອະນາໄມໂລກກ່ຽວກັບສະຖານະການດັ່ງກ່າວ, ກໍໄດ້ກະກຽມ ແລະ ແຈ້ງການໄປຫາແຕ່ລະແຂວງ, ພ້ອມທັງມີແພດກວດກາຈຸດເຂົ້າ-ສົ່ງດ່ານຕ່າງໆ 27 ແຫ່ງທົ່ວປະເທດ. ພ້ອມນີ້ ກໍໃຫ້ຂໍ້ມູນກ່ຽວກັບເຊື້ອໄວຣັດດັ່ງກ່າວກັບແພດໝໍ ເພື່ອປ້ອງກັນແພດໝໍ. ຂະນະດຽວກັນກໍໄດ້ແຕ່ງຕັ້ງຄະນະກຳມະການເພື່ອຮັບຜິດຊອບຂ່າວສານ, ກັ່ນກອງ, ວິເຄາະ, ປິ່ນປົວ ແລະ ຄວບຄຸມພະຍາດ ແລະ ມີການກະກຽມຄວາມພ້ອມຂອງສູນວິເຄາະລະບາດວິທະຍາ ໃຫ້ສາມາດກວດວິເຄາະໄດ້ 24 ຊົ່ວໂມງ. ທີ່ຜ່ານມາ ນອກຈາກໄຂ້ຫວັດສາຍພັນໃໝ່ຕ່າງໆແມ່ນສາມາດເຮັດໄດ້ ແລະ ໃນສ່ວນຂອງໄວຣັດໂຄໂຣນາທາງສູນກໍສາມາດກວດວິເຄາະໄດ້.

ອີກຢ່າງໜຶ່ງກໍຄື ທາງການໄດ້ກະກຽມໂຮງໝໍທີ່ມີຄວາມສາມາດຮັບມືໄດ້ ປະກອບດ້ວຍ: ໂຮງໝໍມິດຕະພາບ, ໂຮງໝໍມະໂຫສົດ ແລະ ໂຮງໝໍເສດຖາທິຣາດ. ພ້ອມນັ້ນກໍແຈ້ງໃຫ້ໂຮງໝໍໃນແຕ່ລະແຂວງ ໂດຍສະເພາະໂຮງໝໍໃນບັນດາແຂວງພາກເໜືອທີ່ມີຊາຍແດນຕິດກັບຈີນຂໍໃຫ້ກຽມພ້ອມ ແລະ ສົນທະນາປຶກສາກັບຝ່າຍຈີນເພື່ອແລກປ່ຽນຂໍ້ມູນຮ່ວມກັນ. ສຳລັບຄຳຖາມທີ່ວ່າ ໃນລາວພົບກໍລະນີຕິດເຊື້ອໄວຣັດໂຄໂຣນາສາຍພັນໃໝ່ ຫຼື ຍັງ ນັ້ນ, ທ່ານ ດຣ. ບຸນກອງ ແຈ້ງວ່າ ປັດຈຸບັນທາງການໄດ້ຕິດຕາມທັງນັກທ່ອງທ່ຽວ, ນັກສຶກສາ ແລະ ຄົນລາວທີ່ເດີນທາງມາຈາກ ສປ ຈີນ ແລະ ໄດ້ແຈ້ງການໃຫ້ສາຍການບິນລາວ ໃຫ້ຊ່ວຍປະກາດໃຫ້ວ່າ ຜູ້ເດີນທາງຄົນໃດທີ່ມາຈາກຂົງເຂດເມືອງອູ່ຮັ່ນ ຫຼື ແຂວງຫູເປີ່ຍ ແມ່ນໃຫ້ແຈ້ງວ່າມາຈາກນັ້ນ. ຖ້າພົບວ່າມີອາການໜ້າສົງໄສ ແມ່ນຈະໃຫ້ແຈ້ງເຖິງຄະນະຮັບຜິດຊອບ ທາງສາຍດ່ວນ 166, ສາຍ IHR ແລະ ຄະນະກຳມະການຮັບຜິດຊອບຊາບ.

