ອາຖັນໝູປ່ານາຍພານຍີ່ງປືນຄາຕະກຳກັນເອງ

ທ້າວ ເຊັງຕອງ ອາຍຸ 51 ປີ ຢູ່ບ້ານນາຊໍ່າ-ຜາຊ້າງ ເມືອງ ແລະ ແຂວງໄຊຍະບູລີ ໄປລ່າຍິງສັດປ່າເຂດບ້ານນາຊໍ່າ-ຜາຊ້າງ ແລ້ວພົບຮອຍຕີນໝູປ່າ ຈຶ່ງໄດ້ຕິດຕາມນຳໄປເຫັນການເຄື່ອນໄຫວ ຢູ່ໃນສວນມັນຕົ້ນ,ແຕ່ບໍ່ແນ່ໃຈວ່າແມ່ນສັດປ່າ ຫຼື ຄົນ ຈຶ່ງສົງສັນ ຍານເຕືອນ 3-4 ຄັ້ງ. ກໍບໍ່ມີການຕອບກັບ ເລີຍຄິດວ່າແມ່ນສັດ ຈຶ່ງລັ່ນໄກປືນແກັບໃສ່ທັນທີ່ ປະກົດວ່າເປັນຄົນທີ່ໄປລ່າຍິງສັດເຊັນດຽວກັນ ຈົນເສຍຊີວິດຄາທີ່,ເຫດເກີດຂຶ້ນໃນວັນທີ 18 ຕຸລາ ທີ່ຜ່ານມາ. ກອງບັນຊາການ ປກສ ແຂວງໄຊຍະບູລີ ໃຫ້ຮູ້ວ່າ: ໃນວັນທີ 20 ຕຸລາ ທີ່ຜ່ານມາ, ໄດ້ມີຄົນໄປພົບເຫັນສົບເພດຊາຍ ທີ່ຖືກຍິງດ້ວຍອາວຸດປືນຢູ່ສ່ວນ ມັນຕົ້ນ ຂອງປະຊາຊົນຢູ່ເຂດບ້ານນາຊໍ່າ-ຜາຊ້າງ ຈຶ່ງນຳກຳລັງວິຊາສະເພາະລົງກວດກາສະຖານທີ່ເກີດເຫດ ຈຶ່ງຮູ້ວ່າຜູ້ເສຍຊີວິດ ຊື່ ທ້າວ ເຊັງກວຍ ອາຍຸ 25 ປີ ບ້ານຖິ່ນ ເມືອງ ແລະ ແຂວງໄຊຍະບູລີ ,ຈາກການສັນນະສູດ ພົບມີຮ່ອງຮອຍລູກປືນຢູ່ບໍລິເວນເທິງຫູເບື້ອງຂວາ 1 ຮອຍ ແລະ ໃກ້ກັບສົບມີປືນແກັບ 1 ກະບອກ, ຖົງລູກປືນ ແລະ ຄັນຮົ່ມ 1 ອັນ.

ຈາກການບອກເລົ່າຂອງຄົນໃນຄອບຄົວ ໃຫ້ ຮູ້ວ່າ ໃນວັນທີ 18 ຕຸລາ 2020, ຜູ້ເສຍຊີວິດໄດ້ອອກໄປລ່າຍິງສັດປ່າ ແຕ່ບໍ່ເຫັນກັບມາເຮືອນ 2 ວັນແລ້ວ. ຈາກນັ້ນ, ກໍມີປະຊາຊົນ ມາພົບສົບຂອງຜູ້ກ່ຽວຢູ່ຈຸດດັ່ງກ່າວ. ຜ່ານການເກັບກຳຂໍ້ມູນຫຼັກຖານຕ່າງໆ ແລະ ພິສູດສະຖານທີ່ເກີດເຫດ ກໍຮູ້ວ່າ ທ້າວ ເຊັງກວຍ ຍິງດ້ວຍປືນດັດແປງທີ່ໃຊ້ສຳລັບລ່າສັດ. ຈາກນັ້ນ, ເຈົ້າໜ້າທີ່ ກໍໄດ້ຄັດຈອນເປົ້າໝາຍ. ມາຮອດວັນທີ 20 ພະຈິກ 2020, ກໍໄດ້ກັກຕົວເປົ້າໝາຍ ຊື່ ທ້າວ ເຊັງຕອງ ອາຍຸ 51 ປີຢູ່ບ້ານນາຊໍ່າ-ຜາຊ້າງ ເມືອງ ແລະ ແຂວງໄຊຍະບູລີ ໄປສອບສວນ. ຈາການສອບສວນ ທ້າວ ເຊັງຕອງ ສາລະພາບວ່າ: ກ່ອນເກີດເຫດ, ໃນເດືອນສິງຫາ 2020 ໄດ້ນໍາ ເອົາເລົາປືນແກັບ ແລະໂຊກອັບລົດຈັກມາດັດແປງ ເຮັດປືນ ທີ່ຍິງດ້ວຍລູກຍິງເຫຼັກຕະປູຄອນກີດ.ມາໃນວັນທີ 16 ສິງຫາ 2020, ຕົນເອງພ້ອມກັບໝູ່ຄົນບ້ານດຽວກັນ ໄດ້ພາກັນຂັບລົດຈັກຄົນລະຄັນອອກຈາກສະນໍາຢູ່ຫ້ວຍເດື່ອ ຈຸດປະສົງແມ່ນໄປຊອກຫາກິນຢູ່ສະນໍາປາງບົງ ເຂດບ້ານນາຊໍ່າ-ຜາຊ້າງ ໂດຍຖືປືນແກັບດັດແປງ ພ້ອມລູກຈຳນວນ 6 ລູກ ໄປນໍາ.

