ສະຖານທີ່ສັກສິດໃນຕຳນານ“ວັດຕາແຫຼວເກົ່າ”

ສົມບັດອັນລ້ຳຄ່າເກືອບຖືກລືມ !! “ວັດຕາແຫຼວເກົ່າ” ເປັນສະຖານທີ່ ເກົ່າແກ່ ແລະ ສັກສິດ ທີ່ ແຂວງ ສະຫວັນນະເຂດ, ວັດຕາແຫລວ ຕັ້ງຢູ່ບ້ານ ຕາແຫລວ ເມືອງ ຈຳພອນ ແຂວງ ສະຫວັນນະເຂດ ເຊິ່ງເປັນສະຖານທີ່ ເກົ່າແກ່ ແລະ ສັກສິດ

ເຊິ່ງວັດແຫ່ງນີ້ ເປັນທີ່ສັກກະ ລະບູຊາ ຂອງຊາວບ້ານຕາແຫລວ ກໍຄືຊາວແຂວງ ສະຫວັນ ນະເຂດ. ຕາມການບອກເລົ່າໃຫ້ຮູ້ວ່າ: ສະໄໝກ່ອນວັດແຫ່ງ ນີ້ໄດ້ຮັບການປົກປັກຮັກສາຈາກເຈົ້າອະທິການວັດຫລາຍອົງ ຈົນຕົກມາຮອດສັດຕະວັດທີ 20 ຄືລະຫວ່າງ ຄສ 1918 ຢາທ່ານ ຈຽງທິຄາຍຸໂກ ມີຈິດໃຈ ເອື້ອເຟື້ອ

ແລະ ຢຶດໝັ້ນໃນຫລັກທຳ ໄດ້ນຳພາອອກຕົນ ຍາດໂຍມ ພາຍໃນບ້ານ ຕາແຫລວ ສ້າງກຸດຕິວິຫານ. ແລະ ກໍ່ກຳແພງອ້ອມວັດ ເຊິ່ງໃນກຸດຕິມີການປະດັບ ປະດາດ້ວຍຮູບແຕ້ມ, ຮູບປັ້ນ ແລະ ຮູບຄວັດລາຍ ດ້ວຍຊ່າງສີມືປານີດບັນຈົງ (ນາຍຊ່າງ ຫລາວ), ການກໍ່ ສ້າງທັງໝົດແມ່ນໄດ້ມາຈາກຄວາມສາມັກຄີ

ແລະ ການ ປະກອບເຫື່ອເທແຮງຂອງປະຊາຊົນ ບ້ານຕາແຫລວ ເປັນເວລາຫລາຍປີ ຈຶ່ງເຮັດໃຫ້ວັດດັ່ງກ່າວ ມີຄວາມຮຸ່ງເຮືອງເຫລືອງເຫລື້ອມ. ຕົກມາຮອດ ວັນທີ 20 ພະຈິກ 1969 ຈັກກະພັດ ອາເມລິກາ ໄດ້ ໃຊ້ຍົນຖິ້ມລະເບີດ,

ຍິງລູກສອນໄຟ ເຜົາຜານທຳລາຍວັດຖຸ, ປູສະນີຍະສະຖານ ເຊິ່ງເປັນ ບ່ອນສັກກະລະບູຊາທີ່ເຄົາລົບນັບຖື ແລະ ຫວງແຫນ ຂອງຊາຊົນ ຖືກທຳລາຍ, ໃນນີ້ ໄດ້ເຮັດໃຫ້ວັດບ້ານ ຕາແຫລວ ແລະ ເຮືອນຊານ

ກາຍເປັນເຖົ່າຖ່ານ ເຊິ່ງປະຊາຊົນ ບ້ານ ຕາແຫລວ ພ້ອມດ້ວຍພະສົງ ສຳມະເນນ ໄດ້ຮັບເຄາະກຳ ຂາດທີ່ຢູ່ອາໃສ, ສ່ວນວັດວາອາຮາມ ກໍເພພັງເຫລືອແຕ່ຊາກ. ປັດຈຸບັນ ວັດຕາແຫລວເກົ່າ ທີ່ຍັງເຫລືອພຽງ ຫໍແຈກ

ຍ້ອນໄດ້ຮັບຜົນກະທົບຈາກໄພສົງຄາມ, ຊາກກຳແພງວັດ ແລະ ຮ່ອງຮອຍຂຸມລະເລີດ ກໍໄດ້ຮັບການບູລະນະຮັກສາໄວ້ ເພື່ອໃຫ້ເປັນທີ່ ສັກກາລະບູຊາ ແລະ ຂາບໄຫວຂອງ ປະຊາຊົນ ບ້ານຕາແຫລວ.