ເມືອງສັງທອງ ມີຄວາມສ່ຽງສູງທີ່ຈະມີການລັກລອບ ຂ້າມໄປມາຂອງແຮງງານລາວ

ພາຍຫຼັງທີ່ມີການແຜ່ລະບາດຂອງພະຍາດ ໂຄວິດ-19 ຂຶ້ນຮອບໃໝ່ຢູ່ປະເທດໄທຊຶ່ງພົບຜູ້ຕິດເຊື້ອເພີ່ມຂຶ້ນຢ່າງໜ້າວິຕົກ ດັ່ງນັ້ນເພື່ອເປັນການປ້ອງກັນ ຫຼື ຕັດໄຟແຕ່ຕົ້ນລົມກ່ຽວກັບພະຍາດດັ່ງກ່າວນີ້, ທ່ານພົງສະຫວັນ ສີລິພັນ ເຈົ້າເມືອງສັງທອງ ໄດ້ອອກແຈ້ງການເມື່ອບໍ່ດົນມານີ້ເຖິງໜ່ວຍງານປ້ອງກັນຊາຍແດນ ຫຼື ປ້ອງກັນຄວາມສະຫງົບ(ປກສ-ປກຊ), ກອງຮ້ອຍຊາຍແດນ 241 ແລະ ກອງພັນ 511 ຢູ່ເມືອງສັງທອງ ໃຫ້ເພີ່ມການລາດຕະເວນຕາມຊາຍແດນໃນການປ້ອງກັນການລັກລອບເຂົ້າ-ອອກແຮງງານລາວ ຢູ່ເມືອງສັງທອງໄປໄທ ຫຼື ແຮງງານໄທເຂົ້າມາລາວແບບຜິດກົດໜາຍ ຊຶ່ງໃຫ້ເນັ້ນລາດຕະເວນຢູ່ບັນດາບ້ານທີ່ມີຊາຍແດນຕິດກັບເມືອງສັງຄົມ.

ຍ້ອນທີ່ຕັ້ງ ແລະ ພູມສັນຖານຂອງ ເມືອງສັງທອງ ນະຄອນຫຼວງວຽງຈັນ ທີ່ກົງກັນຂ້າມກັບ ເມືອງສັງຄົມ ຂອງປະເທດໄທ ໂດຍມີແມ່ນໍ້າຂອງຂັ້ນຊາຍແດນ ຊຶ່ງຖືວ່າເປັນບ່ອນທີ່ແຄບທີ່ສຸດ (ບໍ່ກວ້າງ) ຖ້າທຽບກັບເມືອງອື່ນໆໃນຂອບເຂດທົ່ວປະເທດທີ່ມີແມ່ນໍ້າຂອງຂັ້ນຊາຍແດນລະຫວ່າງລາວ ແລະ ໄທ ຈຶ່ງເຮັດໃຫ້ເມືອງສັງທອງມີຄວາມເປັນໄປໄດ້ສູງທີ່ຈະມີການລັກລອບຂ້າມນ້ຳຂອງຂອງແຮງງານລາວໄປໄທ ຫຼື ແຮງງານໄທມາລາວ ຊຶ່ງບາງຈຸດຄວາມກ້ວາງຂອງແມ່ນໍ້າຂອງທີ່ຂັ້ນຊາຍແດນ ມີປະມານ 100 ແມັດກໍ່ມີ ຊຶ່ງສາມາດລອຍຂ້າມໄດ້ ຫຼື ຍ່າງຂ້າມກໍ່ໄດ້ໃນລະດູແລ້ງ.

ຂ່າວກ່ອນໜ້ານີ້ ລັດຖະບານລາວບໍ່ອະນຸຍາດໃຫ້ຈັດພິທີສູດມົນຂ້າມປີໃນຄໍ່າຄືນຂອງວັນທີ 31 ທັນວາ 2020 ຫາ ວັນທີ 1 ມັງກອນ 2021 ທີ່ຈະມາເຖິງນີ້ໃນຂອບເຂດ ທົ່ວປະເທດ ຍ້ອນວ່າຈະເປັນການໂຮມຊຸມນຸມໃຫ່ຍ ທັງນີ້ກໍ່ເພື່ອເປັນການ ປ້ອງກັນການແຜ່ລະບາດຂອງພະຍາດ ໂຄວິດ-19 ທີ່ເປັນໄພຄຸກຄາມ ແລະ ສ້າງຄວາມວິຕົກກັງວົນໃຫ້ປະຊາຊົນທົ່ວໂລກໃນປັດຈຸບັນ ລວມທັງປະຊາຊົນລາວ.