ຈາກນັ້ນ, ໄດ້ພາກັນນອນພັກເຊົາຄ້າງຄືນ ຢູ່ຖຽງໃນສວນຂອງປະຊາຊົນ ທີ່ເຂດຫ້ວຍມ່ວງ . ຮອດເວລາປະມານ 16:00 ໂມງ ຂອງວັນທີ 18 ຕຸລາ 2020, ຈຶ່ງໄດ້ພາກັນໄປຊອກຍິງສັດປ່າ ຢູ່ບໍລິ ເວນໃກ້ກັບສະນໍາໂດຍໃຫ້ໝູ່ທີ່ໄປນຳຍ່າງເລາະຂຶ້ນ ໄປຕາມສັນພູເຂດຫ້ວຍມ່ວງ; ສ່ວນຕົນເອງແມ່ນຍ່າງລັດໄປຕາມສັນພູເຂດຫ້ວຍຕົ້ນເຜິ້ງ ແລະ ພົບເຫັນຮອຍຕີນໝູປ່າ, ຈຶ່ງໄດ້ປະກອບລູກປືນໃສ່ 1 ລູກກຽມໄວ້ ຮອດເວລາປະມານ 17:00 ໂມງ ໃນຂະນະທີ່ຕິດຕາມຮອຍຕີນໝູປ່າ ໄປຮອດສວນມັນຕົ້ນກໍພົບເຫັນຄ້າຍຄືໂຕໝີ ນັ່ງຢູ່ໃນປ່າມັນຕົ້ນ ຫ່າງ ຈາກຕົນເອງ ປະມານ15 ແມັດ.ແຕ່ບໍ່ແນ່ໃຈວ່າແມ່ນ ໂຕໝີ ຫຼື ຄົນ ຈຶ່ງໄດ້ສົ່ງສັນຍານສຽງເຕືອນ 3-4 ຄັ້ງ. ແຕ່ບໍ່ໄດ້ຍິນສຽງຕອບຄືນ ຈຶ່ງຄິດວ່າແມ່ນໂຕສັດປ່າ.ຈາກນັ້ນ, ກໍຍົກປືນຍິງໃສ່ 1 ບາດ ແລ້ວຍ່າງເຂົ້າໄປເບິ່ງ ປະກົດວ່າແມ່ນຫຼົງຍິງຄົນ ທີ່ມາລ່າສັດຢູ່ຈຸດນັ້ນ ເສຍຊີວິດຄາທີ່.

ພາຍຫຼັງຫຼົງຍິງຄົນເສຍຊີວິດ, ຕົນເອງໄດ້ຍ່າງອອກຈາກສະຖານທີ່ເກີດເຫດ ພ້ອມທັງນໍາເອົາລູກປືນທີ່ຍັງເຫຼືອ ແລະ ກະສອບປືນທີ່ຍິງ ແລ້ວຖິ້ມໃນປ່າ. ຈາກນັ້ນ, ກໍກັບຄືນມາເອົາລົດຈັກຂີ່ໄປສະນໍາຫ້ວຍເດື່ອ ເອົາປືນໄປຊຸກເຊື່ອງໄວ້ໃນປ່າແຄມຖຽງ ແລະ ໄດ້ກັບຄືນເຮືອນເຮັດຄືບໍ່ມີຫຍັງເກີດຂຶ້ນ, ມາວັນທີ 20 ພະຈິກ 2020 ກໍຖືກເຈົ້າ ໜ້າ ທີ່ ປກສ ກັກຕົວໄປດໍາເນີນຄະດີ. ຄະດີດັ່ງກ່າວ, ເຈົ້າໜ້າທີ່ ຍັງຝາກເຕືອນເຖິງພໍ່-ແມ່ປະຊາຊົນວ່າ: ການນຳໃຊ້ອາວຸດປືນທຸກຊະນິດລ່າສັດເປັນສິ່ງທີ່ຜິດກົດໝາຍ ແລະ ທາງເຈົ້າໜ້າທີ່ ໄດ້ພະຍາຍາມລະດົມໃຫ້ຜູ້ທີ່ຄອບຄອງປືນແກັບ ຫຼື ປືນດັດແປງຕ່າງໆນຳມາມອບໃຫ້ເຈົ້າໜ້າທີ່ ເພື່ອຫຼຸດຜ່ອນເຫດຫຼົງຍິງຄົນທີ່ໄປນຳກັນ ຫຼື ບໍ່ໄປນຳກັນເສຍຊີວິດມາແລ້ວຫຼາຍຄົນ ແລະ ທັງເປັນການຫ້າມລ່າສັດຜິດກົດໝາຍ