ພ້ອມນີ້ ເມື່ອວັນທີ 26 ມັງກອນ 2020 ທີ່ຜ່່ານມາ ທາງການຈີນປະກອບດ້ວຍ ສຳນັກງານບໍລິຫານຄຸ້ມຄອງຕະຫຼາດແຫ່ງລັດ, ກະຊວງກະສິກຳ ແລະ ວຽກງານຊົນນະບົດ ພ້ອມດ້ວຍສຳນັກງານບໍລິຫານປ່າໄມ້ ແລະ ທົ່ງຫຍ້າແຫ່ງຊາດຈີນ ໄດ້ອອກຖະແຫຼງການຮ່ວມກັນວ່າ ທາງການຈີນໄດ້ປະກາດແຜນການຢຸດຕິການຄ້າສັດປ່າທົ່ວປະເທດ ເພື່ອຫຼຸດຜ່ອນການແຜ່ກະຈາຍຂອງພະຍາດອັກເສບປອດຈາກເຊື້ອຈຸລະໂລກໂຄໂຣນາສາຍພັນໃໝ່ ໂດຍຄຳສັ່ງດັ່ງກ່າວຈະມີຜົນບັງຄັບໃຊ້ໃນທັນທີ ແລະ ຈະບໍ່ຖືກຍົກເລີກຈົນກວ່າຈະມີການຢຸດຕິຂອງພະຍາດລະບາດ. ທຸລະກິດ ແລະ ຜູ້ປະກອບການທີ່ຝ່າຝືນຄຳສັ່ງ ຈະຖືກສັ່ງປິດ ແລະ ຜູ້ຖືກສົງໄສທີ່ລະເມີດຂັ້ນຮຸນແຮງຈະຖືກສົ່ງຕົວໃຫ້ເຈົ້າໜ້າທີ່ກວດສອບ ເພື່ອເຂົ້າສູ່ຂະບວນການສອບສວນທາງອາຍາ. ເມື່ອຕອນເຊົ້າຂອງມື້ນີ້ (27 ມັງກອນ 2020) ສຳນັກຂ່າວຊິນຫົວລາຍງານວ່າ ຄະນະຜູ້ຊ່ຽວຊານປະຈຳສູນຄວບຄຸມ ແລະ ປ້ອງກັນພະຍາດແຫ່ງຊາດຈີນ

ໄດ້ປະສົບຄວາມສຳເລັດໃນການແຍກເຊື້ອຈຸລະໂລກ (ໄວຣັດ) ໂຄໂຮນາສາຍພັນໃໝ່ (2019-nCoV) ຈາກຕົວຢ່າງຈາກສິ່ງແວດລ້ອມທີ່ເກັບຈາກຕະຫຼາດອາຫານທະເລໃນນະຄອນອູ່ຮັ່ນ ທາງພາກກາງຂອງ ສປ ຈີນ ເຊິ່ງບົ່ງຊີ້ວ່າ ໄວຣັດຊະນິດນີ້ມີຕົ້ນຕໍມາຈາກສັດປ່າທີ່ຖືກຈຳໜ່າຍຢູ່ໃນຕະຫຼາດ. ສະຖາບັນຄວບຄຸມ ແລະ ປ້ອງກັນພະຍາດຈາກເຊື້ອຈຸລະໂລກແຫ່ງຊາດ ເຊິ່ງຂຶ້ນກັບສູນດັ່ງກ່າວພົບວ່າ ຕົວຢ່າງ 33 ລາຍການຈາກທັງໝົດ 585 ລາຍການ ທີ່ເກັບກຳຈາກຕະຫຼາດຂາຍສົ່ງອາຫານທະເລຫົວໜານໃນ ໃນນະຄອນອູ່ຮັ່ນ ແຂວງຫູເປີ່ຍ ມີກົດນິວຄລີອິກຂອງເຊື້ອຈຸລະໂລກໂຄໂຣນາ. ຄະນະຊ່ຽວຊານປະຈຳສະຖາບັນດຳເນີນການເກັບຕົວຢ່າງໃນລະຫວ່າງວັນທີ 1-12 ມັງກອນ ທີ່ຜ່່ານມາຕາມຄຳແນະນຳຂອງສູນ ແລະ ຜູ້ຊ່ຽວຊານເປີດເຜີຍວ່າ ຈາກການສຳຫຼວດຕະຫຼາດຝັ່ງຕາເວັນຕົກຂອງເມືອງ ເຊິ່ງເປັນຮ້ານຂາຍສັດປ່າເປັນຈຳນວນຫຼາຍ ພົບຕົວຢ່າງ 31 ລາຍການ ຈາກ 33 ລາຍການທີ່ມີເຊື້ອຈຸລະໂລກໂຄໂຣນາສາຍພັນໃໝ່ ໂດຍຜົນການສຶກສາລະບຸວ່າ ການລະບາດຂອງເຊື້ອກ່ຽວຂ້ອງກັບການຄ້າສັດປ່າເປັນຢ່າງສູງ. ທັງນີ້ ຜູ້ຊ່ຽວຊານເສີມອີກວ່າ ຄວາມສຳເລັດໃນການແຍກເຊື້ອຈຸລະໂລກຊ່ວຍຢືນຢັນວ່າຕະຫຼາດຂາຍສົ່ງອາຫານທະເລຫົວໜານ ເປັນແຫຼ່ງແຜ່ເຊື້ອຈຸລະໂລກໂຄໂຣນາສາຍພັນໃໝ່ (2019-nCoV) ຂະໜາດໃຫຍ່.