ເກີດເຫດໄຟໄໝ້ປ່າຫຍ້າຢູ່ແຄມຂອງອີກແລ້ວ

ເບື້ອງຕົ້ນໄດ້ມີການແຈ້ງລົດດັບເພີງເພື່ອເຂົ້າຄວບຄຸມບໍ່ໃຫ້ໄຟໄໝ້ແພ່ລາມຕື່ມ ລົດດັບເພີງໄດ້ເດີນທາງໄປຮອດບ່ອນເກີດເຫດ ແລະ ເລີ່ມເຂົ້າດັບໄຟ. ທັງນີ້ຍັງບໍ່ທັນມີລາຍງານເຖິງສາເຫດທີ່ພາໃຫ້ເກີດໄຟໄໝ້ດັ່ງກ່າວເທື່ອ ແຕ່ຄາດວ່າອາດເກີດຈາກການເຜົາຂີ້ເຫຍື້ອຄືກັບຄັ້ງທີ່ຜ່ານມາ.

ນີ້ເປັນຄັ້ງທີ 2 ແລ້ວທີ່ເກີດເຫດໄຟໄໝ້ປ່າຫຍ້າໃນເຂດແຄມຂອງນະຄອນຫຼວງວຽງຈັນ ເຊິ່ງເມື່ອວັນທີ 30 ມັງກອນ 2020 ທີ່ຜ່ານມາ ກໍເກີດເຫດໄຟໄໝ້ມາແລ້ວຄັ້ງໜຶ່ງ ແລະ ພາຍຫຼັງກວດສອບພື້ນທີ່ເກີດເຫດມີການພົບສົບຂອງຜູ້ຊາຍເຊິ່ງຄາດວ່າເປັນຄົນຕ່າງປະເທດ.

ມີລາຍງານວ່າ ໄດ້ເກີດເຫດໄຟໄໝ້ປ່າຫຍ້າຢ່າງຮຸນແຮງ ບໍລິເວນແຄມ ຊື່ກັບບ້ານສີຖານ ເມືອງສີໂຄດຕະບອງ ນະຄອນຫຼວງວຽງຈັນ. ຕາມຂໍ້ມູນຈາກເຟສບຸກ ສະແດງໃຫ້ເຫັນວິດີໂອຂອງເຫດການໄຟໄໝ້ ເຊິ່ງມີຄວັນລອຍກຸ້ມບົດບັງທັດສະນະວິໄສໃນບໍລິເວນເກີດເຫດ.

ວັນທີ 27 ກຸມພາ 2020 ເວລາປະມານ 11 ໂມງ 30 ນາທີ ໄດ້ເກີດເຫດໄຟໄໝ້ປ່າຫຍ້າເຫຼົາ ຢູ່ເຂດ ບ້ານສີຖານເໜືອ ເມືອງສີໂຄດຕະບອງ ນະຄອນຫຼວງວຽງຈັນ ເຊິ່ງເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານອັກຄີໄຟ ນວ ໄດ້ນຳກຳລັງຈຳນວນ 12 ສະຫາຍ ພ້ອມລົດມອບໄຟ 3 ຄັນ

ອອກໄປມອບໄຟຢູ່ ສະຖານທີ່ເກີດເຫດເພື່ອບໍ່ໃຫ້ໄປແຜ່ລາມໄປເຂດຊຸມຊົນ ເຊິ່ງການມອບໄຟຄັ້ງນີ້ ແມ່ນມີຄວາມລຳບາກ ເພາະຈຸດເກີດເຫດເປັນປ່າຫຍ້າເຫຼົາແຫ້ງມີເນື້ອທີ່ກວ້າງຂວາງ ແລະ ມີລົມພັດແຮງຍາກຕໍ່ການມອບໄຟ ຈາກເຫດການທີ່ເກີດຂຶ້ນນັ້ນ ທາງເຈົ້າໜ້າທີ່ໃຊ້ເວລາປະມານ 3 ຊົ່ວໂມງ

ຈຶ່ງສາມາດຄວບຄຸມເພີງໄດ້ ແລະ ຍັງຢູ່ໃນການເຝົ້າລະວັງຂອງເຈົ້າໜ້າທີ່ຕະຫຼອດ 24 ຊົ່ວໂມງ ໂຊກດີການເກີດເພີງເທື່ອນີ້ ບໍ່ມີຄົນ ເສຍຊີວິດ ແລະ ບາດເຈັບ ສ່ວນຜົນເສຍຫາຍມີແຕ່ໄໝ້ປ່າຫຍ້າເຫຼົາເປັນບໍລິເວນກວ້າງ ປັດຈຸບັນ ທາງ ເຈົ້າໜ້າທີ່ກຳລັງຢູ່ໃນຂັ້ນຕອນດຳເນີນການສຶບສວນຫາສາເຫດທີ່ແທ້ຈິງຂອງການເກີດໄຟໄໝ້ຄັ້ງນີ້.